Dünya İrs Komitəsinin 44-cü sessiyası onlayn rejimdə keçiriləcək

İyulun 16-da Çin Xalq Respublikasının Fuçjou (Fuzhou) şəhərində UNESCO-nun Dünya İrs Komitəsinin 44-cü sessiyası işə başlayır. İyulun 31-dək davam edəcək sessiya onlayn rejimdə keçiriləcək.

Xatırladaq ki, Dünya İrs Komitəsinin növbəti (illik) sessiyasına Çinin ev sahibliyi etməsi barədə qərar 2019-cu ildə komitənin Bakıda keçirilən 43-cü sessiyasında qəbul edilmişdi. Lakin 2020-ci ildə pandemiya buna imkan vermədi. Bununla belə, bir il ertələnmədən sonra da sessiya onlayn formatda reallaşacaq.

Sessiyanın gündəliyinə ötən ildən yığılıb qalan məsələlər də daxil edilib. O cümlədən Dünya İrsi Siyahısına 2020 və 2021-ci illər üzrə irəli sürülmüş nominasiyalara birlikdə baxılacaq. Ümumilikdə 42 nominasiya nəzərdən keçiriləcək ki, bunun da 24-ü 2020-ci ildən qalıb. Təqdim olunan nominasiyalardan 35-i mədəniyyət, 6-sı təbiət, 1-i qarışıq (mədəniyyət və təbiət) irs nümunəsidir. Onların arasında Türkiyənin Malatya bölgəsindəki Arslantəpə qədim şəhər yeri, Trans-İran dəmiryolu və Hawraman/Uramanat mədəniyyət landşaftı (hər ikisi İran), Oneqa gölü və Ağ dəniz petroqlifləri (Rusiya), Kolxida tropik meşələri və su-bataqlıq əraziləri (Gürcüstan) kimi nominasiyalar var.

Mədəniyyət.- 2021.- 16 iyul. S. 1.