Dadlı, təmiz və sosial ədalətə əsaslanan sağlam qidalanma

Ölkəmiz slou fud üzrə yeni destinasiya kimi təqdim edilib

Martın 6-da onlayn şəkildə baş tutan “Slow Food Travel” forumunda Azərbaycan slou fud üzrə yeni destinasiya kimi təqdim edilib.

Dövlət Turizm Agentliyindən bildirilib ki, “Slow Food” təşkilatının “Terra Madre” şəbəkəsi tərəfindən təşkil olunan görüşdə Azərbaycan Turizm Bürosunun baş icraçı direktoru Florian Zenqstşmid də iştirak edib.

Florian Zenqstşmid forum iştirakçılarına Azərbaycanda slou fud layihəsinin keçirilməsi ideyasının ərsəyə gəlməsindən və ölkədə bu istiqamət üzrə mövcud imkanlardan danışıb. Baş icraçı direktor slou fud layihəsi üzrə səyahət imkanlarının təbliğ edilməsində əsas məqsədin ilin istənilən vaxtı ölkəyə səfər edən turistlərə Azərbaycan mətbəxinin özünəməxsus dadı və keyfiyyəti ilə fərqlənən yeməklərini təqdim etmək, süfrəyə gətirilən təamların hansı mərhələlərdən keçdiyini göstərmək olduğunu bildirib.

“COVCHEG” layihəsi haqda da məlumat verən Florian Zenqstşmid bu layihənin ölkədə yetişdirilən qida məhsullarının əsl dəyərinin təbliğ edilməsi, bioloji müxtəlifliyin qorunub saxlanılması, eləcə də kiçik və ortamiqyaslı qida istehsalçıları üçün əlavə gəlir mənbəyinin yaradılmasına xidmət etdiyini deyib.

Baş icraçı direktor pandemiyanın yaratdığı vəziyyətin yerli sakinlərin öz yerli mədəniyyət, mətbəx, səyahət imkanlarını yenidən dəyərləndirə bilmələri üçün bir növ fürsət olduğunu vurğulayıb.

Forumda “Slow Food Travel”in direktoru Mişel Rumiz, “COVCHEG” layihəsinin koordinatoru Anna Kaşinyova, Azərbaycanda layihə üzrə slou fud səyahət koordinatoru Nəsimi Sadıqzadə və başqaları çıxış edib.

Qeyd edək ki, “COVCHEG” layihəsi Avropa İttifaqının maliyyə dəstəyi ilə həyata keçirilir. Layihə Azərbaycan kəndlərində icma əsaslı təşəbbüsləri və ənənəvi məşğulluğu dəstəkləmək üçün ərsəyə gətirilib.

Slou fud dadlı, təmiz və sosial ədalətlilik prinsiplərinə əsaslanan daha sağlam qidalanmanı təmin edən, milli və regional mətbəxlərin ənənələrini qoruyub saxlayan bir yanaşmadır.

Mədəniyyət.- 2021.- 10 mart.- S.2.