“Burdan min atlı keçdi” – Rus Dram Teatrının səhnəsində

C.Cabbarlı adına İrəvan Dövlət Azərbaycan Dram Teatrı görkəmli şair-dramaturq Hidayətin “Burdan min atlı keçdi” əsərinin premyerasını S.Vurğun adına Azərbaycan Dövlət Akademik Rus Dram Teatrının səhnəsində təqdim edib.

Teatrın 140-cı mövsümündə ərsəyə gəlmiş tamaşa ulu öndər Heydər Əliyevin anadan olmasının 99-cu ildönümünə həsr edilib.

Tamaşada tarixən Qərbi Azərbaycanda yaşamış soydaşlarımızın taleyindən, Qarabağ hadisələrinin yenicə başladığı dövrdə ermənilərin xalqımıza qarşı törətdiyi etnik təmizləmə siyasətindən, Prezidentimizin əzmi nəticəsində həmin siyasəti iflasa uğradan şanlı Qələbəyə gedən yoldan bəhs edilir. Əsrlərlə Qərbi Azərbaycanda bədxahlarımızın mənfur əməllərinə sinə gərən seçilmiş şəxsiyyətlərin gərgin mübarizəsi, o cümlədən ümummilli lider Heydər Əliyevin yorulmaz və dönməz fəaliyyəti işıqlandırılır. Ulu öndərin bədii obrazının simasında o böyük şəxsiyyətin milli məfkurəsi, vətən, torpaq və xalq sevgisi, dövlətçilik prinsipləri təcəssüm etdirilir.

Alqışlarla qarşılanan tamaşada İrəvan teatrının yaradıcı kollektivinin hər bir üzvü obrazlarının yüksək peşəkarlıqla təqdimatına nail ola biliblər. Səhnə işi teatrsevərlər tərəfindən alqışlarla qarşılanıb.

Tamaşanın quruluşçu rejissoru Xalq artisti Firudin Məhərrəmov, quruluşçu rəssamı Vahid Mürsəliyevdir.

Nümayişin sonunda şair-dramaturq Hidayət tamaşa haqqında fikirlərini bölüşərək kollektivi təbrik edib.

Mədəniyyət.- 2022.-27 aprel.- S.5.