Müdrik şəxsiyyət, siyasətçi, rəhbər...

Bu xalqı fəxarətləndirmək üçün doğulmuş İnsan!

Bəli, o, «Mən həmişə fəxr etmişəm, bu gün də fəxr edirəm ki, mən Azərbaycanlıyam!» deyirdi. Onun bu sözlərindən sonra «fəxr» və «Azərbaycanlı» ifadələri adamın dilində daha gözəl, daha əzəmətli, daha fəxarətli səslənir. Artıq, düz 40 ildir ki (1969-cu ildən) bu xalq da öz ürəyində, söhbətlərində, dəftər-kitablarında, efir-ekranlarında, ev-eşiyində, yurdiçi və yurddışında fəxr edir ki, Heydər Əliyev məhz onun oğludur! Təkcə oğlumu? Heydər Əliyev artıq həm də bu xalqın babası - hətta, gördüyü işlərin fiziki və mənəvi həcminə, ötənək və gələnəklərimizə müdrik münasibətinə, ən klassik və ən müasir düşüncələrinə görə, bu xalqın ulu babasıdır.

Heydər Əliyev çox tarixçələri tarixləşdirib; onlardan biri də 15 İyundur. 1993-cü ilin 15 iyunu. Təqvim üçün çox adi səslənən bu tarixçə onun hakimiyyət başına ikinci gəlişi sayəsində Milli Qurtuluş Günü kimi şərəflənib.

Həmin GÜN haqda düşünəndə gözlərimiz önünə nələr gəlmir? Gəlin, bir anlığa həmin günün ərəfəsini xatırlayaq: Başsız bir bədən kimi çapalayan Azərbaycan. Baş olmadığına görə qollar min budağa əl atır; siyasi düşərgədə «partiya»laşan kim, «cəbhə»ləşən, «region»laşan, «məhəlli»ləşən, çəpərləşən kim…

Ayaqlar ən ümummilli qadağa sərhədlərini belə tapdayıb keçir; siyasi «özfəaliyyət» orduya, ölkəni parçalamaq üçün etnik toplumlara, maddi-mənəvi, əqli nemətlərimizin dağıdılmasına, infrastrukturun aşınmasına doğru addımlayır.

Bu bədənin sinəsində isə Qarabağ ürəyi çırpınmaqda…

Bəli, Azərbaycan məhv olmaqda, onun sədaqətli, işgüzar, halal xalqı isə, yaxın keçmişə qədər rəhbərliyi altında qurub-yaratdığı Heydər Əliyevi təkidlə hakimiyyətə dəvət etməkdə…

Nəhayət, həmin gün böyük xilaskar Bakıya gəlir və elə o gündən başlayaraq, bir müddət sonra Milli Qurtuluş Günü kimi əzizləyib bayramlayacağımız ümummilli işığa doğru yol başlayır.

Bu gəliş milli gəliş idi, xalqın böyük sabahının, böyük inkişafının, böyük uğurlarının gəlişi idi. Bu gəlişlə Azərbaycanın taleyi ilə pərdəarxası oyunların, oyunçuların gedişi başlandı. Ölkədə baş verən özbaşınalığın, cinayətkarlığın, hərc-mərciliyin qarşısı alındı. Bütün neqativlər önləndi və bir qism «müasir» nankorun «dünən» kimi təqdim etməyə çalışdığı Heydər Əliyev günümüzün və bütün gələcəyimizin Öndəri mərtəbəsinə ucaldı.

Heydər Əliyev ölkədə bu gün şahidi olduğumuz ictimai-siyasi sabitliyə, iqtisadi inkişafa, beynəlxalq nüfuza mərhələ-mərhələ nail oldu. O, öncə, hakimiyyətə qanunsuz yolla gəlmək istəyənlərin cəhdlərinə, daha sonra məlum «atəşləs»lə xalqa məhrumiyyətlərdən başqa, hələlik heç nə vəd etməyən müharibəyə son qoydu. Hələ qarşıda görəcəyi və görüləcək çox işlər olsa da, qətiyyətlə bəyan etdi: «Azərbaycanın dövlət müstəqilliyi əbədi olacaqdır, sarsılmaz olacaqdır, dönməz olacaqdır». Bir qədər sonra tam əminliklə bildirdi: «Azərbaycanın müstəqilliyi əbədidir!».

Öz siyasəti, uzaqgörənliyi, müdrikliyi sayəsində xarici və… təəssüf ki, həm də daxili - «doğma» düşmənlərimizin planlarını iflasa uğradan böyük öndər qüdrətli dövlət quruculuğu prosesinə zəmin yaratdı və 1995-ci il noyabrın 12-də ümumxalq referendumu yolu ilə müstəqil Azərbaycan Respublikasının ilk Konstitusiyası qəbul olundu.

40 ildən çox - xalqın bütün böyük sənət və siyasət adamlarına fəxri adlar verən bu müdrik şəxsiyyət elə həmin xalqın qəlbindən daha fəxri, daha şərafətli adlar aldı: öndər, ümummilli lider!..

Böyük söz adamları tarixi şəxsiyyətlər haqda çox fikirlər söyləyiblər. Onlardan biri də (bir qədər qəribə görünsə də) belədir: «Şəxsiyyət 1, xalq altı sıfırdır. 1 altı sıfırın qarşısında olanda milyon yaranır, olmayanda heçlik. Elə 1 özü də altı sıfırsız qərəmdən başqa bir şey deyil…

Bizim müdrik xalqımız isə, daha aydın, daha mükəmməl, lakonik frazalar yaradır. İndi bütün Azərbaycan «Heydər - xalq, xalq - Heydər» tərkibli ümumxalq deyiminin fərqindədir. Bu kimi deyimlər günü-gündən öz aktuallığını artırır. Bunun əsas səbəblərindən biri də böyük öndərimizin - sözun hər mənasında - yetirməsi və davamçısı olan prezident İlham Əliyevin ölkəmizin kompleks inkişafı üçün apardığı daxili və xarici siyasətidir.

Əhməd Ramazanov,

Sabirabad rayon Mədəniyyət

və Turizm şöbəsinin müdiri

Mədəniyyət.- 2009.- 12 iyun.- S. 3.