Kitabımızın növbəti uğuru

Son illər ölkəmiz beynəlxalq aləmdə, yaxın və uzaq xarici ölkələrdə keçirilən kitab sərgiləri və müsabiqələrində daha yaxından iştirak edir. Bu, bir tərəfdən Azərbaycan kitabının dünyada təbliği baxımından əhəmiyyətlidirsə, digər tərəfdən, beynəlxalq təcrübənin Azərbaycana gətirilməsi və kitab sənətimizin daha da inkişaf etdirilməsi baxımından əhəmiyyətlidir.

İllər keçdikcə kitabla bağlı Mədəniyyət və Turizm Nazirliyinin qatıldığı tədbirlərin sayı artmaqdadır. Və sevindirici haldır ki, bu tədbirlərdə Azərbaycan kitabına maraq da günü-gündən artır. Azərbaycan kitabı həm mövzu və ideyası, həm də poliqrafik keyfiyyəti ilə kitabsevərlərin, eyni zamanda mütəxəssislərin diqqətini cəlb etməkdə davam edir.

Bu yaxınlarda Moskvada keçirilən VI Beynəlxalq “Kitab sənəti” Müsabiqəsinin nəticələri də sevindiricidir. Ənənəvi olaraq MDB ölkələri “Dövri mətbuat, kitab nəşri, kitab yayımı və poliqrafiya məsələləri üzrə” Dövlətlərarası Şurasının təşəbbüsü ilə keçirilən tədbirdə Azərbaycandan Mədəniyyət və Turizm Nazirliyi Nəşriyyat sektorunun müdiri, şair Çingiz Əlioğlu iştirak edirdi. Məlumat üçün bildirək ki, Çingiz müəllim Dövlətlərarası Şuranın həmsədri, müsabiqənin Təşkilat Komitəsinin və Münsiflər Heyətinin üzvüdür.

Öncədən qeyd edək ki, müsabiqədə iştirak edən 11 kitabımızdan 3-ü müxtəlif nominasiyalar üzrə 2-ci və 3-cü yerlərə layiq bilinib.

Müsabiqə barədə təəssüratını bizimlə bölüşən Ç.Əlioğlu öncə bunları söylədi: “Rusiya Federasiyası və Belarus kimi nəşr nəhəngləri ilə eyni müsabiqədə iştirak edib hər hansı yerə sahib olmaq o qədər də asan məsələ deyil...”

Məlumat üçün bildirək ki, adıçəkilən ölkələr müsabiqənin münsiflər heyətində 3, Ukrayna, Azərbaycan, Qazaxıstan, Qırğızıstan, Özbəkistan və başqa respublikalar 1 nəfər nümayəndə ilə iştirak ediblər. Bu il ilk dəfə olaraq tədbirə qədim kitab nəşri mədəniyyəti olan Estoniya da qoşulub.

200-dən artıq kitabın qiymətləndirildiyi müsabiqədə əsasən çap məhsulları ideyasına, poliqrafiya icrasına və ünvanlandığı oxucu auditoriyasına görə seçilib. Kitablar 8 nominasiya üzrə qiymətləndirilib: “Qələbə” (İkinci Cahan Müharibəsinə aid kitablar), “Birlik”, “Ölkəm”, “Uşaq və gənclər üçün kitablar”, “Bizim müasirimiz”, “Art-klub”, “Birlikdə nəşr olunmuşdur” və “Qran Pri”.

“Bizim müasirimiz” nominasiyası üzrə Heydər Əliyev Fondunun nəşr etdiyi “Rafiq Babayev” adlı fotoalbom və elektron nəşri 2-ci yerə layiq bilinib.

İkinci yerə layiq bilinən daha bir kitabımız “Uşaq və gənclər üçün kitablar” nominasiyasına təqdim olunan istedadlı yazıçı Solmaz Amanovanın “İrs” kitabı olub. Kitabın qiymətləndirilməsi ilə bağlı təəssüratlarını bölüşən Ç.Əlioğlu qeyd etdi ki, “İrs” kitabı eyni nominasiyada birinci yeri tutan Ukrayna və Belarus kitablarına cəmi 0,5 xalla uduzub: “Nəzərə almaq lazımdır ki, “Uşaq və gənclər üçün kitablar” nominasiyasına qalib gələn kitablar son dərəcə bahalı və zəngin poliqrafiya icrasına məxsus idilər. Buna baxmayaraq, ideyası, tərtibatı və müəllif tərəfindən işlənməsi etibarı ilə daha üstün cəhətlərə malik olduğuna görə bizim kitaba cüzi üstünlüklə və çox çətinliklə qalib gəldilər”.

Solmaz Amanovanın daha bir kitabı “Birlikdə çap olunmuşdur” nominasiyasında 3-cü yerə layiq bilinib. “Anatomik teatr” adlanan kitabda Rusiya Elmlər Akademiyasının 2 üzvü rəyçi kimi iştirak etmişdir.

VI Kitab Müsabiqəsinin birinci mükafatına (Qran Pri) isə müsabiqə tarixində ilk dəfə olaraq Belarusun və Rusiya Federasiyasının 2 kitabı layiq görülüb.

Ç.Əlioğlu: ““Qran Pri” Rusiya Rəssamlar Akademiyasının həqiqi üzvü tərəfindən hazırlanmış orijinal bürünc fiqur və 1 milyon rublla mükafatlandırıldı. Xatırladım ki, bütünc fiqur da sənət əsəri kimi çox qiymətlidir”.

Məlumat üçün bildirək ki, Azərbaycan kitabı 8 nominasiyadan yalnız beşində (“Ölkəm”, “Uşaq və gənclər üçün kitablar”, “Bizim müasirimiz”, “Art-klub”, “Birlikdə nəşr olunmuşdur”) təmsil olunub.

İndiyə qədər isə Azərbaycan kitabı Qran Pri almasa da bir neçə dəfə birinci yerə layiq bilinib.

Kitabımıza yeni-yeni və təbii ki, daha böyük uğurlar arzulayırıq. Çünki kitab mədəniyyətlərin dialoqu kimi qlobal bir məsələdə ən tutarlı vasitələrdəndir.

Şərif

Mədəniyyət.- 2009.- 10 iyun.- S. 3.