Milli İncəsənət Muzeyində interaktiv panel

Azərbaycan Milli İncəsənət Muzeyində UNICEF-in ölkəmizdəki nümayəndəliyi ilə birgə, Mədəniyyət Nazirliyi və Ekologiya və Təbii Sərvətlər Nazirliyinin tərəfdaşlığı ilə təşkil edilən “Hippolar: iqlim dəyişikliyi ilə mübarizə üçün dünya səyahəti” adlı sərgi çərçivəsində interaktiv panel müzakirəsi keçirilib.

Muzeydən bildirilib ki, “İqlim dəyişikliyi: Uşaqların və gənclərin həyatına hansı imkanlar və çağırışlar gətirir?” paneldə UNICEF-in Azərbaycandakı nümayəndəliyinin rəhbəri Aleks Haykens, Böyük Britaniyanın ölkəmizdəki səfiri Ferqus Auld, Ekologiya və Təbii Sərvətlər Nazirliyi İqlim Dəyişmələri və Ozon Mərkəzinin baş mütəxəssisi Cəmilə Məmmədova, Azərbaycan Milli İncəsənət Muzeyinin Beynəlxalq əlaqələr şöbəsinin rəhbəri Könül Rəfiyeva çıxış ediblər.

Panel müzakirə və interaktiv sessiya vaxtı uşaqlar və gənclər iqlim dəyişikliyinin onların həyatına necə təsir göstərdiyini təhlil etmək imkanı əldə ediblər. Bundan əlavə, layihə çərçivəsində iştirakçılar üçün qrup işləri təşkil olunub.

Oktyabrın 29-dək davam edəcək sərgi ailəvi olaraq maraqlı vaxt keçirmək və maariflənmək üçün gözəl imkandır. Sərgiyə giriş sərbəstdir.

Mədəniyyət.- 2022.- 19 oktyabr.- S.5.