“Sabahın xeyir, keramika!”

İtaliyanın sənət festivalı Bakıda da təşkil olunub

İtaliyada ənənəvi olaraq keçirilən keramika festivalı – “Buongiorno Ceramica!” bu il Bakıda da bu sənəti sevənləri bir araya gətirib.

“Arts Council Azerbaijan”, Azərbaycan Rəssamlıq Akademiyası, “Gilabi Ceramics” Balaxanı Yaradıcılıq Mərkəzi və “World Craft Council Europe” təşkilatlarının birgə əməkdaşlığı ilə silsilə tədbirlər keçirilib.

Festival çərçivəsində rəssam Mir Teymur Məmmədovun keramika mərkəzinə ekskursiya təşkil olunub. “Gilabi Ceramics” Balaxanı Yaradıcılıq Mərkəzində ustad dərsi keçirilib. Ustad dərsinin iştirakçılarına özlərinin keramika işlərini düzəltmək və onu öz zövqlərinə uyğun ornamentlərlə bəzəmək imkanı verilib. Həmçinin Azərbaycan Rəssamlıq Akademiyasının Muzey-sərgi kompleksində “Sabahın xeyir, keramika!” adlı sərgi açılıb. Sərgidə müxtəlif texnika və üslubda hazırlanmış yüzə yaxın əl işi nümayiş etdirilib.

“Buongiorno Ceramica!” keramika sənətini və sənətkarlığını təbliğ etmək, təkmilləşdirmək məqsədilə AİCC – İtaliya Keramika Şəhərləri Assosiasiyası tərəfindən yaradılmış festivaldır. Ənənəvi olaraq mayın 20-də və 21-də İtaliyada “Buongiorno Ceramica!” festivalı çərçivəsində müxtəlif tədbirlər keçirilir. Azərbaycan mədəniyyəti və sənətkarlıq irsində xüsusi yeri olan keramika ilə bağlı festivalın ilk dəfə Azərbaycanda da keçirilməsinin təşəbbüskarı və kuratoru “World Craft Council Europe” təşkilatının nümayəndəsi Sona Quliyevadır.

Mədəniyyət.- 2023.- 24 may.- S.3.