Uşaq İncəsənət Festivalının finalına sayılı günlər qalır...

Müvafiq nominasiyalar üzrə iştirakçılar yekun mərhələyə keçmələri barədə məlumatı festivalın saytında öyrənə bilərlər

Müstəqillik tariximizin ən böyük incəsənət layihələrindən olan Uşaq İncəsənət Festivalının final mərhələsinə sayılı günlər qalır.

Ümummilli lider Heydər Əliyevin 100 illik yubileyi münasibətilə Mədəniyyət Nazirliyi, Elm və Təhsil Nazirliyi və Heydər Əliyev Mərkəzinin birgə təşkil etdiyi festival “BP Azerbaijan” şirkətinin baş sponsorluğu ilə keçirilir.

Qeyd edək ki, 21 nominasiyada üç yaş qrupu (6-9 yaş, 10-13 yaş və 14-17 yaş) üzrə keçirilən festival üç turdan ibarətdir.

Festivala respublikamızın bütün rayon və şəhərlərindən 27 minədək müraciət olub. Peşəkar və həvəskar kateqoriyaları üzrə keçirilən festivalın birinci mərhələsi aprel-iyun, II mərhələsi isə iyul-avqust aylarını əhatə edir.

İkinci – regional mərhələdə iştirak edənlər final mərhələsinə keçmələri, o cümlədən festivalda iştirakın müəyyən edilən vaxtı və məkanı haqqında məlumatları www.uif.az internet portalından ala bilərlər. Bunun üçün festivalın saytında “Final mərhələsi” bölməsinə keçid edərək iştirakçının qeydiyyat kodunu və ya şəxsiyyət vəsiqəsinin FİN nömrəsini yazmaq lazımdır.

Müsabiqənin final mərhələsi sentyabr ayında Bakı şəhərində keçiriləcək.

Festivalın yekununda ən çox nominasiya üzrə iştirak etmiş və fəallıq göstərmiş şəhər və ya rayon növbəti il festivala ev sahibliyi hüququ qazanacaq.

Mədəniyyət.- 2023.- 16 avqust.- S.1.