Pandemiyadan sonra İranla turizm əməkdaşlığı

İran İslam Respublikası Azərbaycan Respublikasının ərazi bütövlüyünü və suverenliyini hər zaman dəstəkləyib və bölgədə sülhün bərqərar olmasını regionun ümumi inkişafı üçün vacib hesab edir.

İranın Azərbaycandakı səfiri Seyid Abbas Musəvi bu fikri fevralın 11-də Dövlət Turizm Agentliyinin sədri Fuad Nağıyev ilə görüşdə bildirib.

Dövlət Turizm Agentliyindən bildirilib ki, görüşdə iki ölkə arasında mövcud turizm əlaqələri və gələcək əməkdaşlıq münasibətləri haqqında müzakirələr aparılıb.

Fuad Nağıyev müzəffər Ali Baş Komandan İlham Əliyevin rəhbərliyi ilə Azərbaycan torpaqlarının erməni işğalından azad edilməsindən sonra Qarabağda turizmin inkişafı perspektivlərindən danışıb. Agentlik sədri, həmçinin işğalçılar tərəfindən məqsədli şəkildə turizm əhəmiyyətli məkanların, o cümlədən tarixi dini abidələrin və İslam irsinin dağıdılması barədə məlumat verib.

Görüşdə iki ölkə arasında viza və sərhəd-keçid prosedurlarının sadələşdirilməsi, müvafiq infrastrukturun təkmilləşdirilməsi, turizm sənayesi nümayəndələri arasında əməkdaşlıq, postpandemiya dövründə turizm sahəsinin bərpası məqsədilə planlaşdırılan tədbirlər, qarşılıqlı məlumat və təcrübə mübadiləsi, Xəzəryanı ölkələrin turizm əlaqələri barədə müzakirələr aparılıb.

Mədəniyyət.- 2021.- 12 fevral.- S.3.