Əsgərlərimizin döyüş ruhunu yüksəltmək üçün yeni musiqi əsərləri yazılır

Gəncə XII əsrdə yaşayıb-yaratmış dahi Azərbaycan şairi Nizami Gəncəvinin vətənidir. Burada çoxlu sayda qədim tarixi-memarlıq abidələri, o cümlədən, Nizami Gəncəvinin məqbərəsi, muzeylər, məscidlər, karvansaralar və s. mövcuddur. Gəncə şəhərinin qədim musiqi ənənələrinə malik olması dahi şair Nizaminin şeirlərində öz əksini tapmışdır. Gəncə şəhəri həmçinin Məhsəti Gəncəvi, Mirzə Şəfi Vazeh, Fikrət Əmirov, Qəmbər Hüseynli və başqa görkəmli şəxsiyyətlərin vətənidir.

Bu sözlər Azərbaycan Bəstəkarlar İttifaqının erməni silahlı qüvvələrinin Gəncənin mülki əhalisinə qarşı törətdiyi terror aktı ilə bağlı bəyanatında qeyd olunub.

Bəyanatda Azərbaycan Bəstəkarlar İttifaqının doğma torpaqlarımızın azad edilməsi yolunda mübarizə aparan Azərbaycan Ordusuna dəstəyi ifadə olunur. Qeyd edilir ki, Bəstəkarlar İttifaqı Silahlı Qüvvələrə Yardım Fonduna 10 min manat ianə köçürüb.

“Bütün bəstəkarlarımız əsgərlərimizin döyüş ruhunu yüksəltmək üçün yeni mahnı və marşlar yazmağı özlərinə şərəfli vəzifə bilirlər. Respublika Radiosu və Televiziyası ilə verilən hər yeni informasiyadan sonra bəstəkarlarımızın yazdığı yeni vətənpərvərlik əsərləri səsləndirilir. Lirik səciyyəli əsərlərdən qəhrəmanlıq marşlarınadək müxtəlif üslubları əhatə edən bu əsərlərin hər birində qələbəyə sonsuz inam hissi aşılanır”, – deyə bəyanatda bildirilir.

Mədəniyyət.- 2020.- 16 oktyabr.- S.3.