Parisdə “Türk Mədəniyyəti və Dilləri Günü”

Fransa Şərq Dilləri və Sivilizasiyaları İnstitutunda (İNALCO) “Türk Mədəniyyəti və Dilləri Günü”nə həsr edilmiş tədbir keçirilib.

Ölkəmiz Parisdəki səfirliyimizin dəstəyi və “Caspian Research Center” Assosiasiyasının təşkilatçılığı ilə tədbirdə təmsil olunub.

“Türk Mədəniyyəti və Dilləri Günü” ADƏT dərnəyinin təşkilatçılığı ilə İNALCO-da təhsil alan türk ölkələri tələbələri tərəfindən qeyd edilib. Tədbirdə türk ölkələrinin milli adət-ənənələri təqdim olunub.

Azərbaycan stendində ölkəmizin tarixi, mədəniyyəti, mətbəxi haqqında, eləcə də Xocalı soyqırımına dair Heydər Əliyev Fondu tərəfindən fransız dilində dərc edilmiş kitablar nümayiş olunub.

Tədbirə qatılan səfirliyin əməkdaşı Günel Zülfüqarova tələbələrə ölkəmizin tarixi və mədəniyyətindən danışıb. “Caspian Research Center” Assosiasiyasının təsisçilərindən olan Adela Naibova milli rəqsimizi təqdim edib.

“Türk Mədəniyyəti və Dilləri Günü” çərçivəsində Azərbaycan paxlava və şəkərburası da daxil olmaqla, türk ölkələrinin milli şirniyyatları İNALCO tələbələrinə təqdim olunub.

Qeyd edək ki, İNALCO-da müxtəlif dərnək üzvləri olan tələbələrin təşəbbüsü ilə keçirilən ənənəvi tədbir koronavirus pandemiyası ilə bağlı iki il aradan sonra təşkil olunub.

Mədəniyyət.- 2022.- 1 aprel.- S.8.