Yazıçılar Birliyində Çingiz Abdullayevin 50 yaşı qeyd olunub

Azərbaycan Yazıçılar Birliyində xalq yazıçısı Çingiz Abdullayevin 50 illik yubileyilə bağlı mərasim keçirilib. Azərbaycan ədəbiyyatının nüfuzlu nümayəndələrindən sayılan Ç.Abdullayev ölkəmizdə xalq yazıçısı fəxri adına erkən yaşda layiq görülməsilə də seçilir.

1959-cu il aprelin 7-də Bakı şəhərində ziyalı ailəsində dünyaya gələn Ç.Abdullayev, orta təhsilini 189 saylı məktəbdə alıb. 1976-1981-ci illərdə Azərbaycan Dövlət Universitetinin hüquq fakültəsində təhsilini davam etdirən gələcək yazıçı əmək fəaliyyətinə hüquq məsləhətçisi kimi başlayıb, şöbə rəisi vəzifəsində çalışıb.

1984-1986-cı illərdə Afrika, Asiya və Avropa ölkələrində ezamiyyətdə olan Ç.Abdullayev 1988-ci ildə beynəlxalq təcavüz problemi barədə dissertasiya müdafiə edərək, hüquq elmləri namizədi alimlik dərəcəsi alıb. 1989-cu ilin fevralından Azərbaycan Yazıçılar Birliyinin katibidir. 27 dilə tərcümə olunmuş əsərləri bir çox xarici ölkələrdə 23 milyondan artıq tirajla yayılıb. O, 139 adda kitabın müəllifidir. Ç.Abdullayev bu il aprelin 7-də Azərbaycanın "Şöhrət" ordeninə layiq görülüb. Tədbiri giriş sözü ilə açan AYB sədri Anar, həmkarını yubiley münasibətilə təbrik edib, ona xoş arzularını çatdırıb. Ç.Abdullayevin artıq 20 ildən bəri Yazıçılar Birliyinin katibi vəzifəsində çalışdığını vurğulayan Anar, onun əsərlərinin kəmiyyət etibarilə çox olduğunu diqqətə çatdıraraq, məzmun və keyfiyyət baxımından da yüksək qiymətə layiqliyini qeyd edib, bütün dünyada Azərbaycanı tanıdan imzalardan olduğunu, detektiv janrın milli nümunələrini beynəlxalq miqyasda təsdiqlədiyini dilə gətirib.

Bakı Musiqi Akademiyasının rektoru Fərhad Bədəlbəyli Ç.Abdullayevin beynəlmiləl yazıçı olduğunu önə çəkib: "Çingiz Abdullayev Qarabağ dərdini öz içində yaşadan insanlardandır. Milli problemlərimizi dərindən bilən Ç.Abdullayev bütün bunlarla yanaşı, dünyada geniş oxucu kütləsi qazanan beynəlmiləl yazıçıdır". Xalq artisti Rafiq Hüseynov Ç.Abdullayevin gələcəkdə daha böyük uğurlara imza atacağına əminliyini ifadə edib.

Millət vəkili Elmira Axundova detektiv həvəskarı olmasa da, Ç.Abdullayevin əsərləri ilə yaxından maraqlandığını, indiyədək yazıçının bir neçə kitabını oxuduğunu bildirib: “Çingiz Abdullayevin kitablarından böyük mənəvi zövq alıram. Çünki o, təkcə detektiv yazıçısı deyil, həm də insan psixologiyasının bilicisidir".

Şairə Zəminə Xınalı Ç.Abdullayevə Heydər Əliyev adına Ali Hərbi Məktəb adından imzalanan fəxri diplom təqdim edib.

Yubiley mərasimində iştirak edən Özbəkistan, Qazaxıstan, Rusiya və Belarusun ölkəmizdəki səfirləri, digər əcnəbi diplomatlar və Azərbaycanın dövlət qurumlarının nümayəndələri Ç.Abdullayev yaradıcılığı haqqında fikirlərini bölüşüb, təmsil etdikləri ölkə və qurumlar tərəfindən verilən diplom, fəxri fərman və yubiley hədiyyələrini Ç.Abdullayevə təqdim ediblər.

Tədbirin sonunda çıxış edən Ç.Abdullayev bu yaxınlarda 50 illik yubileyinin Rusiya, Türkiyə, Rumıniya, Avstriya, Almaniya, Gürcüstan və digər ölkələrdə qeyd olunduğunu vurğulayaraq, Yazıçılar Birliyində də belə bir mərasimin keçirilməsindən məmnunluğunu və şəxsiyyəti, yaradıcılığı haqda söylənilən xoş sözlərə görə minnətdarlığını bildirib.

Sabutay

Mədəniyyət.- 2009.- 17 aprel.- S. 4.