Minbir roldan biri – özü

Bu obrazın adı: “İ.N.Kamal - 60”

Bu ilin yanvarında Azərbaycanın məşhur komediya ustası, xalq artisti İlham Namiq Kamalın 60 yaşı tamam oldu. Yubileylə əlaqədar olaraq, artıq neçə vaxtdır ki, silsilə tədbirlər həyata keçirilməkdədir. Ötən həftə isə sevimli aktyorumuz öz sənət dostları və tələbələri ilə birgə Dövlət Mədəniyyət və İncəsənət Universitetinin nəzdində olan Səda Tədris Teatrında da maraqlı bir tədbirlə çoxlarını sevindirdi.

Tədbirdə Aqşin Babayev, Valeh Kərimov, Hacı Cəfər Namiq Kamal, Arif Quliyev, Xanım Qafarova, Ramiz Əzizbəyli və başqaları iştirak edirdi. Əvvəlcə gülüş ustasının yaradıcılıq yolundan söz açıldı. Azərbaycanın mədəniyyət və incəsənətində böyük rolu olan aktyorun ifa etdiyi rollardan danışdı. Tamaşalarından göstərilən fraqmentlər, ünvanına səslənən təbrik teleqramları isə tədbirdə canlanma yaratdı. Həmçinin sənət dostlarının təbrik nitqləri auditoriyaya səmimiyyət qatdı. Səbəbkar özü Rza Təhmasibi, Adil İsgəndərovu və başqa müəllimlərini yada salıb bir aktyor kimi yetişməsində onların böyük rolu olduğunu vurğuladı.

Sənət dostu Ramiz Əzizbəyli öz çıxışında İlhamla onu həm maddi, həm də mənəvi tellərin bağladığını dedi: “Biz uzun zaman nəinki eyni dram dərnəklərində, xalq teatrlarında da çalışmış, hətta bir məhlədə yaşamışıq. Bununla da bizdən asılı olmayaraq, mənəvi dünyamız da yaxınlaşmağa başlayıb”.

Universitetin aktyor sənəti fakültəsinin dekanı, əməkdar artist Ötkəm İsgəndərov, sənətşünaslıq fakültəsinin dekanı Vəfa Əliyev də öz növbəsində sənətkarı təbrik edib, ona yeni- yeni nailiyyətlər və ən əsası ailə xoşbəxtliyi arzuladılar.

H.Seyidzadənin rejissorluğu ilə çəkilmiş “Qayınana” filmindən, Altay Məmmədovun “Kişilər” əsərindən, Ədalət Ziyadxanovun quruluş verdiyi “Mehmanxana sahibəsi” teletamaşasından göstərilən parçalar da zalda gülüş və alqış səslərinin yaranmasına səbəb oldu. Həmçinin bu gecənin ssenari müəllifi olan Aqşin Babayevin qələmə aldığı “Nekroloq” əsərindən də fraqment tamaşaçıların ixtiyarına verildi. “Xoşbəxt o kəsdir ki, sağlığında tamaşaçı məhəbbəti qazanır”...”Hər bir sənətkara nəsib olmur ki, onu hər yaşın adamları sevsin”...Tədbirdə bu kimi fikirlər çox səsləndi. Yubilyarın həmkarı, xalq artistimiz Telman Adıgözəlov zarafatından da qalmadı: “Müdir haqqında nə demək olar? O, dahidir!” Telman müəllim zarafatla dostuna göz dəyməsin deyə, özü ilə bir maşın üzərrik gətirdiyini də açıqladı. Yaşar Nuri də, Telman Adıgözəlov da şirin xatirələrə dalıb İlhamla birgə başlarına gələn maraqlı əhvalatlardan söz açdılar.

A.Şaiq adına Kukla Teatrının əməkdaşları öz maraqlı çıxışları ilə, universitetin musiqi sənəti kafedrasının müdiri Simarə İmanova isə gözəl ifası ilə yubilyarı təbrik etdi.

Sonda İlham Namiq Kamalın Xanım Qafarova ilə birgə, “Mən dəyərəm min cavana” adlı yeni tamaşasından canlı olaraq, göstərdikləri bir səhnə alqışlarla qarşılandı.

Yəqin ki, komediya ustasının ünvanına hələ çox təbriklər söylənəcək. Biz də «Mədəniyyət» qəzetinin bütün işçi heyəti adından sənətkarımızı 60 illik yubileyi münasibətilə təbrik edir və ona həm yaradıcılığında, həm pedaqoji fəaliyyətində, həm də şəxsi həyatında uğurlar arzulayırıq.

Maraqlı rolları ilə hamını güldürən, eyni zamanda da düşündürən aktyorumuzun qat- qat böyük yaş yubileylərindən sonra görüşmək ümidilə...

Könül NƏCƏFOVA.

Mədəniyyət.- 2009.- 13 mart.- S. 5.