Musiqiçilərimiz ilk
dəfə Vyanada akkordeon
festivalında çıxış ediblər
Azərbaycan musiqiçiləri Avstriya paytaxtında keçirilən ənənəvi akkordeon festivalında ilk dəfə iştirak ediblər. Xalq artisti Ənvər Sadıqovun rəhbərlik etdiyi “Qaytağı” instrumental ansamblı festival çərçivəsində Vyana şəhərinin “Porgy & Bess” caz klubunda konsert verib.
24-cü Vyana Beynəlxalq Akkordeon Festivalı bu il 25
fevral – 26 mart tarixlərində
keçirilir. Konsertdən öncə
elan edilib ki, festival dünyanın müxtəlif ölkələrindən
peşəkarları və
yeni istedadları bir araya gətirir,
bir ay boyunca Vyanada müxtəlif məkanlarda konsertlər təşkil edilir. Ölkəmizin ilk dəfə bu
festivalda təmsil olunmasına, uğurlu əməkdaşlıq və
dəstəyə görə
təşkilatçılar adından Azərbaycan Mədəniyyət Mərkəzinə
xüsusi təşəkkür
elan edilib.
Vyanada musiqisevərlərin
sevimli məkanlarından
birində anşlaqla keçən konsertdə məşhur caz pianoçusu və bəstəkar, beynəlxalq
müsabiqələr laureatı
Emil Əfrasiyab da iştirak edib. Konsertdə Azərbaycan
xalq və bəstəkar mahnıları
əsasında hazırlanmış
kompozisiyalarla yanaşı,
Ənvər Sadıqov
və Emil Əfrasiyabın
müəllifi olduğu
əsərlər də
böyük maraqla qarşılanıb. Dahi bəstəkarlar
Volfqanq Amadey Motsart və Üzeyir Hacıbəylinin
əsərləri əsasındakı
kompozisiya xüsusilə
alqış doğurub.
Eyni zamanda silahlı münaqişələr və
təbii fəlakətlər
zamanı həlak olmuş insanlara ithaf olaraq ifa
edilən “Atama məktub” əsəri kövrək və duyğulu ab-hava yaradıb.
Azərbaycan milli musiqi alətlərində
ifalar konsertə xüsusi rəng qatıb. Musiqi axşamına Qara
Qarayev və Rauf Hacıyevin əsərlərindən ibarət
kompozisiyalarla yekun vurulub.
Konsert
“Porgy & Bess“ caz klubunun canlı yayım portalı vasitəsilə yayımlanıb,
eləcə də
“Emap.fm” internet radio kanalı vasitəsilə səs yazısı olaraq qeydə alınıb.
Mədəniyyət.- 2023.- 3 mart.-
S.8.