Mirvarid Dilbazinin 110 illiyi qeyd olunub

XX əsr Azərbaycan poeziyasının görkəmli nümayəndəsi, ilk qadın Xalq şairi Mirvarid Dilbazinin (1912-2001) anadan olmasının 110 illiyi ilə əlaqədar Qazax rayonunda yubiley tədbiri keçirilib.

Qazax Rayon İcra Hakimiyyəti, “Mirvarid Dilbazi Poeziya Məclisi” İctimai Birliyi, “Qazax” Xeyriyyə İctimai Birliyi və Azərbaycan Yazıçılar Birliyi (AYB) Qazax bölməsinin birgə təşkilatçılığı ilə gerçəkləşən tədbirdə əvvəlcə Xalq şairinin 85 illik yubiley mərasimindən bəhs edən videoçarx nümayiş olunub.

Tədbirdə çıxış edən “Mirvarid Dilbazi Poeziya Məclisi” İctimai Birliyinin sədri Güllü Eldar Tomarlı şairənin həyat və yaradıcılığından danışıb. Qazax Rayon İcra Hakimiyyətinin başçısı Rəcəb Babaşov çıxışında qeyd edib ki, ulu öndər Heydər Əliyev Xalq şairi Mirvarid Dilbaziyə böyük qiymət verib.

“Qazax” Xeyriyyə İctimai Birliyinin sədri İlham Pirməmmədov, AYB Qazax bölməsinin sədri, Əməkdar incəsənət xadimi Barat Vüsal və digər çıxış edənlər Mirvarid Dilbazinin Azərbaycan ədəbiyyatında yerindən söhbət açıblar. Xanlıqlar kənd tam orta məktəbinin şagirdləri, Mirvarid Dilbazi adına Cəfərli kənd tam orta məktəbinin şagirdləri şairənin şeirlərini söyləyiblər.

Mədəniyyət.- 2022.- 19 avqust.- S.2.