Şəhidliyin uca zirvəsində

Vətənini ürəkdən sevən, onun yolunda şirin canından keçən mərd oğullardan biriOrxan Mübariz oğlu Dənziyevdir. Lerik rayonunun Laman kəndindən olan bu dağ vüqarlı igid ulu yurd yerimiz Qarabağ uğrunda gedən haqq savaşımızda şəhid olanda ömrünün 19-cu ilini yaşayırdı...

 

Orxan yetkinlik yaşına çatanda ürəyində Vətənə, millətə sevgi hissi boy vermişdi. 2020-ci ildə Milli Ordu sıralarına yola düşəndə də amalı sinəsini yanar od edib, təcavüzkar erməni dığaların bağrını çatlatmaq idi. Əsgərlik həyatı ön cəbhədən başlanmışdı. Çox keçmir, nümunəvi xidməti, hərbi təlimlər zamanı igidliyi onu əsgər yoldaşlarının, komandirlərin sevimlisinə çevirir.

 

Artıq üç ay idi əsgər Orxan Dənziyev Vətən qarşısında övladlıq borcunu ləyaqətlə, vicdanla yerinə yetirirdi. İkinci Qarabağ müharibəsi başlanır. O da əsgər yoldaşları ilə hərb meydanına girirotuz ilə yaxın Vətən torpaqlarını əsarətdə saxlayan düşməndən qisasını alacağına and içir. Ağdərə-Tərtər istiqamətində qəhrəmancasına döyüşür, Vətən torpağının hər qarışı uğrunda can qoyur. 2020-ci ilin 15 oktyabrında qəfil atılan yağı gülləsinin qurbanı olur.

 

Gənc yaşında özünü Vətəninə fəda edən Orxan Dənziyev ucaldığı şəhidlik zirvəsində adını qəhrəmanlıq tariximizə yazdı. Ölümündən sonra layiq görüldüyü Vətən uğrunda medalı onun göstərdiyi şücaətə dövlətimiz tərəfindən verilən qiymətdir.

 

Lənkəran Regional Mədəniyyət İdarəsinin Lerik rayonu üzrə baş məsləhətçisi, şəhidin qohumu Müqəddəs Dənziyev deyir: Orxan Vətəninə, xalqına, torpağına layiqli övlad kimi böyümüşdü. Məhz buna görə də ömrünü Vətəni üçün yaşamağı bacardı. İndi o, təkcə ailəsinin, Dənziyevlərin deyil, bütün Azərbaycan xalqının oğludur. Biz Vətənin qürurunu hər şeydən üstün tutan, onun yolunda canından keçən Orxanla fəxr edirik.

 

Zəfər ORUCOĞLU

Azərbaycan Jurnalistlər Birliyinin üzvü

 

Mədəniyyət.- 2021.- 30 iyul.- S.6.