Azərbaycan filmi “Asia Pacific Screen Awards”ın nominantları sırasında
14-cü
“Asiya və Sakit Okean Ölkələri
Ekran Mükafatları”na (Asia Pacific Screen Awards) namizədlər
elan olunub. 25 ölkədən 38 filmin nominant olduğu mükafatların
qalibləri noyabrın
14-də Avstraliyada keçiriləcək
tədbirdə açıqlanacaq.
C.Cabbarlı adına “Azərbaycanfilm” Kinostudiyasından
bildirilib ki, İlqar Nəcəfin “Suğra və oğulları” filmi “ən yaxşı ssenari” nominasiyasına namizəddir.
Film İkinci Dünya
müharibəsi zamanı
ucqar dağ kəndində baş verən hadisələrdən
bəhs edir. Kəndin kişiləri
müharibəyə gediblər.
Suğra
da kəndin digər qadınları kimi ağır məişət işləri
görür, övladlarını
böyüdür. Suğranın böyük oğlu Musanı cəbhəyə
çağırırlar. Bu xəbərdən sonra Suğranın həyatında
dramatik dönüş
başlanır...
Filmin çəkilişləri
2019-cu ilin noyabr-dekabr aylarında Daşkəsən
rayonunun Suqovuşan kəndində aparılıb. Ekran əsərinin baş prodüseri İlqar Nəcəf, prodüserləri
Orman Əliyev və Ayhan Salar,
rejissoru İlqar Nəcəf, ssenari müəllifləri Asif Rüstəmov, Roelof Jan Minneboo və İlqar Nəcəfdir. Əsas rolları Günəş
Mehdizadə, İlqar Cahangir, Hümbət Əhmədzadə və Paşa Məmmədli ifa edirlər. Filmin təsvir rejissoru Ayhan Salardır.
“Butafilm”, Bakı Media Mərkəzi, “Arizona Production” (Fransa) və “Salarfilm”in (Almaniya) birgə istehsalı olan “Suğra və oğulları” bədii filmi hazırda Cənubi Koreyada A kateqoriyalı Busan Beynəlxalq Film Festivalının müsabiqə
bölməsində iştirak
edir.
Xatırladaq ki, rejissor İlqar Nəcəfin “Buta” filmi 2011-ci ildə “Asia Pacific Screen Awards”ın
“ən yaxşı uşaq bədii filmi”
nominasiyasında mükafat qazanıb.
Mədəniyyət.- 2021.- 15
oktyabr.- S.8.