Çindəki “Qədim məskənlər”də “Azərbaycan mədəniyyətinə pəncərə”

 

Çin Xalq Respublikasının Benbu şəhərindəki “Qədim məskənlər” mədəniyyət parkında Heydər Əliyev Fondu tərəfindən yaradılan “Azərbaycan mədəniyyətinə pəncərə” adlı pavilyon fəaliyyətə başlayıb.

 

Parkda məhdud sayda xarici milli pavilyonlardan birinci fəaliyyətə başlayanı Azərbaycan pavilyonudur. Pavilyonda Azərbaycanın müxtəlif xalçaçılıq məktəblərini təmsil edən xalça və kilimlər, misgərlik, dekorativ yaradıcılıq və şəbəkə sənəti nümunələri, bəzək əşyaları, milli geyimlər, musiqi alətləri, ölkəmizin mədəniyyətinə, tarixinə, müasir inkişafına dair nəşrlər nümayiş olunur. Nizami Gəncəvinin büstü, “Xarıbülbül”, “Qız qalası” və “Ceyranlar” silsiləsindən heykəltəraşlıq əsərləri, Qobustan qaya rəsmlərinin imitasiyası da ekspozisiyada yer alıb.

 

“I love Baku” stendində isə Azərbaycana aid suvenirlər təqdim edilir. Pavilyonda quraşdırılmış monitorlarda isə mədəniyyətimizə, ölkəmizin tarixi müasir memarlığına, Azərbaycanda keçirilən nüfuzlu beynəlxalq tədbirlərə aid videoçarxlar nümayiş olunur.

 

Əldə olunmuş razılığa əsasən, pavilyon uzunmüddətli əsasda fəaliyyət göstərəcək Çinin ən iri turizm layihələrindən olanQədim məskənlərmədəniyyət parkını hər il ziyarət edəcək milyonlarla qonaq Azərbaycan mədəniyyəti haqqında məlumat əldə edə biləcək.

 

Oktyabrın 11-də Çin Xalq Nümayəndələr Yığıncağı Daimi Komitəsinin (parlament) sədr müavini, Çin Kommunist Partiyası Mərkəzi Komitəsi Siyasi Bürosunun üzvü Van Çen, Anhuy vilayətinin Benbu şəhərinin rəhbər şəxsləri, Çindəki diplomatik korpusun təmsilçiləri Azərbaycan pavilyonunda olublar.

 

Qeyd edək ki, Benbu şəhərindəki Lonci gölünün ətrafında salınmışQədim məskənlərmədəniyyət parkı 333 hektar sahəni əhatə edən iri mədəniyyət layihəsidir. Ərazidə Çin tarixində mədəniyyətində xüsusi yer tutan məbədlərin oxşarı da daxil olmaqla, ənənəvi Çin memarlığı üslubunda 450 bina inşa edilib. Parkdakı pavilyonlarda Çin mədəniyyətinə, müxtəlif bölgələrinə, tarixi şəxsiyyətlərinə həsr olunan pavilyonlarla yanaşı, müxtəlif xalqların mədəniyyəti təqdim ediləcək.

 

 

Mədəniyyət.- 2021.- 13 oktyabr.- S.8.