Ruhumuzu dincəldən səs, avaz
O lap uşaqlıqdan
müğənni-xanəndə olmağı arzulayırdı.
Hələ orta məktəb illərindən
mahnı və muğam oxumağı çox sevirdi. Gözəl səsi, xoş avazı, ürəyi titrədən
zəngulələri ilə
könülləri oxşayırdı.
Müəllimləri, qohum-qonşuları
və dostları əmin idilər ki, Nazim yaxşı
xanəndə olacaq. Orta məktəbi bitirib sənədlərini
indiki Azərbaycan Dövlət Mədəniyyət
və İncəsənət
Universitetinə verdi. İstedadı ilə imtahanlardan uğurla keçərək tələbə
adını qazandı.
Nazim Sərkar
oğlu Həsənov
universitet təhsilini uğurla başa vurub doğma Zərdaba qayıtdı. Amma bir müddət
ixtisasına uyğun iş tapa bilmədi.
Əlacsız qalan gənc xanəndə Mədəniyyət evində
fəhlə işləməyə
başladı. Səsi,
avazı yerində, sənətə olan sevgisi də heç azalmamışdı.
Müdriklər deyir ki, istedad günəş
kimidir, gec-tez bir gün parlayacaq.
Qəlbəyatan səsini,
məharətli ifasını
nəzərə alaraq
Nazimi mədəni-kütləvi
tədbirlərə tez-tez
dəvət edir, fəhlə kimi çalışan bu incəsənət adamının
ifalarından zövq alırdılar...
Nazim Həsənov,
nəhayət, Qoşaoba
kənd Diyarşünaslıq
evinin bədii rəhbəri təyin edildi. O gündən nəinki kollektivlərinin,
həmçinin rayon Mədəniyyət Mərkəzində
təşkil olunan tədbirlərin hazırlanmasında
yaxından iştirak etdi. Qısa müddət sonra ona daha böyük
etimad göstərildi
və Diyarşünaslıq
evinin direktoru vəzifəsi Nazim müəllimə həvalə
edildi.
Onu da qeyd edim ki,
Nazim Həsənov gənc yaşlarından görkəmli müğənni,
Xalq artisti Niyaməddin Musayev sənətinin vurğudur.
Onun repertuarında yer alan mahnılara
daha çox müraciət edir. “Dünya sənin, dünya mənim” mahnısını isə
xüsusi şövqlə
ifa edir. Onları sənətlə yanaşı,
dostluq telləri də birləşdirir.
Bu günlərdə
Zərdab rayon Mədəniyyət Mərkəzində
Nazim Həsənovun
60 illik yubileyinə həsr olunmuş tədbir keçirildi. Müğənninin incəsənətə
bağlılığından, sənət yolunda qazandığı uğurlardan
danışıldı. Mərkəzin
direktoru Elyurə Məmmədova ifaçının
səsi, avazı ilə tamaşaçı
sevgisi qazandığını
vurğuladı.
Yeri gəlmişkən
deyim ki, Nazim müəllimin sənət yolunu oğlu Hikmət Sərkarzadə davam etdirir. O, Milli Konservatoriyanın nəzdində
Musiqi Kollecini tar ixtisası üzrə bitirib, rayonda da keçirilən
mədəni-kütləvi tədbirlərdə fəal
iştirak edir.
Gənc yaşlarından
dəfələrlə müsabiqələrin
qalibi olan, ifaçılıq sahəsində
uğurlara imza atan Nazim müəllimi
yubileyi münasibətilə
səmimi-qəlbdən təbrik
edir, cansağlığı,
uzun ömür və yeni-yeni sənət sevincləri arzulayırıq.
Oxu, Nazim,
oxu! Sən oxuyanda nə qədər kövrəlsək
də, ruhumuz bir o qədər dincəlir, mənəvi rahatlıq tapırıq.
Mübariz Səfiyaroğlu
şair-publisist
Mədəniyyət.- 2023.- 6 sentyabr.-
S.6.