Respublika müşavirəsinin
panel iclasları və
təlim sessiyaları
“Azərbaycanın mədəni
marşrutlar potensialı”
mövzusunda Respublika müşavirəsinin “Mədəni
marşrutlar: milli mədəni irsin təbliği və yerli inkişafı üçün model” adlı
panel iclası Mədəni
Marşrutlar üzrə
Avropa İnstitutunun direktoru Stefano Dominioninin moderatorluğu ilə keçdi.
Milli mədəni irsin təbliği və inkişafı üçün
model
İclasda “Azərxalça” ASC-nin İdarə heyətinin sədr müavini Orxan Rzayev Azərbaycanda
xalçaçılığın inkişafı və xalça sənəti haqqında məruzə ilə çıxış
etdi. Qeyd olundu ki, xalça toxumaq insanları birləşdirir,
onlarda kollektivlik, bir-birinə kömək, dostluq hisslərini aşılayır. Azərbaycan xalçası
təkcə milli həyat tərzinin əsas elementlərindən,
dekorativ-tətbiqi sənətin
növ müxtəlifliyindən
ibarət deyil, xalqın mənəvi və əxlaqi normaları ilə bağlıdır. Azərbaycanda xalça toxuculuğu tətbiqi sənətin ən qədim sahələrindən hesab
edilir. Ölkə ərazisində aparılan
arxeoloji qazıntılar
və yazılı mənbələrə görə,
Azərbaycanda xalça
toxuculuğu Tunc dövründə meydana gəlib. Vurğulandı ki, qədim
zamanlardan Avropada Azərbaycan xalçalarına
böyük maraq olub və bu
gün də bu ənənə davam etməkdədir.
Məruzəçi “Azər-İlmə”
və “Azərxalça”nın fəaliyyəti
haqqında da məlumat verdi. Bildirdi ki, “Azər-İlmə”
xalçaçılıq şirkəti ötən əsrin 90-cı illərindən
başlayaraq
Abşeronda, Qarabağda,
Qazaxda, Qubada, Gəncədə, Lerikdə,
Şirvanda, Şəkidə
emalatxanalar yaradaraq qədim xalçaçılıq
ənənələrini yaşatmağa
çalışıb. Bu gün
bu iş dövlətin diqqət və qayğısı, dəstəyi ilə “Azərxalça” ASC tərəfindən
geniş şəkildə
davam etdirilir. Hazırda “Azərxalça”nın ölkə üzrə 12 xalça fabriki fəaliyyət göstərir.
Vurğulandı ki, Azərbaycan
xalçaçılığının
inkişafı və onun nailiyyətlərinin dünya miqyasında təbliği sahəsində
Birinci vitse-prezident Mehriban xanım Əliyevanın böyük
rolu var. Mehriban xanımın rəhbərliyi
ilə Azərbaycanın
dövlət müstəqilliyinin
20 illiyi münasibətilə
Böyük Britaniyada,
Fransada və Rusiyada keçirilən Azərbaycan mədəniyyəti
və incəsənəti
günləri çərçivəsində
təşkil edilən
xalça sərgiləri
bu qədim mirasın təbliğinə
böyük töhfə
verib. 2010-cu ildə Azərbaycan
xalçaçılıq sənəti UNESCO-nun Qeyri-maddi
mədəni irs siyahısına daxil edilib.
Mədəniyyət müəssisələrinin
mədəni marşrutlarda
rolu
Fevralın 29-da işini davam
etdirən müşavirənin
növbəti panel iclası
“Mədəniyyət müəssisələrinin
mədəni marşrutların
inkişafında və
təbliğatında rolu”
mövzusuna həsr
olunmuşdu.
Mədəni Marşrutlar üzrə
Avropa İnstitutunun direktoru Stefano Dominioninin moderatorluğu ilə keçirilən iclasda Azərbaycan Aşıqlar
Birliyinin sədri,
professor Məhərrəm Qasımlı,
Mədəniyyət üzrə
Elmi-Metodiki və İxtisasartırma Mərkəzinin
direktoru Asif Usubəliyev, Beynəlxalq Muğam Mərkəzinin “Unudulmayanlar” və “Dəyirmi masa” layihələrinin koordinatoru
Gülhüseyn Kazımlı,
Lənkəran şəhər
Mədəniyyət Mərkəzinin
direktoru Hafiz Mirzə,
Saatlı rayon Mədəniyyət
Mərkəzinin direktoru
Bəylər Əliyev
mövzu üzrə məruzələrlə çıxış
etdilər.
Asif Usubəliyev
“Mədəniyyət müəssisələri
mədəni marşrutların
subyekti kimi” məruzəsində Mədəniyyət
üzrə Elmi-Metodiki
və İxtisasartırma
Mərkəzinin ənənəvi
mədəniyyət sahələrinin
hərtərəfli tənzimlənməsində
əlaqələndirici rolundan
söz açdı, xalq yaradıcılığının
müxtəlif janrlarının
inkişafının stimullaşdırılmasından
danışdı.
Gülhüseyn Kazımlı “Azərbaycan
muğam marşrutları
– Qarabağ, Şirvan,
Bakı, Gəncə,
Tiflis” mövzulu məruzəsində
ölkəmizdə muğam
ifaçılıq məktəblərinin
formalaşması və
inkişafından bəhs
etdi.
Panel iclasda aşıq
sənətinin tarixi,
bölgələrin mədəni
marşrutların fəaliyyətində
rolu və yeni təşəbbüslərlə
bağlı fikirlər
səsləndirildi.
***
Daha sonra müşavirə çərçivəsində
təlim sessiyası təşkil edildi. Təlimçilər
– Mədəni Marşrutlar
üzrə Avropa İnstitutunun layihə rəhbəri Karolina Klark və “Avropa Tarixi Termal Şəhərlər”
marşrutunun koordinatoru
Katerina Lloyd “Mədəni
marşrutların inkişafı,
idarəçilik və
davamlı idarəetmə”,
“Yerli və davamlı inkişaf üçün mədəni
marşrutlar: sistemli yanaşma”, “Mədəni marşrutlar üçün
brendləşdirmə, marketinq
və kommunikasiya”, “Tematik tədqiqatlar və ən yaxşı təcrübələr”
mövzularında müzakirə
apardılar.
Günün ikinci yarısı təlim sessiyası “Mədəni marşrutlar
– ən yaxşı təcrübələr” mövzusunda
işini davam etdirdi.
Avropa Şurası mədəni
marşrutlarının tematik
tədqiqatları
Həmin gün təlim sessiyası üzrə “Avropa Şurası mədəni marşrutlarının
tematik tədqiqatları
və ən yaxşı təcrübələri”
mövzusunda məruzələr
dinlənildi.
Məruzələr Mədəni Marşrutlar
üzrə Avropa İnstitutunun direktoru
Stefano Dominioni, həmin
institutun layihə rəhbəri Karolina Klark və “Avropa Tarixi Termal Şəhərlər”
marşrutunun koordinatoru
Katerina Lloyd tərəfindən
təqdim edildi.
Məruzələrdə Avropa Şurasının Azərbaycandan keçən
marşrutları, mədəni
marşrutların inkişaf
yolları, Avropa Şurasının sertifikatlaşdırılmış
mədəni marşrutlarının
genişləndirilməsi və
ölkəmizdə bu
sahənin inkişafı
üçün çağırışlar
və imkanlardan söz açıldı. Çıxışlar zamanı mədəni marşrutlar üzrə müvafiq qurumların fəaliyyəti, müxtəlif
ölkələrdə mədəni
marşrutların təşkili,
inkişafı ilə
bağlı təqdimatlar
edildi. Eyni zamanda bu sahədə yeni ideya və layihələr
haqqında məlumat verildi.
Tədbirdə həmçinin növbəti forumun bu ilin oktyabr ayında Yunanıstanda keçirilməsinin nəzərdə tutulduğu diqqətə çatdırıldı.
Məruzələrdə mədəni marşrutlarla bağlı təbliğat-təşviqat işlərinin gücləndirilməsi, bu sahədə maarifləndirmə işlərinin aparılması da vurğulandı. Çıxışlarda mədəni marşrutlar mədəniyyətlərarası dialoqun istiqamətlərindən biri kimi dəyərləndirildi. Qeyd olundu ki, mədəni marşrutlar Avropa yaddaşının qoruyucusu olaraq milli irsin təbliğində əhəmiyyətli yer tutur.
Sonda Avropa Tarixi Termal Şəhərlər Assosiasiyasının tarixini əks etdirən videoçarx nümayiş olundu.
L.AZƏRİ
Mədəniyyət.- 2020.- 4 mart.-
S.3.