Mövzu mədəniyyətdən olanda

Maddi-mənəvi irsimizə güzgü tutan «Space»nin 100-cü «Mədəniyyət saatı»na

Mədəni sərvətlər yaratmaq, sənət əsərləri ilə dünya meydanına çıxmaq xalqın həyatında diqqətəlayiq hadisədirsə, mədəni sərvətləri yaşatmaq və qorumaq ondan da, önəmli məsələdir. Yaradılmışların qorunması xalqın mədəni səviyyəsini, mənəvi yetkinliyini göstərir.

İndi şou-biznesə meylin artması sənətin ciddi janr və sahələrinə diqqətin nisbətən azalması, mədəniyyət sahəsində çalışanların yaradıcılıq və həyat fəaliyyətini çətinləşdirir. Çünki yaranan hər hansı təxəyyül məhsulu ümumilikdə bəşəriyyətə, köhnə təbircə desək, kütləyə ünvanlanır, onun malına çevrilir.

Kütləviləşmə müəyyən anlamda müsbət hal olsa da, digər tərəfdən bu, professionallığın ona güzəştə getməsinə, getdikcə yerini ona verməsinə səbəb olur. Təbii ki, bu öz-özlüyündə təhlükəli hədd olduğundan, son istinad yeri mental xüsusiyyətlər və mədəniyyətdir.

Elə Azərbaycan mədəniyyətinin yalnız xəbər proqramlarının sonundakı kiçik, qeyri-peşəkar, səthi süjetlərlə təbliğinin məhdudlaşmadığını, onun dinamik inkişaf yolunu tutduğunu göstərən bir proqramın - «Mədəniyyət saatı»nın yaranması da bu zərurətdən doğmuşdur. 14 noyabr 2006-cı il. Bu tarixdə «Space» TV-nin efirindən «Mədəniyyət saatı» adlı bir veriliş ekrana çıxaraq, həyatın hər məqamında mədəniyyətin olduğunu izhar etdi.

O gündən bu günə mədəniyyətimizin tele-təəssübkeşləri bu verilişi düz 100 dəfədir ki, Azərbaycan tamaşaçısına mədəni-mənəvi qida kimi təqdim edir. «Salam. Efirdə «Mədəniyyət saatı»dır...» demək, o qədər çətin olmasa da, ən azı yüz dəfə «bizə baxın» demək və buna tutarlı zəmin yaratmaq bir o qədər də asan deyil.

Bu missiyanı daşıyan yaradıcı gənclər - proqramın rəhbəri İmran Məcidov, redaktoru Rasim İsmayılov, rejissoru Elməddin Alıyev, aparıcısı İdris Cəfərov, müxbirləri Tünzalə Məlikova və Fərqanə Gülməmmədova, prodüseri Əşrəf Rzayev və səhifələrimizə yansımayan digər yaradıcı qrup üzvləri bu 100 saylı 3 yaşlının sevincini yaşayırlar.

«Mədəniyyət saatı»nı ölkə kanallarında yayımlanmağa başlayan mədəniyyət proqramlarının qaranquşu, böyük qardaşı hesab edən İmran Məcidov (proqramın rəhbəri) iki ili başa vurmalarının sevincini yaşadıqlarını deyir: «Mədəniyyət və Turizm Nazirliyi ilə «Space» TV-nin birgə layihəsi olan veriliş iki il ərzində Azərbaycan xalqının böyük, zəngin və qədim mədəniyyətini, onun yaddaşını yenidən vərəqləyib. Bu sahədə baş verən, demək olar ki, bütün yenilikləri, mədəni hadisələri ekrana daşıyıb. Qarşıladığımız əcnəbi teatrlar, kino yenilikləri, bizə qonaq olan və bizim qonağı olduğumuz ölkələrdə mədəniyyətimizin nümayişi, musiqimizin təbliği, yazarlarımızın dünyaya çıxmaq cəhdini, dünya ədəbi mühiti ilə qarşılıqlı əməkdaşlığı, sənətkarların yubiley mərasimlərini, unudulan sənət birincilərini xatırlamaq da bu zaman kəsiyinə təsadüf edib. Niyyətimiz təkcə bütün bunları çəkib göstərmək olmadı, həm də mədəniyyətimizin təbliğatı idi. Təvazökarlıqdan kənar olsa da, deməliyik ki, bunu bacardıq. Hələ göstərdiyimiz xidmətin mükafatını da aldıq. Qəzetinizin elan etdiyi «Mədəniyyət mövzusunda ən yaxşı jurnalist işi» müsabiqəsində ötən il qalib olduq. Deməli, zamanı boşuna xərcləməmişik.

Bu yerdə pərdənin görünməyən tərəfindən də danışmaq istərdim. Ciddi proqramın olduqca zarafatcıl, kiçik, lakin çox mehriban bir heyəti var. Qocaman və zəngin mədəniyyətimiz haqqında bu heyət olaraq nəsə etmək bizi çox sevindirir».

Sonra “Rasim redaktordu, məncə, o, daha yaxşı danışa bilər”- deyən proqram rəhbəri estafeti Rasim İsmayılova verdi. «Birincisi, mədəniyyətdə nə baş verirsə, o ekrana yansımalıdır. Xəbərdən qaçmaq olmaz. Həftə ərzində baş verən hadisələri çevik və tematik xəbər olaraq qruplaşdırıb tamaşaçılara təqdim edirik. Bizdə tematik xəbər üstünlük təşkil etdiyindən təqdimata da üstünlük veririk. Tamaşaçı bu və ya digər hadisə, proses haqqında müfəssəl məlumata malik olmalıdır.

Bundan başqa, tamaşaçımızı təəccübləndirməyi, bilgiləndirməyi də qarşıya məqsəd kimi qoymuş və buna nail olmuşuq. Məsələn, elə musiqi alətləri, unudulmuş sənət adamlarını ekrana çıxarırıq ki, tamaşaçı onları gördükdə məmnun olur. Digər tərəfdən isə bu vəziyyət həmin sənət adamına stimul verir, həm də cəmiyyətin yaddaşını vərəqləyir. Onsuz mümkün deyil. Çünki hər şeyin özülü var və biz də bunları nəzərə alırıq. Bu gün gündəmdə olmayan mədəniyyət və incəsənət insanlarını kütləvi tamaşaçıya çatdırmaq lazımdır.

Jurnalist olaraq cəmiyyətə bunu ötürüb, həm də vətəndaşlıq borcundan çıxırsan».

İki il öncə, Azərbaycan teleməkanında eybəcər bir şou-biznes bumu yaşandığı əcaib dönəmdə efirə «Mədəniyyət saatı» çıxdı və bu boşluğu az da olsa doldurdu. Amma bu rəyə, yəni ilkliyə arxayınlaşıb yol almağı da düzgün saymaq olmaz. Çünki az qala bütün kanallarımızda mədəniyyətlə bağlı verilişlər açılıb. Deməli, rəqabət hissi də yaranmalıdır. Bu, həm də inkişafa çağırış olduğundan «Mədəniyyət saatı»nı quranlar bu detalı unutmurlar.

Ciddi, akademik bir mədəniyyət saatı verilişinin azad, yenilikçi və iddialı heyət tərəfindən ərsəyə gəlməsi alqışa, təbrikə layiqdir. Elə mədəniyyətimizin təəssübünü çəkən «Mədəniyyət»çilər olaraq, biz də həmkarlarımız haqqında bir-iki söz demək istədik.

Həmidə Nizamiqızı

Mədəniyyət.- 2009.- 7 fevral.- S. 3.