“Tarix yazan igidlərimiz”

Bakı Şəhər Mədəniyyət Baş İdarəsi Yasamal rayon MKS-nin Mərkəzi Kitabxanası Vətən müharibəsi şəhidlərini geniş ictimaiyyətə tanıtmaq məqsədilə “Tarix yazan igidlərimiz” layihəsini davam etdirir.

Kitabxana tərəfindən hazırlanan növbəti videoçarx şəhid leytenant Nicat Atayevə həsr edilib. Videoçarxda şəhid haqqında ümumi informasiya, hərbi fəaliyyəti ilə bağlı fotolar və yaxınları tərəfindən təqdim olunmuş videolentlər əks olunub.

Nicat Atayev 5 mart 1994-cü ildə Mingəçevir şəhərində anadan olub. 2011-ci ildə orta məktəbi bitirib. Naxçıvan şəhərində yerləşən N saylı hərbi hissədə hərbi xidmət keçib. Sonra Gəncə Dövlət Universitetinin Fiziki hazırlıq fakültəsinə qəbul olunub. Universiteti bitirdikdən sonra Müdafiə Nazirliyinin N saylı hərbi hissəsinə müraciət edərək, 2019-cu ildə 3 aylıq zabitlik kursu keçib və Füzuli rayonunun N saylı hərbi hissəsində xidmətə başlayıb.

27 sentyabr 2020-ci ildə başlayan Vətən müharibəsində Nicat Atayev də ilk gündən döyüşlərdə iştirak edib, qəhrəmanlıq göstərib. O, Füzuli rayonunun Yuxarı Əbdürrəhmanlı kəndi istiqamətində döyüşlərdə şəhidlik zirvəsinə ucalıb və II Fəxri xiyabanda dəfn olunub.

Şəhid leytenant Nicat Atayev ölümündən sonra “Vətən uğrunda” ,”Xocavəndin azad olunmasına görə” və “Füzulinin azad olunmasına görə” medalları ilə təltif edilib.

Mədəniyyət.- 2021.- 27 yanvar.- S.6.