Azərbaycanlı müəlliflərin kitabları Qahirə sərgisində

Yaxın Şərq, Afrika və Asiyadan 53 ölkənin təmsil olunduğu 54-cü Qahirə Beynəlxalq Kitab Sərgisində azərbaycanlı müəlliflərin kitabları da təqdim edilib.

Qahirə Universitetinin professoru Seymur Nəsirovun “Ərəb elminin inkişafında azərbaycanlı alimlərin rolu” kitabı sərgiyə gələnlərin marağına səbəb olub. Tədqiqatçı alimin əsərində Orta əsrlərə aid ərəb mənbələrində azərbaycanlı alimlərin fəaliyyəti barədə müfəssəl məlumatlar yer alıb.

Sərgidəki Azərbaycan stendində ərəbdilli oxuculara daha bir nəşr – “Discover Azerbaijan” layihəsi çərçivəsində çap olunmuş “Azərbaycan sədası” kitabı da təqdim edilib. Doktor Sədaqət Əliəşrəf, Azərbaycan Respublikası Diasporla İş üzrə Dövlət Komitəsi Ərəb Ölkələri üzrə Koordinasiya Şurasının Misir üzrə əlaqələndiricisi Səbinə Sultan və Ayn-Şəms Universiteti tibb fakültəsinin tələbəsi Sandi Ənvərin müəllifi olduqları kitabda Azərbaycanın şəhərləri (Bakı, Gəncə, Şamaxı, Lənkəran, Şəki, Şuşa, Laçın) haqqında geniş məlumat verilib. Nəşr Misirin bir sıra kitabxanalarına təqdim olunub.

Mədəniyyət.- 2023.- 8 fevral.- S.8.