Uşaqlara sevgi ilə

Həsrətli baxışlar, nisgilli gözlər, mərhəmətə, qayğıya, maddi və mənəvi dəstəyə ehtiyacı olan insanlar. Onların hər birinin bir ömür hekayəti, var. Belələrinin sayı çoxdumu, azdımı, bilmirik. Bu insanların bir ümid yeri, inam ocağı, şəfqətli, mərhəmətli hamisi olduğunu isə hamımız bilirik. Bu, Heydər Əliyev Fondudur. Fondun gördüyü işlər arasında uşaqlara qayğı ön sıradadır. Fəaliyyət göstərdiyi beş il ərzində fondun dəstəyi ilə genişhəcmli layihələrə imza atılıb, mərhələ-mərhələ onların hamısı gerçəkləşib. Çoxlu yeni məktəblər tikilib istifadəyə verilib, köhnələr təmir olunub. «Uşaq evləri və internat məktəblərinin inkişafı» Proqramı çərçivəsində, respublikada 30-dan çox uşaq müəssisəsi əsaslı şəkildə təmir edilib, yeni avadanlıqlarla təmin olunub, yardımçı binalar tikilib, binaların kommunal şəraiti ən yüksək səviyyədə yaxşılaşdırılıb. Hər zaman olduğu kimi, gənc nəslin təlim və tərbiyəsinə ayrıca önəm verilir. Bu məqsədlə bütün müəssisələrdə kitabxanalar yaradılıb, onlar uyğun tədris vəsaiti ilə bədii ədəbiyyatla zənginləşdirilib. Uşaqların texniki biliklərinin artırılması üçün əksər uşaq evləri və internat məktəblərində kompyuter otaqları təşkil olunub, sinif otaqları interaktiv təhsil üçün uyğunlaşdırılıb.

Heydər Əliyev Fondunun qayğısı ilə əhatə olunan uşaq müəssisələrindən biri Nizami rayonundakı 1 saylı Uşaq evidir. Burda yaşayıb tərbiyə alan kimsəsiz uşaqlarla fondun rəhbərliyi arasında bir doğmalıq var. 1 saylı Uşaq evinin yaşı əllini ötüb. Ötən illər ərzində bura ata-ana qayğısından, valideyn himayəsindən məhrum olan minlərlə uşağa doğma ev, əziz məkan olub, çoxuşaqlı bir ailəni xatırladır. Bu ailənin dəyişməz, pozulmaz qanunları var: hər kəs daxili nizam-intizama əməl etməli, böyüklər kiçiklərə örnək olmalıdır. Qarşılıqlı hörmət, məhəbbət, mərhəmət- bunlar hər kəsin tapına biləcəyi duyğulardır. Hazırda bu isti ocaqda 120 nəfər məskunlaşıb. 3 yaşından 20 yaşınadək sakinlərin arasında ali məktəblərdə oxuyanlar, dövlətə hərbi xidməti borcunu yerinə yetirənlər də var. Onlar üçün ev, ailə sevgisi burdan başlayır, heç zaman da bitib-tükənmir.

2004-cü ildə 1 saylı Uşaq evi məhz Heydər Əliyev Fondunun prezidenti Mehriban Əliyevanın təşəbbüsü, qayğısı ilə yenidən qurulub, tam təmir olunub. Burada çoxlarının həsəd apara biləcəyi, Avropa standartlarına cavab verən şərait yaradılıb. Tam təminatlı yataq, məşğələ-dərslərə hazırlıq, rəssamlıq, tikiş, xalça, bədii naxış, biçmə-tikmə, toxuma, kompyuter otaqları, kitabxana, oxu zalı, yeməkxana, idman zalı və meydançası uşaqların ixtiyarındadır. Uşaq evinin sakinləri Fonddan ən qiymətli hədiyyəni bu il alıblar. Yeni ilin ilk ayında Fondun prezidenti Mehriban Əliyeva kiçik dostlarının görüşünə gələndə yeni beşmərtəbəli binanın açılışında iştirak edib. Onun təşəbbüsü ilə 18 yaşına çatmış qızların müvəqqəti yaşaması üçün tikilən bu binada ikinəfərlik, birotaqlı, lazımi avadanlıq və əşyalarla tam təmin olunmuş, hər mənzilin ayrıca, yaraşıqlı mətbəxi, sanitar qovşağı olan 50 otaq var. Bununla yetkinlik yaşına çatanda uşaq evindən ayrılmalı olan qızların ən ağrılı problemi birdəfəlik həll olunub. Üstəlik, Fondun adından hədiyyə olunan təzə avtobus da uşaq evinin qayğılarını azaldıb. «Dövlətimizin, Heydər Əliyev Fondunun prezidenti Mehriban Əliyevanın sayəsində bizim uşaq evində böyüyüb tərbiyə alan balalarımız sabahlarından arxayındılar. Burda uşaqlara təhsil, tərbiyə, sənət verir, onları əsl vətəndaş, cəmiyyətə yararlı insanlar kimi böyüdürük»- bunu uşaq evinin direktoru Nərminə Zöhrabova deyir. Sonra da əlavə edir: «Mehriban xanım kimi mərhəmətli, incəqəlbli insanın, gözəl ananın olduğunu bilmək, ona güvənmək çox xoşdur» - uşaqlar bu fikri tez-tez təkrarlamağı sevirlər. «Biz burda ata-anasız olduğumuzu hiss etmirik, Mehriban xanım öz qayğısı ilə bütün acıları unutdurub. O bizim ən yaxın rəfiqəmizdir» - bunu isə yaşıdları Aydana, Nəcibəyə, Səmarəyə, Xoşbəxtə, Kəmaləyə danışmağa aman verməyən dilli-dilavər Aynur deyir. Deyir, sonra da bəxtəvər-bəxtəvər gülümsəyir. Gülümsər çöhrə qızlarımıza çox yaraşır.

Uşaq ilində ən gözəl töhfə alanlardan biri də kor uşaqlar üçün musiqi məktəbinin şagirdləridir. Xalq çalğı alətləri - tar, kamança, qarmon, nağara, xanəndəlik, fortepiano və musiqi nəzəriyyəsi şöbələrində təhsil alan bu uşaqların hamısı Gözdən əlil uşaqlar üçün internat məktəbində oxuyurlar. Onlar bura respublikamızın müxtəlif bölgələrindən gəliblər. Fiziki cəhətdən qüsurları olsa da, orta məktəb proqramı ilə yanaşı, musiqi təhsili almağı da arzu edirlər. Aralarında istedadlı uşaqlar çoxdur. Arzularının gerçəkləşməsində onlara Heydər Əliyev Fondu yardımçı olub, musiqisevərlərə yaraşıqlı, təmiz, səliqəli bir məktəb hədiyyə olunub. Musiqi məktəbinin direktoru Əsab Əliyevin təmirlə bağlı müraciətinə müsbət reaksiya verilib, çox qısa müddətdə - cəmi beş aya köhnə binada köklü təmir işləri aparılıb, əlavə otaqlar tikilib, avadanlıqlar təzələnib, yeni musiqi alətləri alınıb, qaz, istilik, su və işıq sistemləri yenilənib. 12 dərs otağı, kitabxana, akt salonu uşaqların ixtiyarındadır. Məktəbin direktoru həyatın bir çox gözəlliklərindən məhrum olan uşaqlara Mehriban xanım Əliyevanın, Mədəniyyət və Turizm Nazirliyinin, Bakı Şəhər Mədəniyyət və Turizm İdarəsinin qayğısını ən humanist addım kimi dəyərləndirərək, yaradılan şəraitə görə uşaqların təşəkkürünü «Mədəniyyət» qəzeti vasitəsilə çatdırdı: «Diqqətə, qayğıya, səmimi münasibətə, doğmalığa görə minnətdarıq. Təzə məktəb bizə daha geniş imkanlar yaradır. Bizim məktəbin istedadlı uşaqları respublikamızda, Türkiyədə keçirilən beynəlxalq festival və müsabiqələrdə həmişə fərqlənirlər. Onlar ən kiçik qayğıdan, yardımdan, isti, xoş münasibətdən fərəhlənir, bunun qarşılığını verməyə çalışırlar. Bu uşaqları xoşbəxt etməyə, könüllərini sevindirməyə dəyər». Əsab müəllim qəzetimizin bütün respublikamıza yayıldığını, oxunduğunu bildiyindən aidiyyəti orqanlara, rayonlarda yaşayan kor və zəif görən uşaqların valideynlərinə müraciət etdi: «Balalarınızın əlilliyindən kədərlənib onları elmsiz, biliksiz qoymayın. Bizim internat məktəbə, ordan da musiqi məktəbimizə yönləndirin. Gözdən əlillik həyatdan küskünlüyə gətirməməlidir. Belə uşaqlar dövlətin xüsusi himayəsində, Heydər Əliyev Fondunun qayğısı altındadır. Onların hər birinin orta təhsil, ali təhsil, musiqi təhsili almağa imkan var. Şikəst övladlarınızın gələcəyini bizə etibar edə bilərsiniz». Gözdən əlil olan Əsab müəllim müraciətini çox böyük yanğıyla söylədi, sonra da əlavə elədi: «Mən özüm bu internatın məzunuyam. Asəf Zeynallı adına Musiqi Kollecini, sonra Ü.Hacıbəyov adına Musiqi Akademiyasını bitirmişəm. Bizim məktəb dünya işığına həsrət qalanları elmin, incəsənətin işıqlı yollarına qovuşdurur».

Heydər Əliyev Fondunun qayğısından ağızdolusu danışmağa Bakının Xətai raoynundakı 3 saylı Uşaq evinin - hamının «Günəş evi» kimi tanıdığı uşaq müəssisəsində çalışanların, burda məskunlaşan gülüzlü balaların da haqqı var. Fondun kollektivi «Günəş evi» ilə daimi əlaqə saxlayır, problemlərini öyrənir, onları zamanındaca aradan qaldırırlar. Son zamanlar Fond tərəfindən uşaq evinə kompyuterlər, kondisionerlər, kitablar, Oksford lüğətləri, habelə mikroavtobus hədiyyə olunub. «Günəş evi»nin keçmiş sakinlərindən Xəyal Qafarov doğma divarları tərk edib Lənkərandakı uşaq evində tərbiyə alan Naibə adlı qızla evlənərkən Heydər Əliyev Fondunun prezidenti Mehriban xanımın təşəbbüsü ilə gənclər Daşkəsən şəhərində ayrıca mənzillə təmin olunublar. Bu ilin mart ayında Fondun dəstəyi ilə Daşkəsən Rayon İcra Hakimiyyəti cavanlara gözəl toy da çaldırıb.

Fondun xeyirxah təşəbbüsü ilə dövlətin himayəsində olan, yetkinlik yaşına çatmış, hərbi xidmətini başa vurmuş gənclər Dövlət Neft Şirkətinin nəzdindəki təhsil müəssisələrində kurs keçdikdən sonra şirkətdə işlə təmin olunacaqlar. Bu, yaşına görə uşaq evlərindən ayrılmalı olanların işlə təminatını biryolluq həll edəcək. Dövlət himayəsində olan uşaqların yay tətilini səmərəli keçirmələri üçün Buzovnada - Xəzərin sahilində istirahət və sağlamlıq mərkəzinin tikintisinə hazırlıq gedir. «Günəş evi»nin də yenidən qurulması nəzərdə tutulur. 3 saylı Uşaq evinin direktoru Zöhrə Hüseynova bu faktları məmnunluqla sadalayır: «Bayramlarda, əziz günlərdə humanitar təşkilatlar, idarə və müəssisə rəhbərləri, imkanlı adamlar qapımızı tez-tez döyürlər, sağ olsunlar. Amma ilboyu ortaya çıxan taleyüklü problemlərin həllini boynuna götürən, qayğıların, ehtiyacların ödənilməsini təmin edən, bütün uşaq müəssisələrinin ümid yeri Heydər Əliyev Fondu, onun prezidenti Mehriban xanımdır. Fondun beş illiyi münasibətilə dövlət uşaq müəssisələri adından bu qayğıkeş kollektivi, şəxsən Fondun prezidenti Mehriban Əliyevanı təbrik edir, ona cansağlığı, xeyirxah işlərində uğurlar arzulayıram. Uşaqları sevindirməkdən böyük yaxşılıq yoxdur».

F. Qazıyeva

Mədəniyyət.- 2009.- 9 may.- S. 9.