Can Azərbaycan yaradıcılıq müsabiqəsinin yekun virtual sərgisi

Mədəniyyət Nazirliyi Rəssamlar İttifaqının dəstəyi, Azərbaycan Dövlət Rəsm Qalereyası, İWS Azerbaijan (İWS Globe Beynəlxalq Sulu boya Cəmiyyətinin Azərbaycandakı nümayəndəliyi) Xətai Sənət Mərkəzinin təşkilatçılığı ilə keçirilən Can Azərbaycan Respublika yaradıcılıq müsabiqəsinə yekun vurulub.

 

Aprelin 20-də yaradıcılıq müsabiqəsinin yekun virtual sərgisi təşkil olunub. Sənətsevərlər Azərbaycan Dövlət Rəsm Qalereyası və Xətai Sənət Mərkəzinin sosial media hesabları vasitəsilə sərgini izləmək imkanı qazanıblar.

 

Qrafika texnikası üzrə 30-a yaxın, akvarel üzrə 40-dan çox vətənpərvərlik mövzusunda əsərin nümayiş etdirildiyi virtual sərgi dahi bəstəkar Fikrət Əmirovun Kürd ovşarı simfonik muğamının sədaları ilə müşayiət olunub.

 

Qeyd edək ki, ötən ilin noyabrında elan olunan müsabiqənin məqsədi akvarelqrafika texnikası ilə çəkilmiş əsərlərə marağı artırmaq, rəssamların yaradıcılığında ölkəmizin tərənnümü, habelə Ali Baş Komandanın rəhbərliyi altında Azərbaycan Ordusunun Vətən müharibəsində göstərdiyi rəşadəti və milli birliyimizi təsviri sənətdə əks etdirmək idi.

 

Azərbaycan və xarici ölkələrdən olan qrafikaakvarel ustaları əsərlərini bu ilin 5 mart tarixinədək Xətai Sənət Mərkəzinin Facebook sosial şəbəkə səhifəsində müəllif və əsər haqqında müvafiq məlumatları qeyd etməklə yerləşdirmişdilər.

 

Müsabiqədə qrafika nominasiyası üzrə Elmir Məmmədovun Qarabağ - Cıdır düzü əsəri I, Günel Quliyevanın Şuşa fatehi rəsmi II, Əbülfəz Fərəcoğlunun Xarı bülbülün xilası əsəri isə III yerə layiq görülüb.

 

Akvarel nominasiyası üzrə Hafiz Kərimovun Şahbuzda ilk bahar rəsmi I, Fatma Kılıçın Can Azərbaycanın yanındayıq əsəri II, Feyzi Məmmədovun Sübh çağı əl işi isə III yeri qazanıb.

 

LALƏ

 

Mədəniyyət.- 2021.- 23 aprel.- S.3.