Musiqi ilə dolu beş gün...

XII Qəbələ Musiqi Festivalı sənətçi və sənətsevərlər üçün bayram oldu

Azərbaycanın dilbər guşələrindən olan Qəbələ şəhəri yenidən öz qapılarını musiqiçilərin və sənətsevərlərin üzünə açdı. Heydər Əliyev Fondunun dəstəyi və təşkilatçılığı, Mədəniyyət Nazirliyi, Təhsil Nazirliyi və Bakı Musiqi Akademiyasının dəstəyi ilə iyulun 31-də başlayan XII Qəbələ Musiqi Festivalı avqustun 4-də başa çatır.

Builki festival əlamətdar hadisəyə – Üzeyir Hacıbəyli adına Bakı Musiqi Akademiyasının (BMA) 100 illik yubileyinə həsr olunub. Ölkə başçısı İlham Əliyev yubileylə bağlı 2021-ci il mayın 26-da sərəncam imzalayıb. Sərəncama uyğun olaraq müxtəlif tədbirlərin keçirilməsi nəzərdə tutulub. XII Qəbələ Musiqi Festivalı da əlamətdar yubileyə həsr olunmuş tədbirlərdən biridir.

Musiqi ictimaiyyəti arasında böyük rəğbətlə qarşılanan Qəbələ Musiqi Festivalının proqramı bu il də çox zəngindir və klassik musiqi ilə yanaşı, muğam və xalq musiqisini də əhatə edir.

İyulun 31-də festivalın rəsmi açılışından öncə Qəbələ şəhərindəki Heydər Əliyev Konqres Mərkəzinin kamera zalında musiqisevərlərə Ü.Hacıbəyli adına BMA-nın tələbələrinin iştirakı ilə ilk konsert təqdim olunub. Konsertdə respublika və beynəlxalq müsabiqələr laureatları çıxış ediblər. Pianoçular Leyla Zeynalova, Atabala Manafzadə, Cəmil Sədizadə, Rəşid Behbudov, Jalə Mayılova, Səbinə Muradova, Gülər Ağayeva və Fəqan Həsənlinin, violin ifaçıları Osman Mustafazadə, Zərrin Əliyeva və Aysel Abdullayevanın, violonçel ifaçısı Orxan Hüseynovun, həmçinin viola, fleyta, klarnet və truba ifaçılarının, vokalçılar Nigar Əsgərova və Sübhan Rüstəmovun ifaları tamaşaçılar tərəfindən alqışlarla qarşılanıb.

Konsertdə S.Raxmaninov, H.Venyavski, A.Messager, A.Skryabin, A.Piazzolla, F.Şopen, D.Şostakoviç, həmçinin Azərbaycan bəstəkarlarından Tofiq Quliyev, Fikrət Əmirov və Müslüm Maqomayevin əsərləri səsləndirilib.

***

Həmin gün axşam “Qafqaz Resort” hotelində açıq səhnədə XII Qəbələ Musiqi Festivalının təntənəli açılış mərasimi olub.

Mərasimdə əvvəlcə ölkəmizdə musiqi mədəniyyətinin inkişafında və təbliğində müstəsna xidmətləri olan Birinci vitse-prezident, Heydər Əliyev Fondunun prezidenti Mehriban Əliyevanın festival iştirakçılarına təbrik məktubu oxunub. Məktubda diqqətə çatdırılır ki, 2009-cu ildən etibarən ənənəvi olaraq təşkil olunan Qəbələ Beynəlxalq Musiqi Festivalı mədəni irsimizin zəngin ənənələrinin qorunub saxlanılması ilə yanaşı, mədəniyyətlərarası dialoqun möhkəmləndirilməsinə böyük töhfəsini verən musiqi bayramı kimi ölkəmizin hüdudlarından kənarda da şöhrət qazanıb.

Təbrik məktubunda o da vurğulanır ki, koronavirus pandemiyası səbəbi ilə Qəbələ festivalının keçirilmədiyi 2020-ci il xalqımızın yaddaşına və tarixinə 44 günlük Vətən müharibəsi və müzəffər Azərbaycan Ordusunun şanlı Zəfəri ilə əbədi həkk olundu. 30 ilə yaxın işğal altında olan əzəli Azərbaycan torpaqları azad olundu və ölkəmizin ərazi bütövlüyü bərpa edildi. Qarabağın tacı olan Şuşa şəhərini ölkəmizin mədəniyyət paytaxtı elan edən Azərbaycan Respublikasının Prezidenti İlham Əliyevin tapşırığı əsasında Heydər Əliyev Fondunun təşkilatçılığı ilə bu ilin may ayında “Xarıbülbül” musiqi festivalı bərpa olundu. Əfsanəvi Cıdır düzündə Azərbaycan musiqisini dinləmək arzusunda olan sənətsevərlərin uzunillik həsrətinə son qoyuldu.

“Qloballaşan dünyada müxtəlif sivilizasiyalar və xalqlar arasında mədəniyyətlərarası dialoqun qurulması və inkişafı dövrümüzün ən vacib tələblərindən biridir. Beynəlxalq aləmdə mövcud olan problemlərin, münaqişələrin həll edilməsində, ayrı-ayrı xalqlar arasında qarşılıqlı hörmətin təşviqində dialoq ən gözəl vasitədir. Əsrlər boyu mədəniyyətlərarası dialoqun inkişafına öz töhfəsini verən Azərbaycan da tarixən müxtəlif millətlərin mədəniyyət və incəsənətinin qarşılıqlı zənginləşməsinə, xalqlar arasında olan birliyin daha da gücləndirilməsinə səy göstərib. Bu baxımdan, artıq illərdir ki, təşkil olunan Qəbələ Musiqi Festivalının rolunu yüksək qiymətləndirirəm”, – deyə məktubda bildirilir.

Birinci vitse-prezidentin təbrik məktubunda builki Qəbələ festivalının müsəlman Şərqinin yeni tipli ali musiqi təhsili ocağı olan Bakı Musiqi Akademiyasının 100 illik yubileyinə təsadüf etməsinin əlamətdar hadisə olduğu da vurğulanır: “Milli musiqi sənətimizi bütün dünyada uğurla təmsil edən və yaradıcılığı Azərbaycan musiqisinin qızıl fonduna daxil olan görkəmli sənətkarların, tanınmış ifaçıların bir neçə nəsli məhz Bakı Musiqi Akademiyasının yetirmələridir. Təsadüfi deyil ki, XII Qəbələ Musiqi Festivalının iştirakçıları da, əsasən, peşəkar musiqiçi kadrların hazırlanmasına və klassik musiqi irsimizin öyrənilməsinə xidmət edən Bakı Musiqi Akademiyasının müəllim və tələbə heyəti və onun məzunlarıdır”.

Təbrik məktubu bu sözlərlə bitir: “Əminəm ki, tamaşaçılara maraqlı və rəngarəng musiqi proqramı təqdim olunacaq, XII Qəbələ Musiqi Festivalı hər zaman olduğu kimi qonaqlarımızın yaddaşında, Azərbaycan musiqi mədəniyyəti tarixində mənalı səhifələrdən biri kimi qalacaqdır”.

Qeyd edək ki, festivalın açılış mərasimində Prezident Administrasiyasının Humanitar siyasət, diaspor, multikulturalizm və dini məsələlər şöbəsinin müdiri Fərəh Əliyeva, mədəniyyət naziri Anar Kərimov, təhsil naziri Emin Əmrullayev, Qəbələ rayonunun icra başçısı Səbuhi Abdullayev, digər rəsmilər iştirak ediblər.

Mərasimdə çıxış edən təhsil naziri Emin Əmrullayev festivalın Bakı Musiqi Akademiyasının yubileyinə həsr olunmasının əhəmiyyətini diqqətə çatdırıb. Bildirib ki, Bakı Musiqi Akademiyası 100 illik fəaliyyəti dövründə Azərbaycanın və dünyanın bir sıra aparıcı musiqiçilərini, sənət adamlarını yetişdirib, Azərbaycan musiqi sənətinin dünya musiqisinə və dünya mədəniyyətinə inteqrasiyasında mühüm rolu olub.

Üzeyir Hacıbəyli adına BMA-nın rektoru, Xalq artisti, professor, Qəbələ Musiqi Festivalının bədii rəhbəri Fərhad Bədəlbəyli də çıxışında bu yubileyin Azərbaycanın mədəni həyatında çox böyük hadisə olduğunu bildirib, festivala uğurlar arzulayıb.

Açılış mərasimindən sonra Müdafiə Nazirliyinin Əlahiddə Nümunəvi Hərbi Orkestri konsert proqramı ilə çıxış edib. Orkestrin bədii rəhbəri və baş dirijoru Müdafiə Nazirliyinin Şəxsi Heyət Baş İdarəsi Hərbi Orkestr Xidmətinin rəisi, Xalq artisti, general-mayor Yusif Axundzadədir.

Əvvəlcə Azərbaycan Respublikasının Dövlət Himni və Ü.Hacıbəylinin “Koroğlu” operasından “üvertüra” səsləndirilib.

Orkestrin rəisi – Əməkdar incəsənət xadimi, polkovnik-leytenant Rüfət Axundzadənin və hərbi dirijor baş leytenant Elnur Qurbanovun dirijorluğu ilə keçən konsertdə Aynur İsgəndərli (vokal), Arslan Növrəsli (tar), Kənan Qədimov (vokal), Gülnar Qüdrətli (xanəndə), Namiq Qurbanov (zurna, balaban) və Anar Hüseynovun (nağara) ifaları tamaşaçılar tərəfindən alqışlarla qarşılanıb.

BMA tələbələrinin festivala töhfəsi

XII Qəbələ Musiqi Festivalının ikinci günü, avqustun 1-də Heydər Əliyev Konqres Mərkəzində Üzeyir Hacıbəyli adına BMA-nın tələbələrinin konserti təqdim olunub. Konsertdə respublika və beynəlxalq müsabiqələr laureatları çıxış ediblər.

Prezident təqaüdçüləri Vüsalə Babayeva (piano), Zərrin Əliyeva (violin), Lalə İbrahimova (vokal), Kamran Talıblı (fleyta), Leyla Zeynalova (piano), Emil Əhmədzadə (piano), həmçinin Elxan Niftiyev, Fuad Əlizadə, Ləman Seyidova, Ceyran İsayeva, Fəqan Həsənli və digər pianoçuların, klarnet ifaçısı Məhəmmədəli Paşazadə, violin ifaçısı Nigar Əsgərova, qoboy ifaçısı Əziz Pənah, violonçel ifaçısı Ərol Rzayev, vokalçılar Rza Xosrovzadə və Mahir Tağızadənin çıxışları tamaşaçılar tərəfindən alqışlarla qarşılanıb.

Konsertdə M.Arnold, F.Şopen, M.Moşkovski, R.Şuman, A.Qrunfeld, N.Rimski-Korsakov, həmçinin Tofiq Quliyev, Niyazi və digər bəstəkarların əsərləri səsləndirilib.

Bakı Kamera Orkestrinin konserti

Festivalın ikinci günü axşam saatlarında Heydər Əliyev Konqres Mərkəzində tamaşaçılara Bakı Şəhər Mədəniyyət Baş İdarəsinin Bakı Kamera Orkestrinin konserti təqdim olunub.

Orkestrin bədii rəhbəri Xalq artisti Fərhad Bədəlbəyli, baş dirijoru Əməkdar artist Fuad İbrahimov, dirijoru Cavad Tağızadədir.

Konsert Vətən müharibəsinin qazisi, respublika və beynəlxalq müsabiqələr laureatı Vüqar Məmmədzadənin “Şəhidlərə ithaf” əsərinin ifası ilə (solist respublika və beynəlxalq müsabiqələr laureatı, qoboy ifaçısı Əziz Pənah) başlayıb.

Proqramda daha sonra Xalq artisti, pianoçu Murad Hüseynovun ifasında İ.S.Baxın “Konsert re minor (III hissə), tanınmış vokalçı, kontratenor, Əməkdar artist İlham Nəzərovun ifasında F.Hendelin “Lasicia chio pianga” və Vasif Adıgözəlovun “Qərənfil”, Xalq artisti, pianoçu Yeganə Axundovanın ifasında D.Şostakoviçin “2 saylı Konsert”, həmçinin orkestrin ifasında Fikrət Əmirovun “Nizami xatirəsinə”, Fərhad Bədəlbəylinin “Bahar valsı” və başqa əsərlər səsləndirilib.

Səhnədə müəllimlərdir

Avqustun 2-də Heydər Əliyev Konqres Mərkəzində musiqisevərlərə Ü.Hacıbəyli adına BMA-nın müəllimlərinin iştirakı ilə konsert proqramı təqdim olunub.

Konsert Üzeyir Hacıbəylinin “Cəngi” əsərinin ifası ilə (solist respublika və beynəlxalq müsabiqələr laureatı, pianoçu Fəqan Həsənli) başlayıb.

Sonra Vətən müharibəsinin qazisi, respublika və beynəlxalq müsabiqələr laureatı, bəstəkar Vüqar Məmmədzadənin Nizaminin sözlərinə bəstələdiyi “Ayüzlü nigarım” mahnısı təqdim olunub. Solist Atəş Qarayevin ifasını Əməkdar artist İlham Nəcəfzadə (ney), respublika və beynəlxalq müsabiqələr laureatları Fəridə Ələkbərli (arfa), Əkbər Məmmədov (darbuka) və Orxan Hüseynov (violençel) müşayiət ediblər.

Konsertdə həmçinin M.Falyanın “İspan rəqsi”, İ.Bramsın “Laylay”, J.Ramonun “Quşların cəh-cəhi”, Cövdət Hacıyevin “Ballada” və digər bəstəkarların əsərləri səsləndirilib. BMA-nın “Lumineux” vokal ansamblının təqdim etdiyi “Güləbatın” Azərbaycan xalq mahnısı da tamaşaçıların ürəyincə olub.

Proqramda “Clarte” klarnet kvartetinin üzvləri Anar Məmmədov, Emil Bağırov, Məhəmmədəli Paşazadə və Məmməd Rəcəblinin ifasında Tofiq Quliyevin “Sən mənimsən, mən sənin”, Vaqif Mustafazadənin “Yollar” və İ.Volantenin “American feelinq” əsərləri də yer alıb.

“Zəfər” muğam kompozisiyası...

Festivalın üçüncü gününün daha bir konserti “Zəfər” muğam kompozisiyası” adlı muğam axşamı olub. Açıq səhnədə (“Qafqaz Resort” hoteli) tanınmış muğam ifaçıları tamaşaçılara unudulmaz musiqi bayramı bəxş ediblər.

Konsertin əvvəlində Nazim Əliverdibəyovun “Muğam” xoreoqrafik miniatürü təqdim olunub. Xalq artistləri Rəfiqə Axundova və Maqsud Məmmədovun quruluş verdiyi xoreoqrafik miniatürü Azərbaycan Dövlət Akademik Opera və Balet Teatrının solisti Fatimə Xələfova və Əməkdar artist Samir Səmədov ifa ediblər. İfa məşhur balet artisti Rəfiqə Axundovanın 90 illiyinə həsr olunub.

Sonra Xalq artisti Mənsum İbrahimovun rəhbərliyi ilə “Qarabağ” muğam ansamblının ifasında “Zəfər” muğam kompozisiyası” təqdim olunub. Mənsum İbrahimovun, Əməkdar artist Təyyar Bayramovun, xanəndələr Gülzar Fərəcova, Günay İmamverdiyeva və gənc xanəndə Kənan Bayramlının ifaları alqışlarla qarşılanıb. Onları tarda Xalq artisti Elçin Həşimov, kamançada Əməkdar artist Elnur Əhmədov, sintezatorda Ceyhun Qurbanov, nağarada Siyavuş Kərimov müşayiət ediblər.

Festivalın proqramına uyğun olaraq, avqustun 3-də tamaşaçılara Bakı Musiqi Akademiyası müəllimlərinin və Üzeyir Hacıbəyli adına Azərbaycan Dövlət Simfonik Orkestrinin konsertləri təqdim olunub...

BMA müəllimlərinin növbəti konserti

Avqustun 3-də Heydər Əliyev Konqres Mərkəzində musiqisevərlərə Üzeyir Hacıbəyli adına BMA-nın müəllimlərinin iştirakı ilə növbəti konsert təqdim olunub. Konsertdə Xalq artistləri Murad Adıgözəlzadə (piano), Ülviyyə Hacıbəyova (piano), Elnarə Dadaşova (piano), Gülnaz İsmayılova (vokal), Əvəz Abdulla (vokal), Əməkdar artist Fəridə Məmmədova (vokal), Əməkdar incəsənət xadimi Ceyhun Allahverdiyev (piano), beynəlxalq müsabiqələr laureatı Nərmin Nəcəfli (piano) Azərbaycan və xarici ölkə bəstəkarlarının əsərlərindən ibarət konsert proqramı ilə çıxış ediblər.

Proqramda Qara Qarayevin “Yeddi gözəl” baletindən vals, C.Puççininin “Edqar” operasından Frankonun ariyası, Soltan Hacıbəyovun “Adajio”, Əfrasiyab Bədəlbəylinin “Vals”, Ceyhun Allahverdiyevin “Nədəndir?”, İsmayıl Hacıbəyovun “Paqanini mövzusunda variasiyalar”, Fərhad Bədəlbəylinin “Şuşa xatirələri”, Elnarə Dadaşovanın “Laylay” və digər əsərlər səsləndirilib.

XII Qəbələ Musiqi Festivalının son konsert proqramları avqustun 4-də təqdim olunacaq.

Mədəniyyət.- 2021.- 4 avqust.- S.1;3.