“Dumanlar başımda dastana döndü”

YARAT Mədəniyyət Nazirliyinin dəstəyi ilə Gəncədə sərgi keçirəcək

YARAT Müasir İncəsənət Məkanı iyulun 8-də Gəncədə rəssam və fotoqrafların əsərlərindən ibarət “Dumanlar başımda dastana döndü” adlı qrup sərgisini təqdim edəcək. 2020-ci il Vətən müharibəsi dövründə Gəncə şəhəri Ermənistan silahlı qüvvələrinin dinc əhaliyə qarşı hücumlarının əsas hədəflərindən biri olub.

Sərgi Azərbaycanın Vətən müharibəsində tarixi Zəfərinə, ümumilikdə Qarabağ münaqişəsinə, eləcə də erməni silahlı qüvvələrinin müharibə cinayətlərinə həsr olunub.

“Dumanlar başımda dastana döndü” adlı qrup sərgisi Qarabağ münaqişəsini təsir və nəticələr aspektindən açıqlayır. Sərgi müharibə təfərrüatlarının və siyasi münaqişələrin travmatik yaddaşını gündəmə gətirir. Ekspozisiya müharibədən qabaqkı “nə sülh – nə hərb” illərinə səslənərək, regionun ən həssas probleminə köklənir və bu mürəkkəb səyahətin gedişatını əks etdirir. Bununla yanaşı, tarixi analiz edərək, onun qərəzli dövr və epizodlarının qiymətləndirilməsi, cəmiyyət və mədəniyyətin uğradığı deformasiya və zədələrin sənədləşdirilməsinə əsaslanır və xalqın bu çətin dövrlərinin müşahidəçisi qismində çıxış edir. Hərbi münaqişələrin nəticələri və siyasi böhranlarla yaxından bələd olanların simasında toplanılan əsərlər milli konteksti araşdırır və universal, fövqəlmilli səciyyə kəsb edən sualları ortaya çıxarır.

Sərgi həm şəxsi, həm də ümumi yanaşma prizmalarından keçərək, Qarabağ məsələsində yeni mərhələnin gəlib çatmasından bəhs edir. Bəşər tarixi üçün çox qısa, lakin lokal kontekstdə uzun işğal dövrü kimi tarixdə qalan otuz ilə yaxın müddət, müxtəlif nəsillərin üzləşdiyi fərqli siyasi durum və sosial reallıqları əks etdirir. Bu reallıqlar arasında kəsişən paralellərin olmadığını nəzərə çatdıraraq, nümayiş olunan əsərlər Qələbəyə aparan yollardan danışır.

Sərginin adı Vətən müharibəsində şəhid olmuş gizir Xudayar Yusifzadənin özünəməxsus ifasında səslənən və onun adı ilə əbədiləşən, görkəmli xanəndə Əlibaba Məmmədovun qəzəlxan Əliağa Vahidin sözlərinə yazdığı “Vətən yaxşıdır” təsnifindən götürülüb. Bu mahnı, həmçinin sərgidə nümayiş olunan Rəşad Ələkbərovun instalyasiyasının tərkib hissəsidir.

Ağababa Bağırov, Elnur Babayev, İlqar Cəfərov, Şahvələd Eyvazov, Erkin Ələkbərli, Rəşad Ələkbərov, Xalid Əsgərov, Mirnaib Həsənoğlu, Əli Qafarov, Cavid Qurbanov, Oleq Litvin, Əli Rza və Nurəhməd Vəliyev kimi rəssam və fotoqrafların instalyasiya, fotoqrafiya və rəqəmsal sənət əsərləri ilə dialoqa girərək, artıq həll olunmuş Qarabağ münaqişəsinin mürəkkəb pazlını tamamlayır. Ekspozisiyaya YARAT Müasir İncəsənət Məkanı və Azərbaycan Fotoqraflar Birliyinin fondlarında saxlanılan əsərlər və fotomateriallar daxil edilib.

Səyyar sərgi əsasında yerli mütəxəssislər tərəfindən təhsil proqramlarının həyata keçirilməsi də nəzərdə tutulub. Proqram çərçivəsində iştirakçılar müasir incəsənət sahəsində rəqəmsal dünya və virtual reallıq mövzularını araşdıracaq, həmçinin incəsənətdə müxtəlif ünsiyyət kanalları mövzusuna dair seminarlarda iştirak edəcəklər.

Sərgi Azərbaycan Respublikası Mədəniyyət Nazirliyi və “Məhsəti Gəncəvi” Mərkəzinin təşkilati dəstəyi ilə həyata keçirilir.

“Dumanlar başımda dastana döndü” qrup sərgisi Gəncədəki “Məhsəti Gəncəvi” Mərkəzində iyulun 8-dən sentyabrın 25-dək davam edəcək.

Mədəniyyət.- 2021.- 7 iyul. S. 3.