“Nizami ili” ilə bağlı onlayn konfrans

“Nizami ili” çərçivəsində böyük şairin doğma şəhərində də silsilə tədbirlər nəzərdə tutulub. Bu mövzuda YAP Gəncə şəhər təşkilatının təşəbbüsü ilə təşkil olunan onlayn konfransa Gəncədə fəaliyyət göstərən mədəniyyət və incəsənət xadimləri, elm adamları və parlamentdə Gəncəni təmsil edən millət vəkilləri qatılıblar.

Milli Məclisin deputatı, YAP Gəncə şəhər təşkilatının sədri Naqif Həmzəyevin moderatorluğu ilə keçirilən tədbirdə Gəncədə reallaşdırılacaq tədbirlər müzakirə olunub, şairin irsinin geniş təbliği və öyrənilməsi istiqamətində atılacaq addımlardan danışılıb.

Gəncə Regional Mədəniyyət İdarəsinin rəisi Vasif Cənnətov “Nizami ili”ndə idarənin görəcəyi işlər haqqında məlumat verib. Bildirib ki, il ərzində kitab və rəsm sərgiləri, ədəbi-bədii kompozisiyaların hazırlanması, poeziya saatlarının təşkili, elmi konfransların keçirilməsi planlaşdırılır.

Millət vəkili Pərvin Kərimzadə deyib ki, bu il dahi şairin yaradıcılığının dünyada daha geniş təbliği və öyrənilməsi ilə əlamətdar olacaq.

Azərbaycan Yazıçılar Birliyi Gəncə bölməsinin sədri Xəzəngül Hüseynova, Xalq artisti Şahnaz Haşımova və digər çıxış edənlər dahi şairin yurdunda yaşadıqları üçün özlərini xoşbəxt hesab etdiklərini dilə gətiriblər.

Mədəniyyət.- 2021.- 9 aprel.- S.4