Misir mədəniyyətini əks etdirən sərgi

Dünən Azərbaycan Memarlıq və İnşaat Mühəndislər Universiteti Misir Mədəniyyət Mərkəzi ilə birlikdə Misir mədəniyyətini əks etdirən sərgi keçirdi.

Tədbiri giriş sözü ilə açan universitetin beynəlxalq əlaqələr üzrə prorektoru Nərgiz Abdullayeva bunu da qeyd etdi ki, Qahirə Universiteti ilə 10 ilə yaxındır ki, sıx əməkdaşlıq edirik. Tez-tez bizim müəllim və tələbələrimiz onlara da bizim universitetə gedib-gəlirlər.

Misir dünya mədəniyyətinin beşiyidir. Ona görə də Misir Mədəniyyət Mərkəzi ilə əlaqə saxlayıb, bu gün burada belə bir sərgini təşkil etmişik. Düşünürəm ki, bu sərgi müəllim və tələbələrimizdə böyük maraq doğuracaq.

Misir Mədəniyyət Mərkəzinin direktoru, professor Adil Dərviş Misir Mədəniyyətinə aid sərginin təşkilinə görə universitetin rəhbərliyinə öz təşəkkürünü bildirdi. Qeyd etdi ki, Bakının 2009-cu ildə İslam mədəniyyət paytaxtı elan edilməsi misirlilər üçün də böyük hadisədir. Natiq bu münasibətlə Azərbaycan xalqını təbrik etdi.

Sözünə davam edən doktor Adil Dərviş dedi ki, Misirdə lap qədim zamanlarda universitetlər fəaliyyət göstərmişdir. Müasir dövrdə də, ölkəmizdə çoxlu sayda ali məktəb var. 17 dövlət, 16 özəl universitetdə 2 milyona qədər tələbə təhsil alır. Dünyanın elə bir ölkəsi yoxdur ki, Misirin ali məktəbləri ilə əlaqə saxlamasın. Azərbaycan da həmin ölkələrin sırasındadır. Bu gün Memarlıq və İnşaat Mühəndisləri Universitetində bu sərgini təşkil etməyimiz də təsadüfi deyil. Çünki bu xalqların memarlığı da bir-birinə çox oxşardır.

Universitetin rəqs qrupunun çıxışlarından sonra sərginin açılışı oldu. Tamaşaçılar Misirin ən qədim dövründən bu gününə qədər tarixi mərhələni əks etdirən sərgiyə maraqla baxdılar. 

F.Dünyamalıoğlu

Mədəniyyət.- 2009.- 20 fevral.- S. 5.