“Sevilfest”də “Sənədli animasiya” mövzusunda ustad dərsi

Xəbər verdiyimiz kimi, 13-20 avqust tarixində ölkəmizdə III “Sevil” Beynəlxalq Qadın Sənədli Film Festivalı keçirilir. Festival çərçivəsində avqustun 16-da “Sənədli animasiya” mövzusunda ustad dərsi təşkil edildi.

Ustad dərsini “Sevilfest”in tərəfdaşlarından olan “Factual Animation” Film Festivalının prodüser və dizayneri Marina Belikova aparırdı. O, fotoqrafiya, qrafika və 2D animasiya ilə işləyən media rəssamıdır. Londonda və Bauhaus Universitetində (Almaniya) media incəsənəti və dizaynı üzrə təhsil alan animator şüşə animasiya texnikası və digər forma və janrlara müraciət edir. Onun üslubu maraqlı hekayələr yaratmaq üçün rəqəmsal və analoq texnikaları birləşdirməyə əsaslanır. İşləri 10-dan çox ölkədə bir sıra film festivallarında nümayiş etdirilib.

Aparıcı ustad dərsinin iştirakçılarını sənədli animasiya barədə geniş tədris materialı ilə tanış etdi. Dərsdə sənədli animasiya, onun inkişaf tarixi, janrları, eləcə də müasir sənət əsərləri və yeni tətbiqetmələr üzrə müzakirələr oldu.

Festivalın icraçı meneceri Pəri Abbaslı bizimlə söhbətində qeyd etdi ki, həm təqdim olunan filmlərə, həm də ustad dərsi, görüş və müzakirələrə maraq var. Festivalın Lənkəran və Şəki üzrə komandası da fəal olaraq filmlərin nümayişini həyata keçirirlər.

Həmsöhbətimiz M.Belikovanın Azərbaycana ilk dəfə gəldiyini deyir: “Biz “Factual Animation” ilə əməkdaşlığımız çərçivəsində onu Azərbaycana dəvət etdik. Bu gün maraqlı təcrübəsini gənc animatorlarla bölüşdü”.

Marina Belikova Azərbaycanda olmasından məmnunluğunu ifadə etdi. Mütəxəssis deyir ki, dizayner kimi ilk növbədə paytaxtımızın arxitekturası onun diqqətini cəlb edib. 2000-ci ilin əvvəllərindən animasiya ilə məşğul olduğunu deyən qonaq bildirdi ki, 2014-cü ildən davamlı olaraq bu işlə məşğul olmağa başlayıb. Hazırda dünyada animasiya sahəsinin sürətlə inkişaf etdiyini söyləyən qonaq bu tərəqqinin müəyyən mərhələləri və müxtəlif janrlarla bağlı düşüncələrini azərbaycanlı həmkarları ilə bölüşməkdən məmnunluq duyduğunu dilə gətirir: “Festivala dəvət alanda Azərbaycan kinosu və animasiyası haqqında məlumatsız idim. Qısa zaman ərzində tanış olmağa və bu haqda oxumağa vaxt tapdım. Uşaq yaşlarımdan tanış olduğum bir neçə cizgi filminin Azərbaycana məxsusluğunu da məhz bu tanışlıq ərəfəsində öyrəndim. Azərbaycanda olduğum müddətdə ölkənizin mədəniyyəti və animasiya sahəsi ilə yaxından tanış olmağı qarşıma məqsəd qoymuşam”.

Festivalın mövzusu, məramı, nümayiş olunan filmlərin janrı barədə layihənin icraçı menecerindən xəbər alırıq: “Filmlərimizi, afişa və digər lazım olan avadanlıqları bölgələrdəki komandamıza və könüllülərimizə yollayırıq. Təqdim olunan filmlər bölgələrimizdə də maraqla qarşılanır, həm də tələbat var. Məqsədimiz yerlərdəki xanımları maarifləndirməkdir. Bakıda təqdim olunan filmlərlə bölgələrdə nümayiş etdirilən ekran işlərinə diqqət yetiririk. Burada bir qədər “ağır” filmləri nümayiş etdirə bilərik, regionlarda isə bütün nüanslar diqqətə alınır”.

Qeyd edək ki, festival proqramının önəmli bir hissəsi olan “Festivallardan seçmələr” bölməsində məşhur sənədli filmlər yer alıb. Dünya premyerasını 2019-cu ilə “Sundance” film festivalında (ABŞ) etmiş Tamara Kotevska və Lyubomir Stefanovun “Bal ölkəsi” filmi bu bölmənin ən parlaq ekran işlərindəndir. “Bal ölkəsi” “Oskar” tarixində hər iki kateqoriya üzrə mükafat qazanan ilk sənədli film hesab edilir.

“Sevilfest”in proqramında tanınmış kino mütəxəssisləri Jean Mouin, Tamara Kotevska və başqalarının da ustad dərsləri nəzərdə tutulub.

Qeyd edək ki, festival USAİD və Azərbaycan Kinematoqrafçılar İttifaqının maliyyə dəstəyi, bir sıra şirkətlərin tərəfdaşlığı ilə həyata keçirilir.

Lalə

Mədəniyyət.- 2022.- 19 avqust.- S.5.