Azərbaycanın və Macarıstanın “Təbiət möcüzələri”

Ekologiya və Təbii Sərvətlər Nazirliyi və Macarıstanın Azərbaycandakı Səfirliyinin birgə təşkilatçılığı ilə Bakıda “Təbiət möcüzələri” adlı fotosərgi açılıb.

“Landmark”da keçirilən sərgidə Azərbaycanın milli parklarından çəkilmiş füsunkar peyzaj, etüd və lövhələr, Qarabağın əsrarəngiz təbiət nümunələri, o cümlədən tarixi Zəfərimizin rəmzi olan xarıbülbülün fotoları nümayiş olunur. Eyni zamanda Macarıstan Təbiət Fotoqrafları Assosiasiyasının üzvləri ən yaxşı fotoşəkillərini geniş auditoriya ilə bölüşmək imkanı qazanıb.

Müştərək sərginin təşkilində məqsəd Azərbaycan və Macarıstanın təbiət dəyərlərini və gözəlliklərini tərənnüm etmək, hər iki ölkənin nadir təbiət özəlliklərini tanıtmaq, mədəni irsin təbliği və ətraf mühitin mühafizəsi sahəsində əməkdaşlığı möhkəmləndirməkdir.

Sərginin ziyarətçiləri nümayiş olunan şəkilləri maraqla izləyiblər: Qaranohur gölü, budaqların, kolların üstünə qonan qızlarquşu, gölün üzərində uçuşan qızılqazlar, Xanbulan gölünün füsunkar görkəmi, göldən su içən marallar, Qobustandakı Daşgil palçıq vulkanı, səmaya pərvaz edən göl qağayıları, daşların, qayaların arası ilə axıb gələn, gendən baxanda ağappaq tülü xatırladan şəlalə...

Sərgidə fotoları nümayiş olunan Aleksey Lyokin deyib: “Təbiətin əsrarəngiz gözəlliyini çox sevirəm və bunu başqaları ilə bölüşməyə çalışıram. Mənim yaradıcılığımda da təbiət mövzusu əsas yer tutur. Sərgidə Şirvan, Şahdağ və Göygöl Milli parklarından çəkdiyim şəkillər nümayiş olunur. Azərbaycanda hər bir rayonun özünəməxsus gözəlliyi var və mümkün qədər həmin gözəlliyi əks etdirmək istəmişəm”.

Ekologiya və Təbii Sərvətlər Nazirliyi yanında Bioloji müxtəlifliyin qorunması xidmətinin rəis müavini Arzu Babayeva deyib: “Sərgidə Azərbaycanın və Macarıstanın təbiət gözəllikləri nümayiş olunur. Burada həm yerli, həm də ölkəmizdə səfərdə olan xarici fotoqrafların çəkdikləri şəkillər sənətsevərlərə təqdim edilir”.

“Təbiət möcüzələri” fotosərgisi iyunun 30-dək davam edəcək.

Mədəniyyət.- 2023.- 17 iyun.- S.3.