İncəsənət körpüsü- Bakıdan Venesiyaya Təsviri sənətin "Oskar" təqdimatına Azərbaycan növbəti dəfə gedir

Xəbər verdiyimiz kimi, iyunun 5-dən etibarən İtaliyanın əsrarəngiz Venesiya şəhəri daha bir möhtəşəm tədbirlə bağlı dünya sənətsevərlərinə qucaq açacaq: ənənəvi 53-cü Venesiya “Biennalisin”in açılışı olacaq. Xatırladaq ki, "Biennali" italyanca "İki ildən bir" deməkdir.

Artıq bir çox xalqların dillərində vətəndaşlıq hüququ qazanan "Biennali" müasir təsviri sənət sərgisidir. 106 ildir ki, davam edən “Biennali” təsviri sənət sahəsində dünya miqyasında ən möhtəşəm tədbirdi.

6 ay müddətində davam edən sərgidə bu dəfə dünyanın 150-dən artıq ölkəsi iştirak edəcək. Sərgiyə qatılan dövlətlər hər tərəfdən su ilə əhatələnən, İtaliyanın ən bahalı şəhərlərindən sayılan Venesiyada yer alaraq, öz pavilyonlarını quraşdırırlar.

Sevindirici haldır ki, bizim Mədəniyyət və Turizm Nazirliyimizin də ölkəmizin bu möhtəşəm incəsənət bayramında iştirakı üçün səyləri baş tutdu və Azərbaycan təsviri sənəti Venesiya “Biennalisi” ilə bir daha dünya miqyasına çıxmış olur. Təbii ki, bu, təsadüfi deyil. Çünki çağdaş Azərbaycan incəsənəti son 15 ildə qlobal məkana sürətli inteqrasiya yolu keçmişdir. Hazırda çağdaş Azərbaycan incəsənətində bütün önəmli cərəyanların nümayəndələrinə rast gəlmək mümkündür. Bu fakt 2007-ci ildə Azərbaycanın ilk dəfə bir pavilyonla təmsil olunduğu “Biennali”də bir daha öz təsdiqini tapdı.

İncəsənətin ən müxtəlif sahələrinin təmsil olunduğu sözügedən sənət və estetik zövq məbədində bu dəfə də Azərbaycan guşəsi olacaq, burada milli və müasir təsviri sənətimiz bir daha kompleks halında təqdim ediləcək.

İlk iştirakımızın yaddaqalan və maraqlı olduğunu xatırladan Mədəniyyət və Turizm Nazirliyi təsviri və dekorativ sənət sektorunun müdiri Leyla Axundzadə bu dəfə də maraqlı kompozisiya ilə seyrçilərin diqqətini cəlb edəcəklərinə əmin olduğunu bildirdi: «Birinci dəfə yüksək səviyyədə təmsil olunduğumuz tədbirdə sırf müasir incəsənət nümunələrimizi əsasən gənclərin təqdimatında sərgilədik. Builki sərgidə təsviri sənətimizin ən görkəmli nümayəndələrindən biri, böyük rəssamımız Tahir Salahovun da bir əsəri nümayiş etdiriləcək. Onun sərt üslubda işlənmiş «Sənə, bəşəriyyəti!» adlı əsərini aparırıq. Bundan başqa, maraqlı instalyasiya da nümayiş etdirəcəyik. Bu, Teymur Rüstəmovun «Mən inanıram» adlı instalyasiyası olacaq. Kompleks şəkildə işlənilən əsərdə insan, onun yaşantıları, ətrafında cərəyan edən proseslərə münasibəti və sanki etiraza bənzər reaksiyası fonundakı inamı təsvir olunub. İşə tamaşa edən insanlar paralel olaraq slayd-şouya da tamaşa edəcəklər. Təsvirlərdə, demək olar, bütün XX əsr - baş verən müharibələr, inqilablar, qlobal tədir-təəssüratlı hadisələr öz əksini tapıb. Yəni həmin instalyasiyaya tamaşa edən hər kəs orada özünü, yaşantılarını tapacaq və bütün bu sıxıntılara, mürəkkəbliklərə baxmayaraq, daxili gücünü, mübarizə ruhunu, yaşam əzmini işə salıb, «Mən inanıram!» deyəcək».

Bu nümunələrdən başqa, iki tanınmış rəssamın əsərlərinin müşayiətindən maraqlı kantrast yaradacaqlarını da diqqətə çatdıran sektor müdiri burada zahiri gözəlliklə daxili sıxıntıların, mənəvi müharibələrlə fiziki gözəlliklərin sintezinə nail olacaqlarını dedi: «Burada iki istedadlı rəssam, məşhur qrafika və keramika ustası Nailə Sultanla daxili çəkişmələrindən incəsənət nümunəsi yarada bilən Niyaz Nəcəfovun işlərindən harmonik bir ortam alınacaq. Bir tərəfdə miniatür sənətimizi davam etdirən Nailənin mili sənətimizi müasir tərzdə, çox incə və çox zövqlə təqdim edən bu nümunələri sərgilənəcək. Onunla kantrastda - özünəməxsus və maraqlı üslubu ilə diqqət çəkən Niyaz Nəcəfovun işləri sərgilənəcək. Özünün kifayət qədər mürəkkəb taleyini, yaşantılarını içindən keçirən və yalnız qələbə ehtirası və çalarları ilə yaradıcılığına gətirməyi bacaran Niyazın işlərinin maraqla qarşılanacağına əminəm. Çünki onun işlərinə baxan hər kəs istənilən halda bu müəllfin həyat tərzini, daxili mübarizələrini, mürəkkəb taleyini “oxuyacaq”, məhz bu elementlər sayəsində çox maraqlı rəssam ola bilməsini hiss edəcək və alqışlayacaq. Təbii ki, belə nümunələr izləyicini də mübarizliyə, haqq və sənət savaşı ruhuna kökləyir. Düşünürəm ki, milli miniatürlərdəki incə elementlərlə mürəkkəb kompozisiyalı rəngkarlıq əsərləri bizi istəyimizə qovuşduracaq.

Kantrastda daxili aləmi, emosional problemləri, dünyada baş verən hadisələri özündən keçirən insanla gözəlliklər aşiqi, bütün bu çatışmazlıqları sanki unutduran, onları özünə yaxın buraxmayan miniatürləri qarşılıq hisslərin fonunda təqdim edəcəyik».

Sərgidə bundan başqa iki videart da nümayiş olunacaq. Bunlar gənc rəssam Fərid Rəsulovun «Ətalət» və Teymur Daiminin işləridir.

Üçüncü və daha geniş otağın isə bu dəfə də milli ənənələrə - xalça sənətimizə ayrıldığını bildirən müsahibim burada ən incə detalların belə nəzərə alınacağını dedi: «Azərbaycan xalça sənətini əks etdirən bütün məktəblərin təqdim olunacağı ekspozisiyanı interaktiv oyunla daha da maraqlı etməyə çalışacağıq. Belə ki, xalçalarımıza tamaşa edən izləyicilər slayd - şouya da baxacaqlar. Burada bizim bütün rəssamlıq məktəblərimiz əks olunacaq. Tərlan Qorçinin Azərbaycan xalçası mövzusunda hazırladığı impovizasiyalar olacaq. Bundan başqa, ziyarətçilər kompyuterdə toplanmış xalça elementlərimiz əsasında simvolik olaraq xalça da «toxumuş» olacaqlar. Yəni elementləri toplayaraq bir xalça təsviri yaradacaq və onu çap edəcəklər. Tamaşaçılar üçün təşkil etdiyimiz bu interaktiv oyun təbliğat baxımından da əhəmiyyətlidir. Çünki hər bir elementi bir-birinə uyğun şəkildə toplayan, yığan insan onların Azərbaycana məxsusluğunu yaddaşlarına həkk etmiş olacaqlar. Bilirsiniz ki, hər zaman Azərbaycan xalçaları, onların naxış və digər elementlərinin yadlar, xüsusən məlun qonşumuz tərəfindən mənimsənilməsi cəhdinə rast gəlirik».

Sərgidə nümayiş olunacaq işlərdən ibarət açıqcaların da hazırlandığını əlavə edən L. Axundzadə noyabrın sonunadək davam edəcək möhtəşəm tədbirdə Azərbaycan incəsənətinin bir daha öz layiqli qiymətini alacağına əminliyini ifadə etdi.

Həmidə

Mədəniyyət. - 2009.- 3 iyun.- S. 4.