Kitablarımız Moskva yarmarkasında
maraq doğurub
Xəbər verdiyimiz kimi, ölkəmiz 24-27 sentyabr
2021-ci il tarixində Rusiya paytaxtındakı Ekspo Mərkəzində keçirilən
34-cü Moskva Beynəlxalq
Kitab Yarmarkasında təmsil olunub. Tədbirdə Mədəniyyət Nazirliyi Kitab sənayesi şöbəsinin
müdiri Akif Marifli, əməkdaşlar
İslam Hüseynov və Kamran Musayev iştirak ediblər.
Yarmarkada Azərbaycan mədəniyyəti,
ədəbiyyatı, incəsənəti,
tarixi ilə bağlı Milli Kitabxananın hədiyyə
fondunda saxlanılan və ölkənin qabaqcıl nəşriyyatlarından
əldə olunan Azərbaycan, rus və ingilis dillərində 200 adda kitablar sərgilənib.
Azərbaycan stendinin ziyarətçilərinə
tariximiz, Qarabağ həqiqətləri, Vətən
müharibəsində şanlı
Qələbəmiz, mədəniyyətimiz
haqqında ətraflı
məlumat verilib və bəzi kitablar hədiyyə edilib. Eyni zamanda ziyarətçilərə
2021-ci ilin ölkəmizdə
“Nizami Gəncəvi İli” elan edilməsi haqqında məlumat verilib. Gənc oxucular yarmarkada Nizami haqqında nəşrlərə böyük
maraq göstəriblər.
Rusiya Milli Kitabxanasının, Elmlər Akademiyasının
bəzi institutlarının,
bir sıra ali təhsil
müəssisələrinin və digər dövlət qurumlarının
nümayəndələri Azərbaycan
stendində sərgilənən
kitablarla yaxından tanış olublar.
Xalq yazıçısı
Anar və Azərbaycanın Rusiya Federasiyasındakı Səfirliyinin
nümayəndəsi Nigar
Axundova stendimizi ziyarət ediblər.
Mədəniyyət.- 2021.- 1
oktyabr.- S.2.