Şeir də var, sənət də vardır...

 

Gürcüstanda Azərbaycan mədəniyyəti rüzgarı – Nizamidən Aşıq Kamandaradək

 

Xəbər verdiyimiz kimi, mədəniyyət naziri Anar Kərimovun rəhbərlik etdiyi nümayəndə heyəti Gürcüstana səfərə gedib. İyulun 6-da başlanan səfərin proqramına rəsmi görüşlərlə yanaşı, Gürcüstanın mədəniyyət müəssisələri, eləcə də bu ölkədəki Azərbaycanla bağlı mədəniyyət ocaqları ilə tanışlıq, müxtəlif tədbir və təqdimatlar da daxildir.

 

İyulun 8-də Tbilisidəki M.F.Axundzadə adına Azərbaycan Mədəniyyəti Muzeyində dahi Azərbaycan şairi Nizami Gəncəvinin anadan olmasının 880 illiyinə həsr olunmuş rəsm sərgisi açılıb. Azərbaycanın mədəniyyət naziri Anar Kərimov, Gürcüstanın mədəniyyət, gənclər və idman nazirinin birinci müavini Kaxa Sixarelidze, Azərbaycan səfirliyinin əməkdaşları, nümayəndə heyətinin üzvləri sərgi ilə tanış olublar.

 

Sərgidə azərbaycanlı və gürcü rəssamların Nizami irsinə həsr olunmuş miniatür və rəsm əsərləri nümayiş etdirilir.

 

Nazir Anar Kərimov tədbirdə çıxış edərək Azərbaycan Prezidentinin 2021-ci ili “Nizami Gəncəvi İli” elan etməsinin əhəmiyyətindən danışıb. Vurğulayıb ki, bu kimi qərarlar  Azərbaycan mədəniyyətinin, ədəbiyyatının, incəsənətinin inkişafında xidmətləri olmuş görkəmli şəxslərin irsinə dövlət tərəfindən göstərilən diqqətin bariz nümunəsidir. Nazir qonşu Gürcüstanda bu cür sərgilərin açılmasının mədəni əlaqələrimizin inkişafına xidmət etdiyini bildirib.

 

 

Kaxa Sixarelidze: “Nizaminin fikirləri elm mənbəyidir”

 

 Gürcüstanın mədəniyyət, gənclər və idman nazirinin birinci müavini Kaxa Sixarelidze dahi söz ustadı, mütəfəkkir şair Nizami Gəncəviyə həsr olunmuş sərgini yüksək qiymətləndirib. Bildirib ki, N.Gəncəvinin əsərlərinə Gürcüstanda da böyük maraq var. Onun fəlsəfi fikirləri bu gün də sevilir və gələcək nəsillər üçün bilik, elm mənbəyi olacaq.

 

“Nizami Gəncəvi özündən sonrakı nəsillərə faydalı əsərlər bəxş edən hərtərəfli dahidir. Onun dahiliyi, ilk növbədə, Azərbaycan xalqına məxsusdur, lakin gürcü xalqı da onunla qürur duyur. Nizami bütün Qafqazın dahi şəxsiyyətidir”, – deyə nazir müavini vurğulayıb.

 

Tədbirdə Nizami Gəncəvinin 880 illik yubileyi ilə əlaqədar Azərbaycanın Gürcüstandakı Səfirliyinin elan etdiyi rəsm müsabiqəsi qaliblərinə diplom və hədiyyələr təqdim olunub.

 

Gürcüstanın Kançeli adına simli kvarteti konsert proqramı ilə çıxış edib. Üzeyir Hacıbəylinin və digər bəstəkarların Nizaminin şeirlərinə bəstələdikləri əsərlər səslənib.

 

 Gürcüstanda yaşayan soydaşlarımızla görüş

 

 M.F.Axundzadə adına Azərbaycan Mədəniyyəti Muzeyində Nizami irsinə həsr olunmuş sərgi ilə tanışlıqdan sonra  mədəniyyət naziri Anar Kərimov Gürcüstanda yaşayan soydaşlarımızla görüşüb.

 

Görüşdə Azərbaycanın Gürcüstandakı səfiri Faiq Quliyev, “SOCAR Energy Georgia” şirkətinin baş direktoru Mahir Məmmədov, ziyalılar iştirak ediblər.

 

Səfir Faiq Quliyev çıxış edərək bildirib ki, Azərbaycan dövləti daim Gürcüstanda yaşayan soydaşlarımıza diqqət və qayğı göstərib. Azərbaycanın dövlət və hökumət rəsmilərinin Gürcüstana mütəmadi səfərləri, o cümlədən nazir Anar Kərimovun bu səfəri, keçirilən görüşlərdə müzakirə olunan məsələlər buna əyani sübutdur.

 

Səfir Gürcüstanda yaşayan soydaşlarımızın Azərbaycan dövlətinə dəstəyini də qeyd edib. Onların 44 günlük Vətən müharibəsində göstərdikləri maddi-mənəvi dəstəyi, ortaya qoyduqları qəhrəmanlıqları xüsusi vurğulayıb.

 

Sonra nazir Anar Kərimov çıxış edərək xarici ölkələrdə yaşayan soydaşlarımızın Azərbaycan həqiqətlərinin dünyaya çatdırılmasında rolunu xüsusi vurğulayıb, Gürcüstanda yaşayan azərbaycanlıların da bu istiqamətdə gördüyü işləri yüksək qiymətləndirib. Bildirib ki, Gürcüstanda yaşayan, yazıb-yaradan soydaşlarımız ölkələrimiz arasında mədəni əlaqələrin genişlənməsinə və möhkəmləndirilməsinə də töhfə verirlər.

 

Nazir  deyib: “Azərbaycanın Vətən müharibəsində əldə etdiyi Qələbədən sonra yeni dönəm başlayıb. Zəfər qazanmışıq, lakin beynəlxalq aləmdə təbliğat mübarizəsi davam edir. Qalib xalqın mədəniyyətinin tanıdılması prosesində dünyanın müxtəlif ölkələrində yaşayan hər bir azərbaycanlı rol oynamalı, öz töhfəsini verməlidir”.

 

Görüşdə Tbilisidəki M.F.Axundzadə adına Azərbaycan Mədəniyyəti Muzeyinin direktoru Leyla Əliyeva, ziyalılardan Fatma Əliyeva, Ceyran Qurbanova, Mahmud Kamaloğlu, Şahismayıl Məmmədov, Çingizxan Yaqubov və başqaları çıxış edərək görüşün təşkilinə görə minnətdarlıq ediblər, Borçalı xalçaçılığı, milli rəqslər, muğam sənətinin yaşadılması və digər məsələlərlə bağlı fikir və təkliflərini bildiriblər.

 

Anar Kərimov qeyd edib ki, gələcəkdə Gürcüstanda Azərbaycan incəsənəti məktəbi yaradıla bilər. Azərbaycan rəqsləri, xalçaçılıq, muğam dərslərinin tədris olunacağı təhsil ocağı Gürcüstan hökuməti ilə birgə əməkdaşlıqla təsis oluna bilər.

 

Qaldırılan digər məsələ ana dilində bədii kitabların çatışmazlığı ilə bağlı olub. Nazir qeyd edib ki, hər il Azərbaycanda dövlət sifarişi əsasında nəşr olunan kitabların bir qisminin Gürcüstana göndərilməsi məsələsi nəzərdən keçiriləcək. Bunun üçün bu ölkədəki kitabxanalarla bağlı təhlil aparılmalıdır. Gürcüstanda azərbaycanlıların yığcam yaşadıqları bölgədə Azərbaycan Kitab Evinin yaradılması imkanları araşdırıla bilər.

 

Soydaşlarımızın Gürcüstan cəmiyyətinə inteqrasiyası barədə də fikir mübadiləsi aparılıb. Nazir deyib ki, soydaşlarımız gürcü dilini öyrənməli və Gürcüstan cəmiyyətinə inteqrasiya etməli, lakin ana dilini unutmamalıdırlar.

 

Anar Kərimov Gürcüstanda yaşayıb-yaradan azərbaycanlı rəssamların Bakıda sərgisinin təşkili təklifinə də müsbət yanaşıb.

 

 Azərbaycanla bağlı mədəniyyət ocaqlarının qayğıları

 

 Gürcüstanda Azərbaycanla bağlı mədəniyyət ocaqlarının fəaliyyəti, onların qayğı və problemləri iyulun 7-də nazir Anar Kərimovun bu müəssisələrlə tanışlığı zamanı da gündəmdə olub.

 

Nazir görkəmli azərbaycanlı ədib Cəlil Məmmədquluzadənin Tbilisidə ev-muzeyini ziyarət edib, muzeyin hazırkı vəziyyəti ilə tanış olub.

 

Gürcüstanın Azərbaycanlı Ağsaqqallar Şurasının sədri İsak Novruzov nazirə məlumat verərək deyib ki, muzey 1998-ci ildən fəaliyyət göstərir. Muzeyin yerləşdiyi ikimərtəbəli binada 10  ailə yaşayır.

 

Muzey binasının möhkəmləndirilməsi, bərpası, təmiri və bədii tərtibatı ilə bağlı müzakirələr aparılıb. Anar Kərimov muzeyin bərpası, eksponatların yenilənməsi məsələsinin diqqət mərkəzində saxlanılacağını bildirib.

 

Sonra Anar Kərimov görkəmli dövlət xadimi, ədib və həkim Nəriman Nərimanovun Tbilisidəki ev-muzeyində olub.  Nazirə muzeyin fəaliyyəti barədə ətraflı məlumat verilib.

 

Mədəniyyət nazirinin rəhbərlik etdiyi nümayəndə heyəti Tbilisidəki Botanika bağında görkəmli azərbaycanlıların dəfn olunduğu panteonu ziyarət edib.

 

Azərbaycan Xalq Cümhuriyyətinin qurucuları – Fətəli xan Xoyski, Həsən bəy Ağayev, böyük ədiblər Mirzə Fətəli Axundzadə və Mirzə Şəfi Vazehin məzarları üzərinə gül dəstələri qoyulub.

 

 Tbilisidəki Azərbaycan teatrı üçün yeni bina inşa ediləcək

 

 Mədəniyyət naziri Anar Kərimov Tbilisidəki Heydər Əliyev adına Tbilisi Dövlət Peşəkar Azərbaycan Dram Teatrına da baş çəkib. Nazir mədəniyyət ocağının yerləşdiyi bina ilə tanış olub.

 

Anar Kərimov teatrın səhnələrinə, rekvizitlərin saxlanıldığı otaqlara baxış keçirib, truppa üzvləri ilə görüşüb.

 

Bədii rəhbər kollektivin il ərzində 3-4 tamaşa səhnələşdirdiyini, beynəlxalq teatr festivallarına qatıldıqlarını, mədəniyyət ocağına teatr sənətinə həvəsi olan azərbaycanlı gənclərin cəlb olunduğunu qeyd edib.

 

Qonaqlara teatrın kiçik səhnəsində Əziz Nesinin “Öldür məni, sevgilim” əsəri əsasında hazırlanmaqda olan tamaşadan bir hissə təqdim olunub.

 

Nümayəndə heyəti daha sonra Azərbaycanın Gürcüstandakı Səfirliyinin binası yaxınlığında, Qorqosali küçəsində Azərbaycan teatrı üçün yeni binanın inşa olunacağı əraziyə baş çəkib.

 

Nazir “SOCAR Energy Georgia” şirkətinin dəstəyi ilə hazırlanan yeni tikilinin layihəsi ilə tanış olub. Məlumat verilib ki, inşaat işləri zamanı ərazidə yerləşən köhnə hamam binası da tarixi görkəminə uyğun bərpa olunacaq və məkanda sərgi zalları yaradılacaq.

 

Daha sonra nazir Anar Kərimov və səfir Faiq Quliyev Azərbaycanın dahi müğənnisi, SSRİ Xalq artisti Bülbülün büstünü ziyarət edib, önünə gül dəstələri düzüblər.

 

***

Səfər çərçivəsində mədəniyyət naziri Anar Kərimov iyulun 7-də Gürcüstan Milli Muzeyində olub.

 

Muzeyin baş direktoru David Lordkipanidze muzeyin tarixi, burada saxlanılan eksponatlar barədə Azərbaycanın mədəniyyət nazirinə ətraflı məlumat verib.

 

Bildirilib ki, ilk dəfə 1853-ci ildə “Qafqaz Muzeyi” kimi fəaliyyət göstərən muzeydə xeyli sayda eksponat saxlanılır.  1905-ci ildə tikintisinə başlanılan müasir muzey kompleksinin tikintisi xeyli müddət müxtəlif səbəblərdən dayandırılıb. 1926-cı ildə tikintisi başa çatan Gürcüstan Milli Muzeyinin nəzdində 14 muzey kompleksi fəaliyyət göstərir. Muzeydə Azərbaycan mədəniyyətini, incəsənətini əks etdirən eksponatlar da nümayiş etdirilir.

 

Nazir Anar Kərimov muzeylə tanış olub, Azərbaycan və Gürcüstanın dövlət və milli muzeyləri arasında əməkdaşlıq əlaqələrinin genişləndirilməsinin vacibliyini qeyd edib. Bildirib ki, birgə əməkdaşlıq sayəsində qədim Qafqaz xalqlarının mədəniyyətini, incəsənətini dünyaya çatdırmaq olar.

 

Görüşlərdə Anar Kərimovu Gürcüstanın mədəniyyət, gənclər və idman nazirinin birinci müavini Kaxa Sixarulidze, Azərbaycanın Gürcüstandakı səfiri Faiq Quliyev və “SOCAR Energy Georgia” şirkətinin baş direktoru Mahir Məmmədov müşayiət ediblər.

 

 Aşıq Kamandarın Ev-Muzeyi əsaslı təmir olunub

 

 İyulun 8-də Gürcüstanın Marneuli rayonunun Kəpənəkçi kəndində Borçalı aşıq məktəbinin görkəmli nümayəndəsi Aşıq Kamandarın (Kamandar Əfəndiyev) Ev-Muzeyinin əsaslı təmir və bərpadan sonra açılışı olub.

 

Mərasimdə mədəniyyət naziri Anar Kərimov, Gürcüstanın mədəniyyət, gənclər və idman nazirinin birinci müavini Kaxa Sixarulidze, restavrasiya layihəsini həyata keçirmiş Türk Əməkdaşlıq və Koordinasiya Agentliyinin (TİKA) rəhbəri Serkan Kayalar, Azərbaycanın Gürcüstandakı səfiri Faiq Quliyev, Türkiyənin Gürcüstandakı səfiri Fatma Ceren Yazqan, Gürcüstan Parlamentinin azərbaycanlı deputatları iştirak ediblər.

 

Tədbirdə çıxış edən Anar Kərimov deyib: “Simvolikdir ki, qardaş Türkiyə ilə birgə Gürcüstanda Azərbaycan mədəniyyətinə aid ocağın açılışında iştirak edirik. Tarixin bütün dövrlərində azərbaycanlılar, türklər və gürcülər dostluq şəraitində yaşayıblar və bir-birinin mədəniyyətlərinə böyük hörmət bəsləyiblər”.

 

Mərasimin fəxri qonaqları “Aşıq Kamandar” medalı ilə təltif olunublar.

 

Daha sonra yerli aşıqların ifaları dinlənilib.

 

 Bolnisi Muzeyi ilə tanışlıq

 

Mədəniyyət naziri Anar Kərimov Gürcüstana səfəri çərçivəsində azərbaycanlıların yığcam yaşadıqları Kvemo Kartli-Borçalı bölgəsinin Bolnisi rayonunda da olub. Nazir  Bolnisi Muzeyini ziyarət edib.

 

Gürcüstan Milli Muzeyinin direktoru David Lordkipanidze muzeyin tarixi, müxtəlif millətlərin milli mədəniyyət nümunələrinin qorunduğu bölmələr barədə nazirə ətraflı məlumat verib.

 

Muzeyi gəzərək eksponatlarla tanış olan nazir Anar Kərimov Azərbaycanın milli mədəniyyət nümunələrinin saxlanıldığı guşəyə də baxıb.

 

Mədəniyyət.- 2021.- 9 iyul. C. 1; 2.