Ədəbiyyatdan kinoya

Yazarların iştirakı ilə dinləmə keçirilib

Mədəniyyət Nazirliyi və Azərbaycan Ədəbiyyat Fondunun təşkilatçılığı ilə Yazıçılar Birliyinin Natəvan klubunda “Ədəbiyyatın kinoya transferi” mövzusunda dinləmə keçirilib. Tədbirin məqsədi keyfiyyətli filmlərin ərsəyə gətirilməsi üçün yazıçıların kino industriyasına daha yaxından cəlb edilməsidir.

Tədbirdə Xalq şairi Sabir Rüstəmxanlı, Azərbaycan Ədəbiyyat Fondunun baş direktoru Varis Yolçuyev, Azərbaycan Yazıçılar Birliyinin katibləri İlqar Fəhmi, Elçin Hüseynbəyli, birliyin dramaturgiya seksiyasının müdiri Firuz Mustafa, Azərbaycan Kino Agentliyinin şöbə müdiri Rəşad Qasımov, rejissor Adil Azay, “Ultra production” şirkətinin rəhbəri Pərviz Məmmədov, “Azərbaycan” jurnalının baş redaktoru İntiqam Qasımzadə, yazarlar Yunus Oğuz, Yaşar, Rüstəm Dastanoğlu, Kənan Hacı, Firudin Qurbansoy, Fərid Hüseyn və digərləri iştirak ediblər.

Tədbirdə ədəbiyyatla kinonun vəhdətindən, uğurlu filmlərin çəkilməsi üçün yaxşı dramaturji materialın mövcud olmasının əhəmiyyətindən danışılıb. Mədəniyyət naziri Adil Kərimli tərəfindən kinodakı durğunluğu aradan qaldırmaq üçün atılan addımlardan da bəhs olunub.

Mədəniyyət nazirinin müşaviri Əməkdar incəsənət xadimi Orxan Fikrətoğlunun mövzu ilə bağlı məruzəsi dinlənilib. Məruzədə Kino Agentliyinin yaradılması, Kino Forumunun keçirilməsi, film müsabiqəsinin elan edilməsi diqqətə çatdırılıb. Qeyd olunub ki, yeni kino strategiyasının ilk bəhrəsi olan müsabiqə özündə filmlərin 5 xətt üzrə maliyyələşməsini ehtiva edir: dövlət sifarişli filmlər, kommersiya (kassa) filmləri, sənət filmləri (art-hauslar), debüt filmləri və tələbə filmləri.

Nəzərə çatdırılıb ki, bu gün Mədəniyyət Nazirliyi prodüser mərkəzlərinin çoxalmasında və təkmilləşməsində maraqlıdır. Eyni zamanda nazirlik tanınmış studiyaların Azərbaycanda filmlər çəkməsinə maraq göstərir. Ölkəmizdə film çəkən bütün xarici şirkətlərə yalnız 60-70 faiz yerli işçilərdən – azərbaycanlı mütəxəssislərdən istifadə şərti qoyulacaq. Nəticədə yeni kadrlar hazırlanacaq, hazır kadrların isə kino təcrübəsi artacaq. Bundan əlavə, tələbələrin xaricdə təhsil almasına önəm veriləcək, ssenaristlərin təkmilləşdirilməsi də diqqətdə saxlanılacaq. Animasiya Akademiyası açılacaq, milli animasiya filmlərinin çəkilməsi prioritet sayılacaq. Kinoaktyor truppası bərpa ediləcək, texniki heyət üçün hər 6 aydan bir kvalifikasiya kursları keçiriləcək.

Bildirilib ki, kinoteatrlarda göstərilən əcnəbi filmlərin dublyaj keyfiyyəti diqqətdə saxlanılacaq. Dublyaj studiyaları yaradılacaq, yüksək səviyyədə tərcümə mətnlərindən istifadə ediləcək. Kinoteatrlarda Azərbaycan filmlərinin nümayişinə üstünlük veriləcək və bu filmlər üçün üstün prokat şərtləri müəyyənləşəcək.

Tədbir diskussiya şəklində davam edib, fikir və təkliflər səsləndirilib.

Mədəniyyət.- 2023.- 6 sentyabr.- S.6.