“Hiss edirəm ki, şəhid
olacağam...”
Qəlbində
Vətən eşqindən sönməz ocaq qalayan, yurdumuzu
bütöv görməyi arzulayan və bu amal uğrunda şəhidlik
zirvəsinə ucalan igidlərimizdən biri də Sənan Əhmədovdur.
Sənan
Qalasan oğlu Əhmədov 1988-ci il fevralın 15-də
Şamaxı rayonunun Bağırlı kəndində anadan
olub. 9 illik orta təhsili rayonun Ovçulu kənd məktəbində
alıb, sonra Bağırlı kənd şəhid
F.Şıxalıyev adına tam orta məktəbdə 11-ci
sinfi bitirib.
Sənan
2006–2007-ci illərdə hərbi xidmətdə olur. Əsgərliyini
başa vurduqdan sonra Silahlı Qüvvələrin Təlim və
Tədris Mərkəzində (TTM) kurs keçərək N
saylı hərbi hissədə müddətdən artıq həqiqi
hərbi xidmət qulluqçusu olaraq tank taqımında
sürücü-mexanik kimi xidmətə başlayır.
2015-ci ildə müqavilə müddətinin başa
çatması ilə əlaqədar ordu sıralarından
ehtiyata buraxılır. Lakin Sənanın Vətənə
olan sonsuz sevgisi onu yenidən şanlı formanı geyinməsinə
sövq edir. O, yenidən tankçı olaraq hərbi xidmətini
davam etdirir.
2020-ci
ilin 27 sentyabrında başlanan Vətən müharibəsinin
ilk günlərindən döyüşlərə qatılan
Sənan Əhmədov Füzuli rayonunun Yuxarı Seyidəhmədli,
Alxanlı, Mahmudlu, Qaraxanbəyli istiqamətlərində gedən
döyüşlərdə düşmənin onlarla hərbi
texnikasının məhv edilməsində və yararlı vəziyyətdə
ələ keçirilib qənimət kimi mövqeyimizə gətirilməsində
böyük şücaət göstərir. Oktyabrın 11-də
Füzulinin Qaraxanbəyli kəndi ərazisində ağır
döyüşdə düşmənin atdığı
minaatan mərmisinin partlaması nəticəsində şəhid
olur.
Döyüş
yoldaşı, müddətdən artıq həqiqi hərbi
xidmət qulluqçusu, qazi Şərif Şərifov Sənan
haqqında xatirələrində deyir: “Sənan cəsur
olmaqla yanaşı, işinin peşəkarı idi.
Döyüş texnikalarımızda nasazlıq olanda
özü düzəldib qaydasına salırdı. Onun
dostluğuna da söz ola bilməzdi. Öz yoldaşlarına
görə düşünmədən canını təhlükəyə
atardı. Döyüşün ilk günündə
düşmən bizim tankı vurmuşdu. 6 nəfərlik heyətimiz
və 2 tankla mühasirədə qalmışdıq. Sənan
və digər bir döyüş yoldaşımız Anar
Hüseynov gəlib bizi mühasirədən çıxararaq
ölümdən xilas etdilər. Bəzən
döyüşarası qısa söhbət etmək
imkanımız olurdu. Deyirdi ürəyimdə bir hiss var ki,
şəhid olacağam. Son döyüşə girməzdən
öncə Sənan öz çantasını mənə
verdi. Çantasında övladlarının şəkilləri
və kartı var idi. Söylədi ki, gedirəm, ola bilsin
qayıtmadım. Bunlar məndən sənə yadigar qalar. Elə
həmin gün vurulmuş hərbi texnikaları götürməyə
yollandı. Onunla gedən döyüş yoldaşının
tək gəldiyini görüb Sənanı xəbər
aldım. Onun səssizliyi və dolmuş gözləri mənə
hər şeyi aydın etdi...”.
Vətən
müharibəsi qazisi, mayor Mirzə Mehdiyev bildirir ki, Sənan
peşəkar tankçı olmaqla yanaşı, həm də
yaxşı dost idi: “Boş vaxt tapanda oturub dərdləşərdik.
Müharibə başlayanda bütün hərbçilər
çox sevincli idi. Yəni o inam var idi ki,
torpaqlarımızı işğaldan azad edəcəyik. Ancaq
hamımızdan çox Sənan sevinirdi. Elə bil şəhid
olacağını hiss edirdi. O, istəyinə çatdı.
Allah bütün şəhidlərimizə rəhmət eləsin...”.
Sənanın
ən böyük arzusu Qarabağın döyünən
ürəyi Şuşanın düşmən
işğalından azad olunduğu günü görmək
idi. Əfsus ki, o, Şuşamızı, düşmən
üzərində qazandığımız parlaq Qələbəni
görə bilmədi. Sənan Əhmədov oktyabrın 12-də
Şamaxı Şəhidlər xiyabanında torpağa
tapşırılıb. Ölkə
başçısının müvafiq sərəncamları
ilə ölümündən sonra “Vətən uğrunda”,
“Füzulinin azad olunmasına görə” və “İgidliyə
görə” medalları ilə təltif olunub.
Əhmədovlar
ailəsində hərb sahəsini seçən təkcə Sənan
olmayıb, qardaşı mayor Kəyan Əhmədov da Vətən
müharibəsinin qazisidir. Döyüşlərdə
göstərdiyi şücaətə görə ölkə
başçısı tərəfindən Füzulinin, Cəbrayıl
və Xocavəndin azad olunmasına görə, həmçinin
“Hərbi xidmətdə fərqlənməyə görə”
3-cü dərəcəli medalları ilə təltif olunub.
2013-cü
ildə ailə həyatı quran Sənan Əhmədovun
İbrahim, Həmid və Nuray adlı övladları Vətənə
yadigar qalıb.
Allah rəhmət eləsin.
Nurəddin
Mədəniyyət.- 2022.- 12
yanvar.- S.6.