“Euronews”da Lahıc haqqında reportaj

“Euronews” televiziyası Azərbaycanın İsmayıllı rayonunun qədim Lahıc qəsəbəsi haqqında növbəti reportaj hazırlayıb.

Lahıcı sənətkarlar şəhəri kimi təqdim edən reportajda qəsəbədəki çay daşlarından tikilən bənzərsiz evlər, sənətkarlıq emalatxanaları, dəri emalı sexləri, bir neçə əsr yaşı olan xalçalardan bəhs edilir. Verilişdə Lahıcın misgərlik sənəti ilə də məşhur olduğu vurğulanır, yerli misgərlərlə söhbətlər təqdim edilir.

“Bu emalatxananın 300 yaşı var. 1725-ci ildə açılıb və hələ də fəaliyyətdədir. İndi 50 yaşım var. Övladlarım burada çalışan səkkizinci nəsildir. Bu sənət güc, dözüm və səbir tələb edən çətin bir işdir”, – deyə misgər Kəbleyi Əliyev bildirib.

Bundan başqa, verilişdə qeyd edilib ki, Lahıcda hazırlanan mis qablar Luvr da daxil olmaqla dünyanın məşhur muzeylərində sərgilənir.

Lahıc Tarix-Diyarşünaslıq Muzeyinin direktoru Kamal Əliyev bildirib ki, Lahıcda mis emalının tarixi bir neçə əsr öncəyə gedib çıxır. Arxeoloqlar Orta əsrlərdə ölkənin müxtəlif yerlərində Lahıcda zərb olunmuş mis sikkələr tapıblar.

Reportajda o da vurğulanıb ki, 2015-ci ildə Lahıcın misgərlik sənəti UNESCO-nun Qeyri-maddi mədəni irs siyahısına daxil edilib.

Mədəniyyət.- 2021.- 13 oktyabr.- S.8.