Tar, kamança və qaval Dünya Musiqi Alətləri Muzeyində

Tokioda Paralimpiya Oyunları zamanı Yaponiyanın Hamamatsu şəhərinə səfər edən Azərbaycan Milli Paralimpiya Komitəsinin əməkdaşları buradakı Dünya Musiqi Alətləri Muzeyinə Heydər Əliyev Fondunun hədiyyəsi olan tar, kamança və qaval təqdim ediblər.

Mərasimdə ölkəmizin Yaponiyadakı səfirliyinin birinci katibi Rövşən Cəfərov, Milli Paralimpiya Komitəsinin əməkdaşı Rüfət Hacılı, Azərbaycan-Yaponiya Dostluq Mərkəzinin sədri Xəlil Kələntər iştirak ediblər.

Əvvəlcə qonaqlara muzey haqqında ətraflı məlumat verilib. Qeyd olunub ki, muzey 1995-ci ildə təsis edilib. Məqsəd burada toplanan dünya xalqlarının qədim və müasir musiqi alətləri vasitəsilə ziyarətçilərdə ayrı-ayrı xalqların musiqi mədəniyyəti barədə təsəvvür yaratmaqdır. Muzeyin yaradılmasına dünyaca məşhur “Yamaha” pianinolarının Hamamatsu şəhərində istehsalı da mühüm təsir göstərib. Bildirilib ki, muzeydə toplanmış çoxsaylı alətlər dünyanın bir çox ölkələrindən gətirilib.

Sonra muzeyin direktoru Masayuki Tsurutanın iştirakı ilə Azərbaycan milli musiqi alətlərinin təqdim olunması mərasimi keçirilib. Bildirilib ki, Azərbaycan ilə Yaponiya arasında müxtəlif sahələrdə, həmçinin mədəniyyət sahəsində sıx əməkdaşlıq mövcuddur. Azərbaycanlı musiqiçilərin Yaponiyada, yapon musiqiçilərin isə ölkəmizdə konsertləri təşkil edilib. 2018-ci ildə TÜRKSOY-un 25 illiyi münasibətilə Yaponiyada təşkil edilən turne zamanı Hamamatsu muzeyində olan azərbaycanlı musiqiçi Babək Quliyev burada Azərbaycan milli musiqi alətlərinin olmamasından təəssüflənib və bunu Yaponiyadakı diaspor təşkilatımızın fəallarına bildirib. Məsələ 2020-ci ildə Azərbaycan Milli Paralimpiya Komitəsinin “Host town” proqramının təşkili ilə əlaqədar Tokioya gəlmiş nümayəndəsi Rüfət Hacılı ilə də müzakirə olunub.

Təşəbbüs Heydər Əliyev Fonduna çatdırıldıqdan sonra bəyənilib və milli musiqi alətlərimizin Hamamatsu Dünya Musiqi Alətləri Muzeyinə təqdim olunmasına dəstək verilməsi qərara alınıb.

Qeyd edilib ki, muzeyə təqdim edilən tar, kamança və qaval vasitəsilə ifa edilən muğam sənəti, eləcə də tar və kamança ifaçılığı sənətləri ayrı-ayrılıqda UNESCO-nun Qeyri-maddi mədəni irs siyahısına daxil edilib.

Tədbirdə çıxış edən R.Cəfərov Azərbaycanın Yaponiyadakı səfiri Gürsel İsmayılzadənin salamlarını çatdırıb, iki ölkə arasında dost münasibətlər barədə söz açıb, gələn il diplomatik əlaqələrin yaradılmasının 30 illiyinin qeyd ediləcəyini bildirib. O, Azərbaycan paralimpiyaçılarının uğurlarından bəhs edərək, idmançılarımızın 14 qızıl medal qazındığını vurğulayıb. G.İsmayılzadə Yaponiyanın Şika şəhərində “Host-town” proqramına qatılan paralimpiyaçılarımızın yarışlara yaxşı hazırlaşması üçün yaradılmış şəraiti də yüksək qiymətləndirib.

Diplomat Azərbaycan musiqi alətlərinin muzeyə Heydər Əliyev Fondu tərəfindən hədiyyə olunduğunu və bu missiyanın Azərbaycan paralimpiya yığmasının nümayəndələrinə həvalə edildiyini vurğulayıb.

Muzeyə təqdim edilən hədiyyələrə görə Heydər Əliyev Fonduna və Milli Paralimpiya Komitəsinə minnətdarlığını ifadə edən direktor Masayuki Tsuruta bu alətlər barədə həm yerli sakinlərə, həm də dünyanın hər yerindən Yaponiyaya gələn ziyarətçilərə ətraflı məlumat veriləcəyini bildirib.

Mədəniyyət.- 2021.- 8 sentyabr.- S.1;8.