O dərdli uşağın göz yaşı üçün...

 

 

Heydər Əliyev Fondunun vitse-prezidenti Leyla Əliyeva Ermənistan silahlı qüvvələrinin Azərbaycanla sərhəddə, Tovuz rayonu istiqamətində törətdiyi xain təxribat zamanı, sərhədlərimizin müdafiəsinin ön xəttində qəhrəmancasına həlak olan hərbçilərimizə və  şəhid övladlarına ithaf olaraq şeir yazıb.

 

“O dərdli uşağın göz yaşı üçün...” adlı şeirdə bu itkidən doğan kədər hissləri, xalqımızın qələbə əzmi, işğal altındakı torpaqlarımızın azad olunacağına inamı ifadə edilir.

 

Bombalar səs-səsə veriblər yenə,

Vətənin bağrından qan axır indi.

Düşmən gülləsinə tuş olan əsgər,

Yaran qəlbin qədər dərin, dərindi.

 

Ağlayır bir ata itirmiş uşaq,

Ağlayır göylərdə Günəş bu gün.

Ellikcə savaşa hazırıq, Vətən,

O dərdli uşağın göz yaşı üçün.

 

Bir gün qayıdacaq yerinə hər şey,

Bir gün sevinəcək bu yurd, bu ocaq...

Ancaq o atanın isti qucağı

Bir o uşağa açılmayacaq.

 

Elimiz qələbə sorağı gözlər:

Gözləri yoldadı, qulağı səsdə.

Analar əlini qoyub and içir

Oğul itkisinin ağrısı üstə.

 

Gün gələr, o zəfər xəbəri gələr,

Öpər igidlərin başdaşlarını.

Ata nisgiliylə qovrulan uşaq

Dəfn eylər gözündə göz yaşlarını.

 

Tərcümə edən: Salam SARVAN

 

 

Mədəniyyət.- 2020.- 22 iyul.- S.7.