“Azərbaycan - Şərqi və Qərbi birləşdirən ölkə»

Bakıda bu adda konfrans başladı

Aprelin 1-də Azərbaycan Milli Tarix Muzeyində Azərbaycan Milli Elmlər Akademiyası və Almaniyanın Arxeologiya İnstitutu Almaniyanın ölkəmizdəki səfirliyinin təşəbbüsü və dəstəyi ilə “Azərbaycan - Şərqi və Qərbi birləşdirən ölkə (b.e.ə. VII və IV minilliklərdə)” mövzusunda beynəlxalq arxeoloji konfrans öz işinə başlayıb. Qeyd edək ki, tədbir hər iki ölkənin arxeologiya institutları arasında birgə araşdırma fəaliyyətinin başlanğıcına həsr olunub. Eyni zamanda konfrans 2009-cu ildə Bakıda keçirilən Almaniya Mədəniyyəti Günləri çərçivəsindəki tədbirlər silsiləsinə aid idi. Konfransda Azərbaycan Milli Elmlər Akademiyasının prezidenti akademik Mahmud Kərimov, Arxeologiya və Etnoqrafiya İnstitutunun direktoru, professor Maisə Rəhimova, Almaniya Arxeologiya İnstitutunun Avrasiya Departamentinin direktoru, professor Sved Hansen, Almaniyanın Azərbaycandakı səfiri Pier Stankina, Azərbaycan Milli Tarix Muzeyinin direktoru, akademik Nailə Vəlixanlı iştirak edirdilər. Eyni zamanda konfransa ölkəmizdə səfərdə olan Almaniya xarici işlər nazirinin müavini, parlament üzvü Qernot Erler və Amerika, Türkiyə və Fransadan olan mütəxəssislər də qatılmışdı.

Konfransda çıxış edən Almaniya Arxeologiya İnstitutunun Avrasiya Departamentinin direktoru, professor Sved Hansen bildirdi ki, bu, səfirliyin Azərbaycanda keçirdiyi ilk beynəlxalq konfransdır və eyni zamanda xarici işlər nazirinin müavininin də Bakıya ilk rəsmi səfəridir. Hər iki ölkənin arxeologiya institutları arasında əməkdaşlığın davamlı olmasına ümid edən cənab Hansen tədbiri yüksək dəyərləndirdi: «Düşünürəm ki, bu gün elmi-mədəni sahələrdə də inkişaf lazımdır. Bu baxımdan Azərbaycanla birlikdə arxeoloji konfrans keçirməyə, qarşılıqlı fikir mübadiləsi aparmağa böyük maraq göstəririk».

Almaniyanın Azərbaycandakı səfiri Pier Stankina isə bildirdi ki, ölkələr arasındakı elmi konfransların, birgə əməkdaşlığın aparılması səfirliyin maraq dairəsindədir. Səfir eyni zamanda onu da vurğuladı ki, gələcəkdə də səfirliklə Elmlər Akademiyası arasında əməkdaşlığın davamlı olmasına çalışacaq: «Bu bizi çox məmnun edir və hesab edirik ki, elmi konfrans və seminarlar bizim üçün böyük fürsətdir».

Konfransın ilk günündə Azərbaycanda eramızdan əvvəl VII-IV minilliklərə aid tarixi abidələrin tədqiqinə həsr edilən məruzələr dinlənildi. Məruzələr əsasən Şəmkir rayonunun Qaracəmirli kəndində aparılan qazıntılarla, Cənubi Qafqazda erkən əkinçilik və maldarlıq mədəniyyətinin yaranması, Neolit dövründə Yaxın Şərqdə ictimai və mərasim binalarının tikilməsi, Göytəpədə (Azərbaycan) bu dövrə aid qazıntılar və sairlə bağlı oldu.

Qeyd edək ki, konfransın üçüncü günündə Qobustan qoruğu ilə tanışlıq planlaşdırılıb.

MEHPARƏ

Mədəniyyət.- 2009.- 3 aprel.- S. 9.