Amerika nəşrlərində Azərbaycanlıların Soyqırımı Günü barədə məqalələr

ABŞ Azərbaycanlıları Şəbəkəsi tərəfindən hər il keçirilən Amerika ictimaiyyətinin məlumatlandırılması kampaniyası çərçivəsində 31 mart – Azərbaycanlıların Soyqırımı Günü ilə bağlı materiallar müxtəlif media səhifələrində yayılıb.

“The State Journal”, “Centre Daily Times”, “Greenfield Recorder” və “Delaware News Journal” qəzetlərində Azərbaycan diasporu üzvlərinin mövzuya dair məqalələri dərc edilib.

Məqalələrdə bildirilir ki, bütün dünya azərbaycanlıları martın 31-ni Azərbaycanlıların Soyqırımı Günü kimi qeyd edirlər. Bu tarix 1918-ci il mart-aprel aylarında və ümumiyyətlə, XIX-XX əsrlərdə Azərbaycan xalqına çox böyük məşəqqətlər gətirmiş digər faciəli hadisələrlə bağlıdır.

Materiallarda qeyd olunur ki, 1918-ci ilin mayın 28-də Azərbaycan Xalq Cümhuriyyəti elan ediləndən sonra hökumət bu faciəli hadisələrini təhqiq etməyə başlayıb. 1919-1920-ci illərdə martın 31-ni soyqırımı qurbanlarının xatirəsinə matəm günü kimi qeyd edib.

Sovet dövründə ukraynalılar Qolodomor illərində həlak olanların xatirəsini, çərkəzlər öz xalqına qarşı soyqırımı qurbanlarının xatirəsini ehtiramla yad edə bilmədiyi kimi, Azərbaycan xalqının da ona qarşı törədilmiş soyqırımı qurbanlarının xatirəsini yad etməsinə imkan verilmirdi.

Vurğulanır ki, ölkəmizin müstəqilliyi bərpa ediləndən sonra Azərbaycanlıların Soyqırımı Günü dövlət səviyyəsində qeyd edilir. Məqalələrdə Azərbaycan xalqına qarşı soyqırımı siyasətinin bütün XX əsr boyu davam etdiyi diqqətə çatdırılır, 1992-ci ildə erməni qoşunları tərəfindən törədilmiş Xocalı qırğını barədə də məlumat verilir.

Mədəniyyət.- 2021.- 2 aprel.- S.8.