Yerlərdəki mədəniyyət müəssisələri müasir çağırışlara cavab verməlidir

Xəbər verdiyimiz kimi, fevralın 3-də Gəncə şəhərinə səfər edən mədəniyyət naziri Anar Kərimov burada bir sıra mədəniyyət müəssisələrinə baş çəkib, onların fəaliyyəti ilə maraqlanıb.

Səfər çərçivəsində Anar Kərimov Nizami Gəncəvi Məqbərə Kompleksini ziyarət edib. Sonra Nizami Gəncəvi Muzeyinə baxış keçirən nazirə burada mütəfəkkir şairin həyat və fəaliyyəti ilə bağlı elektron məlumat köşkünün yaradılması barədə məlumat verilib. Nazir ziyarətçilərə göstərilən xidmət səviyyəsinin yüksəldilməsi, muzeyin yeni eksponatlarla zənginləşdirilməsi ilə bağlı tapşırıqlar verib.

Anar Kərimov Gəncə Dövlət Dram Teatrının bu günlərdə istifadəyə verilən yeni binası ilə də tanış olub. Bildirilib ki, son illər Prezident İlham Əliyevin, Birinci vitse-prezident Mehriban xanım Əliyevanın xüsusi qayğısı və diqqəti ilə respublikamızda onlarla yeni mədəniyyət müəssisəsi tikilib istifadəyə verilib. Bütün sahələrdə olduğu kimi, milli mədəniyyətimizin müxtəlif sahələrinin inkişafı, ölkəmizin mədəni irsinin qorunması və təbliği istiqamətində fəal işlər aparılır. O cümlədən regionlarda mədəni həyata xüsusi diqqət ayrılır, yeni mədəniyyət ocaqları tikilir, mövcud müəssisələr təmir olunur. Gəncə Dövlət Dram Teatrının yeni, möhtəşəm binası da ölkə başçısının müvafiq sərəncamına əsasən inşa edilib.

Teatrın binası ilə tanışlıqdan sonra yaradıcı heyətlə görüş keçirilib. Nazir görüşdə teatr əməkdaşlarına yaradıcılıq uğurları arzulayıb. Anar Kərimov eyni zamanda teatrın yeni səhnəsində Gəncənin tarixini əks etdirən əsərlərin tamaşaya qoyulmasını tövsiyə edib.

Gəncə Dövlət Kukla Teatrına gələn nazir burada kollektivin iş şəraiti ilə tanış olub. Məlumat verilib ki, teatr tarixi binada yerləşir, yaradıcı heyət tərəfindən yeni tamaşalar nümayiş olunur. Nazir repertuarda olan tamaşalardan parçalar izləyib, tövsiyələrini diqqətə çatdırıb.

Daha sonra Gəncədəki Nizami Kinoteatrı ilə tanış olan Anar Kərimova müəssisənin fəaliyyətinin müasir tələblər səviyyəsində qurulması məqsədilə yeni layihələrin hazırlanması barədə məlumat verilib.

Ölkə rəhbərliyi tərəfindən mədəniyyət sahəsinə xüsusi münasibət var

Səfər çərçivəsində Anar Kərimov F.Əmirov adına Gəncə Dövlət Filarmoniyasında Gəncə regionunun mədəniyyət ictimaiyyətinin nümayəndələri ilə görüş keçirib.

Nizami yurdu Gəncənin Azərbaycan və dünya mədəniyyəti üçün əhəmiyyətini qeyd edən nazir bu şəhərin yetirdiyi tarixi şəxsiyyətlər, mədəniyyət və incəsənət xadimləri barədə söhbət açıb. Bildirilib ki, bu qədər tanınmış simanı dünyaya bəxş edən Gəncədə yaşayıb-yaratmaq qürurverici hissdir.

Nazir həmçinin diqqətə çatdırıb ki, mədəniyyətə əyləncə sahəsi kimi yanaşmaq olmaz, mədəniyyət ölkəmizin strateji məqsədlərini özündə cəmləşdirən həyat tərzidir. Ulu əcdadlarımızın yaratdığı və bizə miras qoyduğu maddi mədəni irsimizin qorunması vacibdir. Bu sahəyə ölkə rəhbərliyi tərəfindən xüsusilə həssas münasibət var, daim diqqət və qayğı göstərilir.

44 günlük Vətən müharibəsində əldə etdiyimiz Qələbənin qürur tariximizin başlanğıcı olduğunu vurğulayan Anar Kərimov bu kontekstdə mədəniyyət sahəsinin üzərinə düşən öhdəlikləri qeyd edib. Bildirib ki, ölkəmizdə şəhidlərimizin xatirəsini və Vətən müharibəsində tarixi Zəfəri əbədiləşdirən memorial komplekslər, muzeylər tikilir. Bu günlərdə dövlət başçısı tərəfindən Gəncə Memorial Kompleksinin təməli qoyulub. Bu istiqamətdə işlər davam etdiriləcək.

İnsanların yaşam tərzində mədəniyyətin və təhsilin rolunu qeyd edən nazir bu baxımdan kino, teatr, kitabxana və muzeylərin əhəmiyyətini vurğulayıb. Deyib ki, mədəni mirasın nəsildən-nəslə ötürülməsi, yeni nəslin təhsilli və mədəniyyətli olaraq yetişməsi ölkəmiz üçün müstəsna önəmli məsələdir.

Regional mədəniyyət idarələrinin fəaliyyətindən danışan Anar Kərimov nazirlik sistemində aparılan sistemli islahatlara da toxunub. Bildirib ki, yeni yanaşmada mədəniyyət sahəsində çalışan insanlar dövlətçilik, şəffaflıq, ədalətlilik, məsuliyyət kimi prinsipləri öz fəaliyyətlərində rəhbər tutmalı, daha təşəbbüskarlıq və peşəkarlıq nümayiş etdirməli, göstərdikləri xidmətlərin keyfiyyətini daha da artırmalıdırlar. Nazir eyni zamanda bu sahədə yeni layihələrin keçirilməsinin, marketinqin aparılmasının, maddi-texniki vəziyyətin yüksəldilməsinin prioritet məsələlərdən olduğunu diqqətə çatdırıb.

Mədəniyyət işçilərinin suallarını cavablandıran Anar Kərimov onlara işlərində müvəffəqiyyətlər arzulayıb.

Sonda Gəncə Dövlət Filarmoniyasının “Şuşa İli”nə həsr olunmuş konsert proqramı təqdim edilib.

Mədəniyyət.- 2022.- 9 fevral.- S.4.