Beynəlxalq simpozium keçirilib

Türkdilli dövlətlərin müstəqilliyinin 30-cu ildönümü və Türkiyənin Dövlət Himni – İstiqlal Marşının 100 illiyinə həsr olunmuş “Türk dünyasının dünəni, bu günü və gələcəyi “ adlı simpozium keçirilib.

Qırğız-Türk Manas Universiteti və Türkdilli Ölkələrin Parlament Assambleyası (TÜRKPA) tərəfindən martın 17-də Bişkekdə təşkil edilən simpozium eyni zamanda onlayn formatda yayımlanıb.

Beynəlxalq Türk Mədəniyyəti və İrsi Fondunun prezidenti Günay Əfəndiyeva tədbirə videoformat vasitəsilə qatılıb. O, tədbirin əhəmiyyətindən bəhs edib, beynəlxalq türkdilli əməkdaşlıq təşkilatlarının türk dünyasının həmrəyliyinin bariz nümunəsi olduğunu bildirib. Günay Əfəndiyeva türkdilli xalqların tarixinin, mədəniyyətinin araşdırılması, qorunması və təbliği istiqamətində fəaliyyət göstərən Beynəlxalq Türk Mədəniyyəti və İrsi Fondunun həyata keçirdiyi layihələrdən söz açaraq, birgə işlərin görülməsinin vacibliyini qeyd edib.

Konfransda türkdilli ölkələr arasında mədəni əlaqələrin daha da inkişaf etdirilməsi ilə bağlı fikir mübadiləsi aparılıb.

Mədəniyyət.- 2021.- 19 mart.- S.4.