Gənc bəstəkarın “Xocalıya” əsəri rəqəmsal platformada

Türkiyədə yaşayan soydaşımız – gənc bəstəkar, pianoçu, dirijor, beynəlxalq müsabiqələr laureatı Abuzər Manafzadənin “Xocalıya” əsəri rəqəmsal platformada təqdim olunub. Əsər müəllifin bacısı – Azərbaycanın Əməkdar artisti, dirijor, bəstəkar və pianoçu Turan Manafzadə tərəfindən ifa edilib.

Bu barədə məlumat verən Turan Manafzadə deyib: “Bu əsər artıq beş ildir yazılıb və dünyanın bir çox ölkəsində səsləndirilib. Əsər bütün ailə üzvlərimiz tərəfindən fərqli formalarda ifa olunub. Bizdən başqa, xarici ölkələrdə digər musiqiçilər, pianoçular da əsəri ifa ediblər. Mən də əsərin pianoda ifasını və dirijorluğunu etmişəm. Lakin rəqəmsal platformalarda ilk dəfə təqdim olunur. Artıq istəyən hər bir kəs əsəri professional formatda dinləyə bilər. Əsas məqsəd əsəri daha çox dinləyici auditoriyasına çatdırmaqdır. Biz ailə üzvlərimizlə birlikdə Azərbaycanı, Azərbaycan musiqisini dünyada tanıtmağa çalışırıq və bununla da qürur duyuruq”.

Qeyd edək ki, Abuzər və Turan Manafzadələr Azərbaycanın Əməkdar artisti, görkəmli pianoçu İslam Manafovun övladlarıdır.

Mədəniyyət.- 2020.- 28 oktyabr.- S.3.