“Yaradanlar” filmi “Heydər Əliyev İli” münasibətilə nümayiş olundu

Müasir Azərbaycan memarlığının banilərindən olan Mikayıl Hüseynov və Sadıq Dadaşovun həyat və fəaliyyətindən bəhs edən “Yaradanlar” sənədli filmi iyunun 21-də “Heydər Əliyev İli” münasibətilə Nizami Kino Mərkəzində təqdim olundu.

Azərbaycan Memarlar İttifaqının (AMİ) təşəbbüsü, Mədəniyyət Nazirliyinin sifarişi ilə 2020-ci ildə “Salnaməfilm” studiyasında istehsal olunmuş filmin premyerası 2021-ci ilin dekabrında olub. Filmin ideya müəllifi AMİ-nin sədri Elbay Qasımzadə, quruluşçu rejissoru Şamil Əliyev, ssenari müəllifi Natiq Rəsulzadə, təsvir rejissoru Rüfət Süleymanov, bəstəkarı Azər Hacıəsgərli, prodüseri Nazim Hüseynovdur.

Rejissor Şamil Əliyev qeyd etdi ki, ekran əsəri indiyədək 100-dən çox festivalda iştirak edib, bir sıra mükafatlara layiq görülüb. Bu, Memarlar İttifaqı ilə birgə ərsəyə gətirilən ikinci ekran əsəridir. 2018-ci ildə birgə “Memar” filmi lentə alınıb.

Ssenari müəllifi, Xalq yazıçısı Natiq Rəsulzadə dedi ki, filmin çəkilişi zamanı incə detal və elementlər də nəzərə alınıb: “Biz çalışmışıq ki, filmdə Mikayıl Hüseynov və Sadıq Dadaşovu peşəkar memardan başqa, onların bir insan kimi xarakterlərini də açıb tamaşaçılara göstərək. Filmdə hər iki memarın yaradıcılıqları ilə bərabər, həyat yolları barədə də məlumatlar yer alıb”.

Çıxışlardan sonra “Yaradanlar” sənədli filmi nümayiş olundu. Filmdə görkəmli memarlar, akademiklər Mikayıl Hüseynov (1905-1992) və Sadıq Dadaşovun (1905-1946) həyat və yaradıcılığı fonunda XX əsrdə kommunist ideologiyasının Azərbaycan xalqının mədəni irsinə, əxlaqi-mənəvi dəyərlərinə vurduğu zərbə diqqətə çatdırılır. 1937-ci il repressiyasında onların qohumlarından olan ziyalıların əksəriyyəti məhv edilib. Eyni zamanda çox yaxın dost olan bu iki sənətkar ömürlərinin bir hissəsini qorxu və mənəvi sıxıntılarla yaşamağa məcbur olublar.

Filmdə Ulu öndər Heydər Əliyevin Azərbaycana rəhbərlik etdiyi dövrdə ziyalıları siyasi rejimin təqiblərindən qoruyaraq onların yaşayıb-yaratması üçün qayğısını əsirgəmədiyi də vurğulanır.

Nurəddin

Mədəniyyət.- 2023.- 23 iyun.- S.3.