"Yeniləşən Azərbaycana yeni məktəb"

Təhsilimizdə yeni mərhələ

2005-ci ildən başlayaraq "Yeniləşən Azərbaycana yeni məktəb" layihəsi çərçivəsində ölkəmizin müxtəlif bölgələrində, o cümlədən ucqar dağ kəndlərində məktəblər tikməklə Heydər Əliyev Fondu müasir gəncliyin savadlı yetişməsinə, ümumən, respublikamızın inkişafına öz töhfəsini verir.

Fondun "Yeniləşən Azərbaycana yeni məktəb" layihəsi çərçivəsində Kürdəmirdə inşa olunan 300 yerlik, Göyçay rayonunun Qarabağlar və Mirzəhüseynli kənd orta məktəbləri üçün yeni binalar şagirdlərin yüksək təhsillə əhatə olunmasına imkan verəcək. Neftçala rayonunda Kürqarabucaq, Masallı rayonunda isə İkinci Yeddioymaq kəndlərindəki yeni məktəb binaları tədrisin keyfiyyətini yüksəltməyə kömək edir. Son dövrlərdə Heydər Əliyev Fondunun təşəbbüsü ilə Lənkəranın Səpnəkəran, Daştatük, Tatoba, Tuado kənd orta məktəbləri, Beyləqan və Astara şəhərlərində yeni təhsil ocaqları inşa olunub.

Heydər Əliyev Fondunun prezidenti Mehriban xanım Əliyeva "Yeniləşən Azərbaycana yeni məktəb" proqramının ikinci mərhələsinin təqdimatına həsr olunmuş dəyirmi masadakı çıxışında demişdir: “Müasir dünyada hər bir ölkənin inkişafı onun dünya birliyinə inteqrasiyası üçün təhsilin rolu əvəzsizdir. Məhz buna görə Heydər Əliyev Fondu yarandığı ilk gündən təhsilə yardımı öz fəaliyyətinin prioritet istiqaməti elan etmişdir".

Heydər Əliyev Fondunun təhsillə bağlı qarşıya qoyduğu əsas məqsəd Azərbaycanda bu sahənin qloballaşan dünyanın tələbləri səviyyəsində qurulmuş, milli təhsil modelinin gerçəkləşdirilməsinə zəmin formalaşdırmaqdan ibarətdir. Layihə çərçivəsində yalnız 2005-ci ildə ölkəmizin müxtəlif bölgələrində rekord sayda məktəb binasının və əlavə tədris korpuslarının tikilərək istifadəyə verilməsi, onların lazımi avadanlıqlarla təchiz olunması bu sahəyə əvəzsiz töhfədir.

Fondun rəhbəri Mehriban xanım Əliyeva 2005-ci ilin əvvəllərində Bakıda və əksər rayonlardakı uşaq evləri və internat məktəblərində olduqdan sonra "Uşaq evləri və internat məktəblərinin inkişafı proqramı"nın hazırlanıb həyata keçirilməsinə başlanılmışdır. Respublikamızdakı uşaq evləri və internat məktəblərində mövcud problemlərin həllinə yönələn bu proqram ötən illər Heydər Əliyev Fondunun fəaliyyətinin başlıca istiqamətlərindən birinə çevrilmişdir. Bir çox uşaq müəssisələrində yenidənqurma və tikinti-təmir işləri aparılmışdır. Onların zəruri avadanlıqlarla təmin edilməsi, yeni ədəbiyyatlarla zənginləşdirilmiş kitabxanaların yaradılması, informasiya texnologiyalarının tətbiqi, sinif otaqlarının interaktiv təhsil üçün uyğunlaşdırılması da diqqət mərkəzində olmuşdur. Əlavə yardımçı binalar, sanitar-gigiyenik normalara cavab verən müasir tipli yeməkxanalar, yataq otaqları, həkim və psixoloq otaqları, idman meydançaları və salonları yaradılmış, yay istirahət düşərgələri inşa edilmişdir.

Heydər Əliyev Fondunun prezidenti Mehriban xanım Əliyeva üzərinə götürdüyü şərəfli missiyanı belə dəyərləndirir: "...İstər YUNESKO-nun xoşməramlı səfiri, istərsə də Heydər Əliyev Fondunun prezidenti kimi mənə ehtiyac olduğunu hiss edirəm. Mənim adıma hər gün 200-dən çox məktub gəlir. Onların heç biri diqqətsiz qalmır. Mən konkret iş görmək, konkret insanlara kömək etmək istəyirəm... Bu, mənim seçimimdir".

Eyni zamanda Fond milli təhsil sisteminin inkişafı naminə bir sıra nüfuzlu beynəlxalq qurumlarla əməkdaşlığı da vacib sayır, Azərbaycanla YUNESKO arasında təhsil sahəsində bir neçə istiqamətdə əməkdaşlıq əlaqələri qurmuşdur. Bu əlaqələr əsasən "Təhsil hamı üçün" proqramını, "Assosiativ məktəblər" texniki peşə sahəsində əməkdaşlıq, inklüziv təhsil layihəsi, ali məktəblərdə YUNESKO kafedralarının yaradılması və digər sahələri əhatə edir.

Göründüyü kimi, Fondun beynəlxalq əməkdaşlığı da ilbəil genişlənir. Respublikamızda kor və ya görmə qabiliyyəti zəif olan şəxslərin sayı təxminən 40 min nəfərdir. Heydər Əliyev Fondu onlara əlavə imkanlar yaratmaq mexanizmi kimi informasiya-kommunikasiya texnologiyalarından (İKT) istifadəni zəruri saymışdır. Bu məqsədlə "Kor və görmə qabiliyyəti zəif olan insanlar üçün informasiya-kommunikasiya texnologiyalarına çıxışın təmin edilməsinə dair" layihə hazırlanmış və BMT-nin İnkişaf Proqramı ilə birgə həyata keçirilmişdir. Proqram çərçivəsində milli strategiya hazırlanmış, kor və görmə qabiliyyəti zəif olan uşaqlar üçün internat məktəblərdə model İKT sinfi yaradılmış, xaricdən xüsusi kompüter avadanlığı alınıb quraşdırılmış, audio səsyazma studiyası, kitabxana yaradılmış, proqram təminatı lokallaşdırılmış, internetə çıxış və tədris-təlim proqramlarının hazırlanması təmin edilmişdir.

Heydər Əliyev Fondu ölkəmizdə yasayan milli azlıqların təhsilinin inkisafına da diqqət və qayğı ilə yanaşır. 2006-cı ildə Heydər Əliyev Fondu “Təhsilə dəstək” layihəsi çərçivəsində Qax rayonunun Qax-İngiloy kənd orta məktəbinin 1-2-ci sinif şagirdlərinə gürcü dilində nəşr edilən yeni dərsliklər və məktəb ləvazimatı paylamışdı.

Heydər Əliyev Fondunun təhsilə qayğısı təkcə respublikamızla məhdudlaşmır. Fondun bu istiqamətdəki fəaliyyətinin cografiyası gündən-günə genişlənir. Artıq beynəlxalq aləmdə də nüfuzlu bir qurum kimi tanınan Fond xeyriyyəçilik missiyasını bir neçə ölkədə də uğurla davam etdirir. Gürcüstanda yaşayan azərbaycanlıların təhsillə bağlı problemlərinin aradan qaldırılması üçün hər il dövlət xətti ilə yanaşı, Fond tərəfindən də böyük yardım edilməsini soydaşlarımız dərin minnətdarlıq hissi ilə qarşılayır.

Rusiyanın paytaxtında və ayrı-ayrı şəhərlərdə fəaliyyət göstərən Azərbaycan məktəblərinə göstərilən müntəzəm qayğı xüsusilə qeyd olunmalıdır. 2007-ci ildə Hollandiyanın paytaxtı Amsterdamda fəaliyyətə başlayan Azərbaycan məktəbi də Fondun diqqətindən kənarda qalmamış, məktəbə kompyuter dəsti və dərs vəsaiti göndərilmişdir.

2008-ci ilin fevralinda isə Fondun “Təhsilə dəstək” layihəsi çərçivəsində Pakistanın Müzəffərabad şəhərində dağıdıcı zəlzələ nəticəsində yararsız vəziyyətə düşən məktəb yenidən tikilərək, istifadəyə verilmişdir. Təhsil ocağı yüksək səviyyəli tədrisə imkan yaradan avadanlıqla təmin olunmuşdur.

Rusiyanın “Puşkin kitabxanası” Fondu ilə qurulan əməkdaşlıq da ölkəmizdə elm, təhsil və mədəniyyətin inkisafına yönələn dəyərli hadisədir. Rusiyada son illər nəşr edilən müxtəlif elm sahələrinə aid 4 min kitab, 800 dərslik Fondun və şəxsən Mehriban xanımın təşəbbüsü ilə respublikamızın ali məktəblərinə təqdim edilmişdir.

Təhsil sahəsində Fondun ən böyük və irimiqyaslı işi olan “Yeniləşən Azərbaycana yeni məktəb” layihəsi uğurla yerinə yetirilir.

İntiqam

Mədəniyyət.- 2009.- 9 may.- S. 21.