«Bakı şəhəri» foto və rəsmlərdə

Fevralın 18-də Muzey Mərkəzində Bakıda «İslam Mədəniyyəti Paytaxtı» ilinin açılışı münasibətilə «Bakı şəhəri» adlı foto və rəsm sərgisi oldu. İki hissədən ibarət sərgidə Bakıya həsr edilmiş fotolar və rəsm əsərləri nümayiş etdirilir.

Sərginin açılışında Azərbaycanın mədəniyyət və turizm naziri Əbülfəs Qarayev, İSESKO-nun baş direktoru Əbdüləziz Osman əl-Tuveycri, Türkiyə və Gürcüstanın mədəniyyət nazirlərinin müavinləri, xarici dövlətlərin Azərbaycandakı səfirləri, eləcə də ölkəmizdəki bir sıra beynəlxalq qurumların təmsilçiləri iştirak edirdilər.

Mərasimdə çıxış edən mədəniyyət və turizm naziri Əbülfəs Qarayev Bakının 2009-cu il İslam mədəniyyətinin paytaxtı elan edilməsinin Azərbaycan xalqı üçün böyük bir fəxr olduğunu dedi: «Qədim tarixi keçmişə və müasir mədəniyyətə malik şəhərimiz indiyədək olduğu kimi, bundan sonra da sivilizasiyaların qovuşmasında - ölkələrin mədəniyyətlərinin qarşılıqlı inteqrasiyasında mühüm rol oynayacaq. Biz bu missiyanı layiqincə davam etdirməklə mədəniyyətlərin, sivilizasiyaların dialoqu sahəsindəki cəhdlərimizi artıracağıq».

İslam Ölkələri Elm, Təhsil və Mədəniyyət Təşkilatının (İSESKO) baş direktoru Əbdüləziz Osman əl-Tuveycri isə İslam mədəniyyətinin paytaxtı seçilən Bakının bununla üzərinə böyük missiya götürdüyünü dilə gətirdi: «Bu şəhər olduqca qədim və həmçinin çox müasir şəhərdir. Bir növ qədimliklə çağdaşlığı sintezdə təqdim edən Bakının bu missiyanın öhdəsindən layiqincə gələcəyinə əminəm».

Təşkilat rəhbəri, həmçinin fərqli coğrafi məkanda yerləşən Bakının İslam ölkələrinin bir-birinə yaxınlaşmasına, bu dövlətlər arasında əlaqələrin daha da genişlənməsinə təkan verəcəyinə inamını da ifadə etdi. Sonra tədbir iştirakçıları təşkil olunmuş sərgi ilə tanış oldular. Sərgidə «Bakını necə görürük» sualına iki cür cavab tapmaq olardı. Biri Avropa fotoqrafının gözü ilə, digəri isə öz vətəndaşlarımızın nöqteyi-nəzərindən. Belə ki, şotlandiyali fotoqraf J.Rosie Colinin lentə köçürdüyü Bakı şəhərinin ayrı-ayrı tarixi və mədəniyyət abidələrinin real mənzərəsini yaradan fotoşəkillər maraqlı təəssürat yaratdı.

Bakını çox sevən Coli paytaxt Bakının mənzərəsinin onu foto sənətinə daha da həvəsləndirdiyini deyir: «Mən əvvəlcə Bakını yalnız ağ və qara fonlarda çəkirdim. Sonra qərara gəldim ki, insanlar bu gözəllikləri günəş işığında və rəngli fonlarda da görsünlər. Tarixən Azərbaycan İslam ölkəsi olub. Lakin diqqətimi çəkən məqam ölkənizin tolerantlığı ilə seçilməsidir. Mən 16 ölkənin 30 şəhərində keçirəcəyim sərgilərimdə Bakı gözəlliklərini mütləq hər kəsə bəlli edəcəyəm».

Sərgidə həmçinin Azərbaycanın yaşlı və gənc nəsil rəssamlarının əl işləri də nümayiş olundu. Bu rəssamları birləşdirən vahid nöqtə isə - Bakı idi. Sərgidə yağlı boya ilə çəkilən 100-dən artıq rəsm əsəri nümayiş olundu. 

Həmidə

Mədəniyyət.- 2009.- 20 fevral.- S. 3.