Vətən müharibəsinin Zəfər soraqlı üçüncü şəhəri

20 oktyabr Zəngilan Şəhəri Günüdür

Azərbaycanın ən yeni tarixinə şərəf və ləyaqət salnaməsi olaraq yazılan 2020-ci il Vətən müharibəsinin Zəfər soraqlı günlərindən biri də 20 oktyabrdır. Bu gün Zəngilan şəhərinin işğaldan azad olunmasının üçüncü ildönümüdür.

“Torpaqlarımızı 30 ilə yaxın işğal altında saxlayan düşmən döyüş meydanında Azərbaycan Ordusunun gücünü görür. Biz öz torpağımızda vuruşuruq, öz torpağımızı qoruyuruq və işğalçıları bundan sonra da öz torpaqlarımızdan qovacağıq. Xalqımız döyüş meydanından, cəbhə bölgəsindən səbirsizliklə yeni xəbərlər gözləyir. Mən çox şadam və mən xoşbəxt adamam ki, bu şad xəbərləri Azərbaycan xalqına çatdırıram” – Prezident, Ali Baş Komandan İlham Əliyev bu tarixi sözləri 2020-ci il oktyabrın 20-də Zəngilanın azad olunması ilə bağlı xalqa müraciətində demişdi.

Zəngilan Cəbrayıl (4 oktyabr) və Füzulidən (17 oktyabr) sonra Vətən müharibəsində azadlığa qovuşan üçüncü şəhərimiz idi.

Prezident İlham Əliyevin 31 iyul 2023-cü il tarixdə imzaladığı sərəncamla Azərbaycan Respublikasının işğaldan azad edilmiş əraziləri üzrə şəhər günləri təsis edilib. Sərəncama əsasən, 20 oktyabr Zəngilan Şəhəri Günüdür.

Zəngilan torpağı işğaldan azad olunan ərazilərin dirçəlişində bir ilklə də yeni tariximizə düşdü. Otuzillik əsarətdən qurtulan yurd yerlərimizdə yenidən qurulan ilk yaşayış məntəqəsi Zəngilan rayonunun Ağalı kəndi oldu. 2022-ci ilin mayında Ağalı öz sakinlərinə qucaq açdı.

2022-ci ilin 20 oktyabrında isə Şərqi Zəngəzurun hava qapısı olan Zəngilan Beynəlxalq Hava Limanı Azərbaycan və Türkiyə prezidentləri İlham Əliyev və Rəcəb Tayyib Ərdoğanın iştirakı ilə istifadəyə verildi. Bu, təkcə bu bölgəmizin deyil, ümumilikdə Azərbaycanın inkişafı, eləcə də yerləşdiyimiz coğrafiyanın gələcək mənzərəsi üçün mühüm önəm kəsb edən, Azərbaycan-Türkiyə birlik və bərabərliyi üçün əlamətdar hadisə idi.

Zəngilanın işğaldan azad olunmasının ikinci ildönümündə Prezident İlham Əliyev şəhərdə ilk yaşayış binasının təməlini də qoydu. O vaxtdan ötən bir il içində dövlət başçısı tərəfindən Zəngilan şəhərində ümumilikdə 4 yaşayış kompleksinin təməli atılıb. İnanırıq ki, zəngilanlılar növbəti Şəhər gününü öz şəhərlərində, ev-eşiklərində bayram edəcəklər. Bundan əlavə, ötən müddətdə Zəngilan rayonunun yenidən qurulacaq daha bir neçə kəndinin təməli qoyulub. Tezliklə Ağalının sırasına “çinarlar yurdu”nun digər yaşayış məntəqələri də qoşulacaq...

Mədəniyyət.- 2023.- 20 oktyabr, №78.- S.1.