Çay daşlarının möcüzəsi

Müşfiqabad qəsəbə mədəniyyət evində mədəniyyət evinin direktoru Ə.Həsənovun təşəbbüsü ilə istedadlı gənc rəssam Ədalət Elmanın əsərlərindən ibarət sərgİ keçirildi. Sərgini giriş sözü ilə açan Qaradağ rayon Müşfiqabad qəsəbə nümayəndəsi Rəşad Qubadov bildirdi ki, rəssamın yaradıcılığında Azərbaycan xalqının tarixi keçmişi, bu günü və sabahı öz əksini tapıb: «Azərbaycanın sənət adamlarının, tarixi şəxsiyyətlərin obrazlarını kiçik çay daşlarının üzərində məharətlə canlandırıb. Ədalət ovuc içi boyda çay daşları üzərində böyük, zəngin bir dünya yaradıb. Ulu öndərimiz Heydər Əliyev vaxtilə Ədalət Elmanın sərgisində iştirak etmiş, rəngarəng çay daşları üzərində yaratdığı sənət nümunələrinə böyük qiymət vermişdir».

Qeyd edək ki, ulu öndər Heydər Əliyevin 86 illiyinə həsr olunmuş «Çay daşlarının möcüzəsi» adlı bu sərgidə kiçik daşlar üzərində işlənmiş nadir sənət nümunələri, tarixi keçmişimizi, bu günümüzü əks etdirən sənət əsərləri nümayiş etdirildi. Sərgidə nümayiş etdirilən əsərlər içərisində S.Bəhlulzadənin, xalq qəhrəmanı Babəkin, xalqımızın böyük şairləri Nizaminin, Füzulinin, Nəsiminin, Sabirin canlı obrazları tamaşaçıları heyrətdə qoydu. H.Əliyevin anadan olmasının 86-cı ildönümünə həsr olunmuş kompozisiyada nümayiş etdirilən «Müqəddəs cütlük», «Ulu öndər», «Dahi» əsərləri tamaşaçıların böyük marağına səbəb oldu.

Tədbirdə çıxış edən Ədalət Elman bildirdi ki, o, mayın 10-da ümummilli liderin 86-cı ildönümü münasibətilə Xaçmaz Dövlət Rəsm Qalereyasında xüsusi sərgi keçirəcək.

ZÜMRÜD

Mədəniyyət. - 2009.- 9 may.- S. 16.