Asəf Zeynallının məzarı ilə bağlı vəziyyət nəzarətə götürülüb

“Tanınmış Azərbaycan bəstəkarı Asəf Zeynallının məzarının baxımsız vəziyyətdə olması ilə bağlı sosial şəbəkələrdə yayılan görüntülər bizdə ciddi narahatlıq yaradıb”.

Bu sözləri Mədəniyyət Nazirliyinin İnformasiya və ictimaiyyətlə əlaqələr şöbəsinin müdiri İntiqam Hümbətov bildirib (APA). O qeyd edib ki, məzarlıqların vəziyyəti, onların saxlanılması və durumu ilə digər aidiyyəti dövlət qurumları məşğuldur: “Buna baxmayaraq biz də müvafiq qurumlarla əlaqə saxlayaraq vəziyyətin tezliklə düzəldilməsinə çalışacağıq”.

Məsələ ilə bağlı Azərbaycan Milli Konservatoriyası nəzdində vaxtilə A.Zeynallının adını daşıyan Musiqi Kollecinin direktoru Nazim Kazımov isə deyib ki, Asəf Zeynallının məzarı hər il bəstəkarın doğum və vəfat günlərində - aprelin 5-də və oktyabrın 27-də ziyarət olunur və ətrafda təmizlik-abadlıq işləri görülür. Bu il karantin rejimi ilə əlaqədar aprelin 5-i məzarı ziyarət edə bilmədik, onun üçün də ot basıb. N.Kazımov bildirib ki, artıq məzarın ətrafında təmizlənmə işi aparılıb.

Mədəniyyət.- 2020.- 3 iyun.- S.4.